บาลีพระไตรปิฎกเล่มที่ ๓๓ - พระสุตตันตปิฎกเล่มที่ ๒๕

หน้าที่ ๗๒.

สตฺตมํ เอกฉตฺติยตฺเถราปทานํ (๔๕๗) [๔๗] |๔๗.๓๗| องฺคารชาตา ปฐวี กุกฺกุฬานุคตา มหิ ปทุมุตฺตโร ภควา อพฺโภกาสมฺหิ จงฺกมิ ฯ |๔๗.๓๘| ปณฺฑรํ ฉตฺตมาทาย อทฺธานํ ปติปชฺชหํ ตตฺถ ทิสฺวาน สมฺพุทฺธํ จิตฺตํ ^๑- เม อุปปชฺชถ ฯ |๔๗.๓๙| มรีจิโมผุนา ^๒- ภูมิ องฺคาราว มหี อยํ อุปฏฺฐนฺติ ^๓- มหาวาตา สรีรกายุเขปนา ^๔- ฯ |๔๗.๔๐| สีตํ อุณฺหํ วิหนติ ^๕- วาตาตปนิวารณํ ปฏิคฺคณฺห อิมํ ฉตฺตํ ผสฺสยิสฺสามิ นิพฺพุตึ ฯ |๔๗.๔๑| อนุกมฺปโก การุณิโก ปทุมุตฺตโร มหายโส มม สงฺกปฺปมญฺญาย ปฏิคฺคณฺหิ ตทา ชิโน ฯ |๔๗.๔๒| ตึสกปฺปานิ เทวินฺโท เทวรชฺชมการยึ สตานํ ปญฺจกฺขตฺตุํ จ จกฺกวตฺติ อโหสหํ ฯ |๔๗.๔๓| ปเทสรชฺชํ วิปุลํ คณนาโต อสงฺขยํ อนุโภมิ สกํ กมฺมํ ปุพฺเพ สุกตมตฺตโน ฯ |๔๗.๔๔| อยํ เม ปจฺฉิมา ชาติ จริโม วตฺตเต ภโว อชฺชาปิ เสตฉตฺตํ เม สพฺพกาลํ ธรียติ ฯ |๔๗.๔๕| สตสหสฺเส อิโต กปฺเป ยํ ฉตฺตมททึ ตทา ทุคฺคตึ นาภิชานามิ ฉตฺตทานสฺสิทํ ผลํ ฯ @เชิงอรรถ: ^๑ ม. ยุ. วิตฺติ ฯ ^๒ ม. มรีจิโยตฺถฏา ฯ ยุ. มรีจิโวผุฏา ฯ ^๓ ม. อุปหนฺติ ฯ @ยุ. อุปวายนฺติ ฯ ^๔ ม. สรีรสฺสาสุเขปนา ฯ ยุ. สรีรสฺสานุเขปนา ฯ ^๕ ม. วิหนนฺตํ ฯ @ยุ. วิหรนฺติ ฯ

--------------------------------------------------------------------------------------------- หน้าที่ ๗๓.

|๔๗.๔๖| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๔๗.๔๗| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๔๗.๔๘| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา เอกฉตฺติโย เถโร อิมา คาถาโย อภาสิตฺถาติ ฯ เอกฉตฺติยตฺเถรสฺส อปทานํ สมตฺตํ ฯ

เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๗๒-๗๓. http://84000.org/tipitaka/pitaka_item/pali_item_s.php?book=33&item=47&items=1&pagebreak=1 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=33&item=47&items=1&pagebreak=1&mode=bracket อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=33&item=47&items=1&pagebreak=1 อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=33&item=47&items=1&pagebreak=1 ศึกษาอรรถกถานี้ได้ที่ :- http://84000.org/tipitaka/attha/attha.php?b=33&i=47 สารบัญพระไตรปิฎกเล่มที่ ๓๓ http://84000.org/tipitaka/read/?index_33