ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๓ ภาษาบาลี อักษรไทย พระสุตตันตปิฎกเล่มที่ ๕ สุตฺต. ม. มชฺฌิมปณฺณาสกํ

                        เสลสุตฺตํ
     [๖๐๔]   เอวมฺเม   สุตํ   เอกํ   สมยํ   ภควา  องฺคุตฺตราเปสุ
จาริกญฺจรมาโน   มหตา   ภิกฺขุสงฺเฆน   สทฺธึ  อฑฺฒเตรเสหิ  ภิกฺขุสเตหิ
เยน   อาปณํ   นาม   องฺคุตฺตราปานํ   นิคโม   ตทวสริ   ฯ  อสฺโสสิ
โข   เกณิโย   ชฏิโล  สมโณ  ขลุ  โภ  โคตโม  สกฺยปุตฺโต  สกฺยกุลา
ปพฺพชิโต    องฺคุตฺตราเปสุ    จาริกญฺจรมาโน    มหตา    ภิกฺขุสงฺเฆน
สทฺธึ   อฑฺฒเตรเสหิ    ภิกฺขุสเตหิ   อาปณํ   อนุปฺปตฺโต   ตํ  โข  ปน
ภวนฺตํ    โคตมํ   เอวํกลฺยาโณ   กิตฺติสทฺโท   อพฺภุคฺคโต   อิติปิ   โส
ภควา      อรหํ     สมฺมาสมฺพุทฺโธ     วิชฺชาจรณสมฺปนฺโน     สุคโต
โลกวิทู    อนุตฺตโร    ปุริสทมฺมสารถิ   สตฺถา   เทวมนุสฺสานํ   พุทฺโธ
ภควา   โส   อิมํ   โลกํ  สเทวกํ  สมารกํ  สพฺรหฺมกํ  สสฺสมณพฺราหฺมณึ
ปชํ   สเทวมนุสฺสํ   สยํ   อภิญฺญา   สจฺฉิกตฺวา   ปเวเทติ   โส  ธมฺมํ
เทเสติ     อาทิกลฺยาณํ    มชฺเฌกลฺยาณํ    ปริโยสานกลฺยาณํ    สาตฺถํ
สพฺยญฺชนํ   เกวลปริปุณฺณํ   ปริสุทฺธํ   พฺรหฺมจริยํ   ปกาเสติ   สาธุ  โข
ปน ตถารูปานํ อรหตํ ทสฺสนํ โหตีติ ฯ
     [๖๐๕]   อถ   โข   เกณิโย  ชฏิโล  เยน  ภควา  เตนุปสงฺกมิ
อุปสงฺกมิตฺวา   ภควตา   สทฺธึ   สมฺโมทิ   สมฺโมทนียํ   กถํ   สาราณียํ
วีติสาเรตฺวา   เอกมนฺตํ   นิสีทิ   ฯ   เอกมนฺตํ   นิสินฺนํ   โข  เกณิยํ
ชฏิลํ   ภควา   ธมฺมิยา   กถาย   สนฺทสฺเสสิ   สมาทเปสิ  สมุตฺเตเชสิ
สมฺปหํเสสิ   ฯ   อถ   โข   เกณิโย  ชฏิโล  ภควตา  ธมฺมิยา  กถาย
สนฺทสฺสิโต   สมาทปิโต   สมุตฺเตชิโต   สมฺปหํสิโต   ภควนฺตํ  เอตทโวจ
อธิวาเสตุ  เม  ภวํ  โคตโม  สฺวาตนาย  ภตฺตํ  สทฺธึ  ภิกฺขุสงฺเฆนาติ ฯ
เอวํ  วุตฺเต  ภควา  เกณิยํ  ชฏิลํ  เอตทโวจ มหา โข เกณิย ภิกฺขุสงฺโฆ
อฑฺฒเตรสานิ ภิกฺขุสตานิ ตฺวญฺจ พฺราหฺมเณสุ อภิปฺปสนฺโนติ ฯ
     {๖๐๕.๑}   ทุติยมฺปิ   โข   เกณิโย  ชฏิโล  ภควนฺตํ  เอตทโวจ
กิญฺจาปิ    โภ    โคตม    มหาภิกฺขุสงฺโฆ   อฑฺฒเตรสานิ   ภิกฺขุสตานิ
อหญฺจ    พฺราหฺมเณสุ   อภิปฺปสนฺโน   อธิวาเสตุ   เม   ภวํ   โคตโม
สฺวาตนาย   ภตฺตํ   สทฺธึ   ภิกฺขุสงฺเฆนาติ   ฯ   ทุติยมฺปิ   โข  ภควา
เกณิยํ   ชฏิลํ   เอตทโวจ  มหา  โข  เกณิย  ภิกฺขุสงฺโฆ  อฑฺฒเตรสานิ
ภิกฺขุสตานิ ตฺวญฺจ ๑- พฺราหฺมเณสุ อภิปฺปสนฺโนติ ฯ
     {๖๐๕.๒}   ตติยมฺปิ   โข   เกณิโย  ชฏิโล  ภควนฺตํ  เอตทโวจ
กิญฺจาปิ    โภ    โคตม    มหาภิกฺขุสงฺโฆ   อฑฺฒเตรสานิ   ภิกฺขุสตานิ
อหญฺจ    ๒-   พฺราหฺมเณสุ   อภิปฺปสนฺโน   อธิวาเสเตฺวว   เม   ภวํ
โคตโม   สฺวาตนาย   ภตฺตํ   สทฺธึ  ภิกฺขุสงฺเฆนาติ  ฯ  อธิวาเสติ  ๓-
ภควา   ตุณฺหีภาเวน   ฯ  อถ  โข  เกณิโย  ชฏิโล  ภควโต  อธิวาสนํ
วิทิตฺวา     อุฏฺฐายาสนา     เยน    สโก    อสฺสโม    เตนุปสงฺกมิ
อุปสงฺกมิตฺวา       มิตฺตามจฺเจ       ญาติสาโลหิเต       อามนฺเตสิ
สุณนฺตุ    เม    โภนฺโต   มิตฺตามจฺจา   ญาติสาโลหิตา   สมโณ   ๔-
โคตโม     นิมนฺติโต     สฺวาตนาย     ภตฺตํ    สทฺธึ    ภิกฺขุสงฺเฆน
เยน    เม    กายเวยฺยาวตฺติกํ    กเรยฺยาถาติ    ฯ   เอวํ   โภติ
@เชิงอรรถ:  ยุ. ตวญฺจ โข ฯ   ยุ. อหญฺจ โข  ฯ    ยุ. อธิวาเสสิ ฯ
@ ยุ. สมโณ เม โคตโม ฯ
โข    เกณิยสฺส    ชฏิลสฺส    มิตฺตามจฺจา   ญาติสาโลหิตา   เกณิยสฺส
ชฏิลสฺส    ปฏิสฺสุตฺวา    อปฺเปกจฺเจ   อุทฺธนานิ   ขนนฺติ   อปฺเปกจฺเจ
กฏฺฐานิ    ผาเลนฺติ    อปฺเปกจฺเจ   ภาชนานิ   โธวนฺติ   อปฺเปกจฺเจ
อุทกมณิกํ    ปติฏฺฐาเปนฺติ    อปฺเปกจฺเจ   อาสนานิ   ปญฺญาเปนฺติ   ฯ
เกณิโยปิ ๑- ชฏิโล สามญฺเญว มณฺฑลมาฬํ ปฏิยาเทติ ฯ
     [๖๐๖]   เตน   โข   ปน  สมเยน  เสโล  พฺราหฺมโณ  อาปเณ
ปฏิวสติ   ติณฺณํ   เวทานํ   ปารคู   สนิฆณฺฑุเกฏุภานํ   สากฺขรปฺปเภทานํ
อิติหาสปญฺจมานํ     ปทโก    เวยฺยากรโณ    โลกายตมหาปุริสลกฺขเณสุ
อนวโย  ตีณิ  มาณวกสตานิ  มนฺเต  วาเจติ  ฯ  เตน  โข  ปน สมเยน
เกณิโย   ชฏิโล   เสเล   พฺราหฺมเณ  อภิปฺปสนฺโน  โหติ  ฯ  อถ  โข
เสโล    พฺราหฺมโณ    ตีหิ    มาณวกสเตหิ    ปริวุโต    ชงฺฆาวิหารํ
อนุจงฺกมมาโน      อนุวิจรมาโน      เยน     เกณิยสฺส     ชฏิลสฺส
อสฺสโม เตนุปสงฺกมิ ฯ
     {๖๐๖.๑}   อทฺทสา  โข  เสโล  พฺราหฺมโณ  เกณิยสฺมึ  ๒- ชฏิเล
อปฺเปกจฺเจ    อุทฺธนานิ   ขนนฺเต   อปฺเปกจฺเจ   กฏฺฐานิ   ผาเลนฺเต
อปฺเปกจฺเจ   ภาชนานิ  โธวนฺเต  อปฺเปกจฺเจ  อุทกมณิกํ  ปติฏฺฐาเปนฺเต
อปฺเปกจฺเจ   อาสนานิ   ปญฺญาเปนฺเต   เกณิยํ   ๓-  ชฏิลํ  สามญฺเญว
มณฺฑลมาฬํ    ปฏิยาเทนฺตํ    ทิสฺวาน   เกณิยํ   ชฏิลํ   เอตทโวจ   กึ
นุ   โภโต   เกณิยสฺส   อาวาโห  วา  ภวิสฺสติ  วิวาโห  วา  ภวิสฺสติ
มหายญฺโญ   วา  ปจฺจุปฏฺฐิโต  ราชา  ๔-  มาคโธ  เสนิโย  พิมฺพิสาโร
นิมนฺติโต   สฺวาตนาย   สทฺธึ   พลกาเยนาติ   ฯ   น  เม  โภ  เสล
@เชิงอรรถ:  ยุ. เกณิโย ปน ฯ    ยุ. เกณิยสฺสมิเย ฯ     ยุ. เกณิยํ ปน ฯ
@ ยุ. ราชา วา ฯ
อาวาโห   วา   ภวิสฺสติ   นปิ   วิวาโห   วา   ภวิสฺสติ  นปิ  ราชา
มาคโธ   เสนิโย   พิมฺพิสาโร   นิมนฺติโต  สฺวาตนาย  สทฺธึ  พลกาเยน
อปิจ   โข   เม   มหายญฺโญ   ปจฺจุปฏฺฐิโต   อตฺถิ   สมโณ   โคตโม
สกฺยปุตฺโต    สกฺยกุลา    ปพฺพชิโต    องฺคุตฺตราเปสุ   จาริกญฺจรมาโน
มหตา    ภิกฺขุสงฺเฆน    สทฺธึ    อฑฺฒเตรเสหิ    ภิกฺขุสเตหิ    อาปณํ
อนุปฺปตฺโต   ตํ   โข   ปน   ภวนฺตํ   โคตมํ  เอวํกลฺยาโณ  กิตฺติสทฺโท
อพฺภุคฺคโต   อิติปิ  โส  ภควา  อรหํ  สมฺมาสมฺพุทฺโธ  วิชฺชาจรณสมฺปนฺโน
สุคโต    โลกวิทู    อนุตฺตโร   ปุริสทมฺมสารถิ   สตฺถา   เทวมนุสฺสานํ
พุทฺโธ  ภควาติ  โส  เม  นิมนฺติโต  สฺวาตนาย  สทฺธึ  ภิกฺขุสงฺเฆนาติ ฯ
พุทฺโธติ  โภ  เกณิย  วเทสีติ  ฯ  พุทฺโธติ  โภ  เสล วทามีติ ฯ พุทฺโธติ
โภ เกณิย วเทสีติ ฯ พุทฺโธติ โภ เสล วทามีติ ฯ
     {๖๐๖.๒}   อถ   โข  เสลสฺส  พฺราหฺมณสฺส  เอตทโหสิ  โฆโสปิ
โข  เอโส  ทุลฺลโภ  โลกสฺมึ  ยทิทํ  พุทฺโธติ   อาคตานิ  โข  ปนมฺหากํ
มนฺเตสุ      ทฺวตฺตึส     มหาปุริสลกฺขณานิ     เยหิ     สมนฺนาคตสฺส
มหาปุริสสฺส   เทฺวว   คติโย  ภวนฺติ  อนญฺญา  สเจ  อคารํ  อชฺฌาวสติ
ราชา   โหติ   จกฺกวตฺติ   ธมฺมิโก   ธมฺมราชา   จาตุรนฺโต   วิชิตาวี
ชนปทตฺถา   ๑-   วิริยปฺปตฺโต   สตฺตรตนสมนฺนาคโต   ตสฺสิมานิ   สตฺต
รตนานิ   ภวนฺติ   เสยฺยถีทํ   จกฺกรตนํ   หตฺถิรตนํ   อสฺสรตนํ  มณิรตนํ
อิตฺถีรตนํ     คหปติรตนํ     ปรินายกรตนเมว     สตฺตมํ    ปโรสหสฺสํ
โข    ปนสฺส   ปุตฺตา   ภวนฺติ   สูรา   วีรงฺครูปา   ปรเสนปฺปมทฺทนา
@เชิงอรรถ:  ยุ. ชนปทตฺถาวริยปฺปตฺโต ฯ
โส   อิมํ   ปฐวึ   สาครปริยนฺตํ  อทณฺเฑน  อสตฺเถน  ธมฺเมน  อภิวิชิย
อชฺฌาวสติ   สเจ   ๑-   ปน   อคารสฺมา   อนคาริยํ   ปพฺพชติ  อรหํ
โหติ   สมฺมาสมฺพุทฺโธ   โลเก   วิวฏจฺฉโท   กหํ   ปน   โภ   เกณิย
เอตรหิ โส ภวํ โคตโม วิหรติ อรหํ สมฺมาสมฺพุทฺโธติ ฯ
     [๖๐๗]   เอวํ  วุตฺเต  เกณิโย  ชฏิโล  ทกฺขิณํ  พาหํ  ปคฺคเหตฺวา
เสลํ   พฺราหฺมณํ   เอตทโวจ   เยเนสา   โภ   เสล  นีลวนราชีติ  ฯ
อถ   โข   เสโล   พฺราหฺมโณ  ตีหิ  มาณวกสเตหิ  สทฺธึ  เยน  ภควา
เตนุปสงฺกมิ  ฯ  อถ  โข  เสโล  พฺราหฺมโณ  เต  มาณวเก  อามนฺเตสิ
อปฺปสทฺทา  โภนฺโต  อาคจฺฉนฺตุ  ปเท  ปทํ  นิกฺขิปนฺตา  ทุรา  ๒-  สทา
หิ   เต   ภวนฺโต  ๓-  สีหาว  เอกจรา  ยทา  จาหํ  โภตา  สมเณน
โคตเมน   สทฺธึ   มนฺเตยฺยํ   มา   เม   โภนฺโต   อนฺตรนฺตรา   กถํ
โอปาเตถ   กถาปริโยสานํ   จ   เม   ภวนฺโต   อาคเมนฺตูติ  ฯ  อถ
โข   เสโล    พฺราหฺมโณ   เยน   ภควา   เตนุปสงฺกมิ  อุปสงฺกมิตฺวา
ภควตา   สทฺธึ   สมฺโมทิ   สมฺโมทนียํ   กถํ   สาราณียํ   วีติสาเรตฺวา
เอกมนฺตํ   นิสีทิ   ฯ   เอกมนฺตํ   นิสินฺโน   โข   เสโล   พฺราหฺมโณ
ภควโต กาเย ทฺวตฺตึส มหาปุริสลกฺขณานิ สมฺมนฺเนสิ ฯ
     {๖๐๗.๑}   อทฺทสา   โข   เสโล   พฺราหฺมโณ  ภควโต  กาเย
ทฺวตฺตึส    มหาปุริสลกฺขณานิ    เยภุยฺเยน    ฐเปตฺวา    เทฺว   ทฺวีสุ
มหาปุริสลกฺขเณสุ       กงฺขติ      วิจิกิจฺฉติ      นาธิมุจฺจติ      น
สํปสีทติ  โกโสหิเต จ วตฺถคุเยฺห ปหุตชิวฺหตาย จ ฯ
@เชิงอรรถ:  ยุ. สเจ โข ฯ    ยุ. ทุราสทา ฯ    ยุ. ภควนฺโต ฯ
     [๖๐๘]   อถ   โข   ภควโต  เอตทโหสิ  ปสฺสติ  โข  เม  อยํ
เสโล   พฺราหฺมโณ   ทฺวตฺตึส   มหาปุริสลกฺขณานิ   เยภุยฺเยน  ฐเปตฺวา
เทฺว    ทฺวีสุ   มหาปุริสลกฺขเณสุ   กงฺขติ   วิจิกิจฺฉติ   นาธิมุจฺจติ   น
สํปสีทติ   โกโสหิเต   จ  วตฺถคุเยฺห  ปหุตชิวฺหตาย  จาติ  ฯ  อถ  โข
ภควา   ตถารูปํ   อิทฺธาภิสงฺขารํ   อภิสงฺขาเรสิ   ยถา  อทฺทส  เสโล
พฺราหฺมโณ   ภควโต   โกโสหิตํ   วตฺถคุยฺหํ  ฯ  อถ  โข  ภควา  ชิวฺหํ
นินฺนาเมตฺวา   อุโภปิ  กณฺณโสตานิ  อนุมสิ  ปฏิมสิ  อุโภปิ  นาสิกโสตานิ
อนุมสิ ปฏิมสิ เกวลกปฺปํ  ๑- นลาฏมณฺฑลํ ชิวฺหาย ฉาเทสิ ฯ
     [๖๐๙]   อถ  โข  เสลสฺส  พฺราหฺมณสฺส  เอตทโหสิ  สมนฺนาคโต
โข    สมโณ    โคตโม    ทฺวตฺตึสมหาปุริสลกฺขเณหิ   ปริปุณฺเณหิ   โน
อปฺปริปุณฺเณหิ  โน  จ  โข  นํ  ชานามิ  พุทฺโธ  วา โน วา สุตํ ๒- ปน
เมตํ     พฺราหฺมณานํ     วุฑฺฒานํ     มหลฺลกานํ     อาจริยปาจริยานํ
ภาสมานานํ   เย   เต   ภวนฺติ   อรหนฺโต  สมฺมาสมฺพุทฺธา  เต  สเก
วณฺเณ     ภญฺญมาเน    อตฺตานํ    ปาตุกโรนฺตีติ    ยนฺนูนาหํ    สมณํ
โคตมํ สมฺมุขา สารุปฺปาหิ คาถาหิ อภิตฺถเวยฺยนฺติ ฯ
     {๖๐๙.๑}   อถ  โข  เสโล  พฺราหฺมโณ ภควนฺตํ สมฺมุขา สารุปฺปาหิ
คาถาหิ อภิตฺถวิ
         ปริปุณฺณกาโย สุรุจี            สุชาโต จารุทสฺสโน
         สุวณฺณวณฺโณสิ ภควา       สุสุกฺกทาโฐ สวิริยวา
         นรสฺส หิ สุชาตสฺส            เย ภวนฺติ วิสฺสุญฺชนา ๓-
         สพฺเพ เต ตว กายสฺมึ         มหาปุริสลกฺขณา
@เชิงอรรถ:  ยุ. เกวลมฺปิ  ฯ     ยุ. สุตํ โข ปน ฯ    ยุ. วิยญฺชนา ฯ
         ปสนฺนเนตฺโต สุมุโข          พฺรหฺมา อุชุ ปตาปวา
         มชฺเฌ สมณสงฺฆสฺส           อาทิจฺโจว วิโรจสิ
         กลฺยาณทสฺสโน ภิกฺขุ         กญฺจนสนฺนิภตฺตโจ
         กึ เต สมณภาเวน                เอวํ อุตฺตมวณฺณิโน
         ราชา อรหสิ ภวิตุํ               จกฺกวตฺติ รเถสโภ
         จาตุรนฺโต วิชิตาวี               ชมฺพุสณฺฑสฺส อิสฺสโร
         ขตฺติยา โภชราชาโน          อนุยุตฺตา ภวนฺตุ ๑- เต
         ราชาภิราชา มนุชินฺโท        รชฺชํ กาเรหิ โคตม
         ราชาหมสฺมิ เสลาติ [ภควา] ธมฺมราชา อนุตฺตโร
         ธมฺเมน จกฺกํ วตฺเตมิ           จกฺกํ อปฺปฏิวตฺติยํ
         สมฺพุทฺโธ ปฏิชานาสิ [อิติ เสโล พฺราหฺมโณ] ธมฺมราชา อนุตฺตโร
         ธมฺเมน จกฺกํ วตฺเตมิ            อิติ ภาสสิ โคตม
         โก นุ เสนาปติ โภโต         สาวโก สตฺถุ ทนฺวโย
         โก ๒- โนมํ อนุวตฺเตติ       ธมฺมจกฺกํ ปวตฺติตํ
         มยา ปวตฺติตํ จกฺกํ [เสลาติ ภควา] ธมฺมจกฺกํ อนุตฺตรํ
         สารีปุตฺโต อนุวตฺเตติ         อนุชาโต ตถาคตํ
         อภิญฺเญยฺยํ อภิญฺญาตํ         ภาเวตพฺพญฺจ ภาวิตํ
         ปหาตพฺพํ ปหีนํ เม             ตสฺมา พุทฺโธสฺมิ พฺราหฺมณ
         วินยสฺสุ มยิ กงฺขํ                 อธิมุจฺจสฺสุ พฺราหฺมณ
         ทุลฺลภํ ทสฺสนํ โหติ            สมฺพุทฺธานํ อภิณฺหโส
@เชิงอรรถ:  ยุ. ภวนฺติ ฯ      ยุ. โก เต อิมํ ฯ
         เยสํ เว ๑- ทุลฺลโภ โลเก     ปาตุภาโว อภิณฺหโส
         โสหํ พฺราหฺมณ สมฺพุทฺโธ  สลฺลกตฺโต อนุตฺตโร
         พฺรหฺมภูโต อติตุโล            มารเสนปฺปมทฺทโน
         สพฺพามิตฺเต วสีกตฺวา       โมทามิ อกุโตภโย
         อิมํ โภนฺโต นิสาเมถ          ยถา ภาสติ จกฺขุมา
         สลฺลกตฺโต มหาวีโร          สีโหว นทตี วเน
         พฺรหฺมภูตํ อติตุลํ                มารเสนปฺปมทฺทนํ
         โก ทิสฺวา นปฺปสีเทยฺย       อปิ กณฺหาภิชาติโก
         โย มํ อิจฺฉติ อนฺเวตุ            โย จ ๒- นิจฺฉติ อจฺฉตุ ๓-
         อิธาหํ ปพฺพชิสฺสามิ           วรปญฺญสฺส สนฺติเก
         เอวญฺเจ ๔- รุจฺจติ โภโต    สมฺมาสมฺพุทฺธสาสนํ
         มยํปิ ปพฺพชิสฺสาม              วรปญฺญสฺส สนฺติเก
         พฺราหฺมณาติ  ๕- สตฺตา อิเม  ยาจนฺติปญฺชลิกตา ๖-
         พฺรหฺมจริยํ จริสฺสาม           ภควา ตว สนฺติเก
         สฺวากฺขาตํ พฺรหฺมจริยํ [เสลาติ ภควา] สนฺทิฏฺฐิกมกาลิกํ
         ยตฺถ อโมฆา ปพฺพชฺชา       อปฺปมตฺตสฺส สิกฺขโตติ ฯ
อลตฺถ   โข   เสโล   พฺราหฺมโณ   สปริโส  ภควโต  สนฺติเก  ปพฺพชฺชํ
อลตฺถ อุปสมฺปทํ ฯ
     [๖๑๐]   อถ   โข   เกณิโย  ชฏิโล  ตสฺสา  รตฺติยา  อจฺจเยน
สเก   อสฺสเม   ปณีตํ   ขาทนียํ   โภชนียํ   ปฏิยาทาเปตฺวา   ภควโต
@เชิงอรรถ:  ยุ. โว ฯ    ยุ. วา ฯ    ยุ. คจฺฉตุ ฯ    ยุ. เอตญฺเจ ฯ
@ ยุ. พฺรหฺมกา ติสตา อิเม ฯ    ยุ. ยาจนฺติ ปญฺชลีกตา ฯ
กาลํ   อาโรจาเปสิ  กาโล  โภ  โคตม  นิฏฺฐิตํ  ภตฺตนฺติ  ฯ  อถ  โข
ภควา   ปุพฺพณฺหสมยํ   นิวาเสตฺวา   ปตฺตจีวรมาทาย   เยน   เกณิยสฺส
ชฏิลสฺส    อสฺสโม    เตนุปสงฺกมิ   อุปสงฺกมิตฺวา   ปญฺญตฺเต   อาสเน
นิสีทิ   สทฺธึ   ภิกฺขุสงฺเฆน   ฯ   อถ  โข  เกณิโย  ชฏิโล  พุทฺธปฺปมุขํ
ภิกฺขุสงฺฆํ    ปณีเตน    ขาทนีเยน    โภชนีเยน   สหตฺถา   สนฺตปฺเปสิ
สมฺปวาเรสิ  ฯ  อถ  โข  เกณิโย  ชฏิโล ภควนฺตํ ภุตฺตาวึ โอนีตปตฺตปาณึ
อญฺญตรํ นีจํ อาสนํ คเหตฺวา เอกมนฺตํ นิสีทิ ฯ
     [๖๑๑]   เอกมนฺตํ   นิสินฺนํ   โข   เกณิยํ  ชฏิลํ  ภควา  อิมาหิ
คาถาหิ อนุโมทิ
         อคฺคิหุตฺตํมุขา ๑- ยญฺญา  สา วิตฺติ ฉนฺทโส มุขํ
         ราชา มุขํ มนุสฺสานํ            นทีนํ สาคโร มุขํ
         นกฺขตฺตานํ มุขํ จนฺโท        อาทิจฺโจ ตปตํ มุขํ
         ปุญฺญมากงฺขมานานํ          สงฺโฆ เว ยชตํ มุขนฺติ ฯ
อถ    โข    ภควา   เกณิยํ   ชฏิลํ   อิมาหิ   คาถาหิ   อนุโมทิตฺวา
อุฏฺฐายาสนา  ปกฺกามิ  ฯ  อถ  โข อายสฺมา เสโล สปริโส ๒- วูปกฏฺโฐ
อปฺปมตฺโต    อาตาปี    ปหิตตฺโต   วิหรนฺโต   นจิรสฺเสว   ยสฺสตฺถาย
กุลปุตฺตา    สมฺมเทว    อคารสฺมา   อนาคาริยํ   ปพฺพชนฺติ   ตทนุตฺตรํ
พฺรหฺมจริยปริโยสานํ    ทิฏฺเฐว    ธมฺเม    สยํ   อภิญฺญา   สจฺฉิกตฺวา
อุปสมฺปชฺช    วิหาสิ   ขีณา   ชาติ   วุสิตํ   พฺรหฺมจริยํ   กตํ   กรณียํ
นาปรํ   อิถตฺตายาติ   อพฺภญฺญาสิ   ฯ   อญฺญตโร  ๓-  โข  ปนายสฺมา
@เชิงอรรถ:  ยุ. อคฺคิหุตฺตมุขา ฯ    ยุ. เอตฺถนฺตเร เอโกติ ทิสฺสติ ฯ
@ ยุ. อญฺญตโร จ โข ฯ
เสโล สปริโส อรหตํ อโหสิ ฯ
     [๖๑๒]   อถ  โข  อายสฺมา เสโล สปริโส เยน ภควา เตนุปสงฺกมิ
อุปสงฺกมิตฺวา   เอกํสํ  จีวรํ  กตฺวา  เยน  ภควา  เตนญฺชลิมฺปณาเมตฺวา
ภควนฺตํ คาถาหิ อชฺฌภาสิ
         ยนฺตํ สรณมาคมฺห              อิโต อฏฺฐมิ จกฺขุม
         สตฺตรตฺเตน ภควา              ทนฺตมฺหา ตว สาสเน
         ตุวํ พุทฺโธ ตุวํ สตฺถา           ตุวํ มาราภิภู มุนิ
         ตุวํ อนุสเย เฉโก ๑-            ติณฺโณ ตาเรสิมํ ปชํ
         อุปธี เต สมติกฺกนฺตา          อาสวา เต ปทาลิตา
         สีโหว อนุปาทาโน             ปหีนภยเภรโว
         ภิกฺขโวติ ๒- สตฺตา อิเม    ติฏฺฐนฺติปญฺชลิกตา
         ปาเท วีร ปสาเรหิ              นาคา วนฺทนฺตุ สตฺถุโนติ ฯ
                   เสลสุตฺตํ นิฏฺฐิตํ ทุติยํ ฯ
                       --------
@เชิงอรรถ:  ยุ. เฉตฺวา ฯ    ยุ. ภิกฺขโว ติสตา อิเม ติฏฺฐนฺติ ปญฺชลีกตา ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๑๓ หน้าที่ ๕๔๘-๕๕๗. https://84000.org/tipitaka/read/pali_read.php?B=13&A=11207&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=13&A=11207&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=13&item=604&items=9              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=13&siri=42              ศึกษาอรรถกถานี้ได้ที่ :- https://84000.org/tipitaka/attha/attha.php?b=13&i=604              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=9&A=7233              The Pali Atthakatha in Roman :- https://84000.org/tipitaka/atthapali/read_rm.php?B=9&A=7233              สารบัญพระไตรปิฎกเล่มที่ ๑๓ https://84000.org/tipitaka/read/?index_13 https://84000.org/tipitaka/english/?index_13

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]