ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๓ ภาษาบาลี อักษรไทย พระสุตตันตปิฎกเล่มที่ ๕ สุตฺต. ม. มชฺฌิมปณฺณาสกํ

                       นฬกปานสุตฺตํ
     [๑๙๕]   เอวมฺเม  สุตํ เอกํ สมยํ ภควา โกสเลสุ วิหรติ นฬกปาเน
ปลาสวเน  ฯ  เตน  โข  ปน  สมเยน  สมฺพหุลา  อภิญฺญาตา อภิญฺญาตา
กุลปุตฺตา   ภควนฺตํ   อุทฺทิสฺส   สทฺธา   อคารสฺมา  อนคาริยํ  ปพฺพชิตา
โหนฺติ  อายสฺมา  จ  อนุรุทฺโธ  อายสฺมา  จ  ภทฺทิโย  ๑-  อายสฺมา จ
กิมฺพิโล   อายสฺมา   จ   ภคุ  อายสฺมา  จ  โกณฺฑญฺโญ  ๒-  อายสฺมา
จ   เรวโต  อายสฺมา  จ  อานนฺโท  อญฺเญ  จ  อภิญฺญาตา  อภิญฺญาตา
กุลปุตฺตา   ฯ   เตน   โข   ปน   สมเยน   ภควา   ภิกฺขุสงฺฆปริวุโต
อพฺโภกาเส  นิสินฺโน  โหติ  ฯ  อถ  โข  ภควา [๓]- กุลปุตฺเต อารพฺภ
ภิกฺขู   อามนฺเตสิ   เย   เต  ภิกฺขเว  กุลปุตฺตา  มมํ  อุทฺทิสฺส  สทฺธา
อคารสฺมา   อนคาริยํ   ปพฺพชิตา   กจฺจิ  เต  ภิกฺขเว  [๔]-  อภิรตา
พฺรหฺมจริเยติ ฯ [๕]- เต ภิกฺขู ตุณฺหี อเหสุํ ฯ
     {๑๙๕.๑}   ทุติยมฺปิ   โข  ภควา  เต  กุลปุตฺเต  อารพฺภ  ภิกฺขู
อามนฺเตสิ    เย   เต   ภิกฺขเว   กุลปุตฺตา   มมํ   อุทฺทิสฺส   สทฺธา
อคารสฺมา   อนคาริยํ   ปพฺพชิตา   กจฺจิ   เต  ภิกฺขเว  ภิกฺขู  อภิรตา
พฺรหฺมจริเยติ   ฯ   ทุติยมฺปิ  โข  เต  ภิกฺขู  ตุณฺหี  อเหสุํ  ฯ  ตติยมฺปิ
โข   ภควา   เต   กุลปุตฺเต   อารพฺภ   ภิกฺขู   อามนฺเตสิ  เย  เต
ภิกฺขเว    กุลปุตฺตา    มมํ   อุทฺทิสฺส   สทฺธา   อคารสฺมา   อนคาริยํ
@เชิงอรรถ:  ม. เอวํ ฯ สี. ยุ. นนฺทิโย ฯ    ม. เอวํ ฯ สี. ยุ. โกณฺฑธาโน ฯ
@ โป. ม. ยุ. เต ฯ   โป. ม. ยุ. ภิกฺขู ฯ     เอวํ วุตฺเต ฯ
ปพฺพชิตา   กจฺจิ   เต   ภิกฺขเว   ภิกฺขู   อภิรตา   พฺรหฺมจริเยติ   ฯ
ตติยมฺปิ โข เต ภิกฺขู ตุณฺหี อเหสุํ ฯ
     [๑๙๖]   อถ   โข   ภควโต   เอตทโหสิ  ยนฺนูนาหํ  เตว  ๑-
กุลปุตฺเต   ปุจฺเฉยฺยนฺติ   ฯ   อถ   โข   ภควา   อายสฺมนฺตํ  อนุรุทฺธํ
อามนฺเตสิ   กจฺจิ   ตุเมฺห   อนุรุทฺธา   ๒-  อภิรตา  พฺรหฺมจริเยติ  ฯ
ตคฺฆ   มยํ   ภนฺเต   อภิรตา  พฺรหฺมจริเยติ  ฯ  สาธุ  สาธุ  อนุรุทฺธา
เอตํ   โข   อนุรุทฺธา   ตุมฺหากํ  ปฏิรูปํ  กุลปุตฺตานํ  สทฺธา  อคารสฺมา
อนคาริยํ   ปพฺพชิตานํ   ยํ   ตุเมฺห   อภิรเมยฺยาถ   พฺรหฺมจริเย  เยน
ตุเมฺห   อนุรุทฺธา   ภเทฺรน   โยพฺพเนน   สมนฺนาคตา  ปฐเมน  วยสา
สุสุกาฬเกสา  กาเม  ปริภุญฺเชยฺยาถ  เตน  ตุเมฺห  อนุรุทฺธา ภเทฺรน ๓-
โยพฺพเนน   สมนฺนาคตา   ปฐเมน    วยสา   สุสุกาฬเกสา  อคารสฺมา
อนคาริยํ  ปพฺพชิตา  เต  ๔-  โข  ปน ตุเมฺห อนุรุทฺธา เนว ราชาภินีตา
อคารสฺมา    อนคาริยํ    ปพฺพชิตา    น    โจราภินีตา    อคารสฺมา
อนคาริยํ   ปพฺพชิตา   น   อิณฏฺฏา   อคารสฺมา   อนคาริยํ   ปพฺพชิตา
น    ภยฏฺฏา   อคารสฺมา   อนคาริยํ   ปพฺพชิตา   น   อาชีวิกาปกตา
อคารสฺมา   อนคาริยํ   ปพฺพชิตา   อปิจ   โขมฺหิ   โอติณฺโณ   ชาติยา
ชราย   มรเณน  โสเกหิ  ปริเทเวหิ  ทุกฺเขหิ  โทมนสฺเสหิ  อุปายาเสหิ
ทุกฺโขติณฺโณ      ทุกฺขปเรโต     อปฺเปวนาม     อิมสฺส     เกวลสฺส
ทุกฺขกฺขนฺธสฺส    อนฺตกิริยา    ปญฺญาเยถาติ    นนุ   ตุเมฺห   อนุรุทฺธา
เอวํ สทฺธา อคารสฺมา อนคาริยํ ปพฺพชิตาติ ฯ เอวํ ภนฺเต ฯ
@เชิงอรรถ:  ม. วสทฺโท นตฺถิ ฯ   โป. อนุรุทฺธ ฯ สพฺพตฺถ อีทิสเมว ฯ   ม. ภเทฺรนปิ ฯ
@ ม. เต จ โข ฯ
     {๑๙๖.๑}   เอวํ  ปพฺพชิเตน  จ ปน อนุรุทฺธา กุลปุตฺเตน กิมสฺส ๑-
กรณียํ ฯ วิเวกํ อนุรุทฺธา กาเมหิ วิเวกํ อกุสเลหิ ธมฺเมหิ ปีติสุขํ นาธิคจฺฉติ
อญฺญํ   วา   ๒-  ตโต  สนฺตตรํ  ฯ  ตสฺส  อภิชฺฌาปิ  จิตฺตํ  ปริยาทาย
ติฏฺฐติ    พฺยาปาโทปิ   จิตฺตํ   ปริยาทาย   ติฏฺฐติ   ถีนมิทฺธมฺปิ   จิตฺตํ
ปริยาทาย    ติฏฺฐติ    อุทฺธจฺจกุกฺกุจฺจมฺปิ    จิตฺตํ   ปริยาทาย   ติฏฺฐติ
วิจิกิจฺฉาปิ   จิตฺตํ   ปริยาทาย  ติฏฺฐติ  อรติปิ  จิตฺตํ  ปริยาทาย  ติฏฺฐติ
ตนฺทีปิ   จิตฺตํ   ปริยาทาย   ติฏฺฐติ   วิเวกํ  อนุรุทฺธา  กาเมหิ  วิเวกํ
อกุสเลหิ   ธมฺเมหิ   ปีติสุขํ   นาธิคจฺฉติ  อญฺญํ  วา  ตโต  สนฺตตรํ  ฯ
วิเวกํ   อนุรุทฺธา  กาเมหิ  วิเวกํ  อกุสเลหิ  ธมฺเมหิ  ปีติสุขํ  อธิคจฺฉติ
อญฺญํ   วา   ตโต   สนฺตตรํ  ฯ  ตสฺส  อภิชฺฌาปิ  จิตฺตํ  น  ปริยาทาย
ติฏฺฐติ   พฺยาปาโทปิ   จิตฺตํ   น   ปริยาทาย  ติฏฺฐติ  ถีนมิทฺธมฺปิ  จิตฺตํ
น   ปริยาทาย   ติฏฺฐติ  อุทฺธจฺจกุกฺกุจฺจมฺปิ  จิตฺตํ  น  ปริยาทาย  ติฏฺฐติ
วิจิกิจฺฉาปิ   จิตฺตํ   น  ปริยาทาย  ติฏฺฐติ  อรติปิ  จิตฺตํ  น  ปริยาทาย
ติฏฺฐติ   ตนฺทีปิ  จิตฺตํ  น  ปริยาทาย  ติฏฺฐติ  วิเวกํ  อนุรุทฺธา  กาเมหิ
วิเวกํ อกุสเลหิ ธมฺเมหิ ปีติสุขํ อธิคจฺฉติ อญฺญํ วา ตโต สนฺตตรํ ฯ
     [๑๙๗]   กินฺติ  โว  อนุรุทฺธา  มยิ  โหติ  เย อาสวา สงฺกิเลสิกา
โปโนพฺภวิกา    สทรา    ๓-   ทุกฺขวิปากา   อายตึ   ชาติชรามรณิยา
อปฺปหีนา   เต   ตถาคตสฺส   ตสฺมา   ตถาคโต   สงฺขาเยกํ  ปฏิเสวติ
สงฺขาเยกํ  อธิวาเสติ  สงฺขาเยกํ  ปริวชฺเชติ  สงฺขาเยกํ  วิโนเทตีติ  ฯ
@เชิงอรรถ:  ม. กึ มญฺญสิ กรณียนฺติ ฯ    ม. จ ฯ   โป. สทรถา ฯ สพฺพตฺถ อีทิสเมว ฯ
เอวํ   โข   โน   ภนฺเต   ภควติ   โหติ   เย  อาสวา  สงฺกิเลสิกา
โปโนพฺภวิกา   สทรา   ทุกฺขวิปากา   อายตึ   ชาติชรามรณิยา   ปหีนา
เต   ตถาคตสฺส   ตสฺมา    ตถาคโต  สงฺขาเยกํ  ปฏิเสวติ  สงฺขาเยกํ
อธิวาเสติ  สงฺขาเยกํ  ปริวชฺเชติ  สงฺขาเยกํ  วิโนเทตีติ  ฯ  สาธุ สาธุ
อนุรุทฺธา  ตถาคตสฺส  อนุรุทฺธา  เย  อาสวา  สงฺกิเลสิกา  โปโนพฺภวิกา
สทรา   ทุกฺขวิปากา   อายตึ  ชาติชรามรณิยา  ปหีนา  เต  อุจฺฉินฺนมูลา
ตาลาวตฺถุกตา   อนภาวงฺคตา   ๑-   อายตึ  อนุปฺปาทธมฺมา  เสยฺยถาปิ
อนุรุทฺธา   ตาโล   มตฺถกจฺฉินฺโน   อภพฺโพ   ปุน   วิรูฬฺหิยา  เอวเมว
โข   อนุรุทฺธา   ตถาคตสฺส   เย   อาสวา  สงฺกิเลสิกา  โปโนพฺภวิกา
สทรา  ทุกฺขวิปากา  อายตึ  ชาติชรามรณิยา  ปหีนา  [๒]-  อุจฺฉินฺนมูลา
ตาลาวตฺถุกตา     อนภาวงฺคตา     อายตึ    อนุปฺปาทธมฺมา    ตสฺมา
ตถาคโต   สงฺขาเยกํ   ปฏิเสวติ   สงฺขาเยกํ   อธิวาเสติ   สงฺขาเยกํ
ปริวชฺเชติ สงฺขาเยกํ วิโนเทตีติ ฯ
     [๑๙๘]   ตํ   กึ   มญฺญสิ   อนุรุทฺธา  กํ  อตฺถวสํ  สมฺปสฺสมาโน
ตถาคโต   สาวเก  อพฺภตีเต  ๓-  กาลกเต  อุปปตฺตีสุ  พฺยากโรติ  อสุ
อมุตฺร  อุปฺปนฺโน  ๔-  อสุ  อมุตฺร  อุปฺปนฺโนติ  ๕-  ฯ  ภควํมูลกา  ๖-
โน   ภนฺเต   ธมฺมา   ภควํเนตฺติกา   ภควํปฏิสรณา  สาธุ  วต  ภนฺเต
ภควนฺตํเยว   ปฏิภาตุ  เอตสฺส  ภาสิตสฺส  อตฺโถ  ภควโต  สุตฺวา  ภิกฺขู
@เชิงอรรถ:  ม. เอวํ อนภาวกตา ฯ สี. ยุ. อนภาวกตา ฯ     โป. เต. ฯ ม. อีทิสเมว ฯ
@ โป. อารภติเต ฯ อิโต ปรํ อีทิสเมว ฯ ๔-๕ โป. ม. อุปปนฺโน ฯ
@อิโต ปรํ อีทิสเมว ฯ  ม. ยุ. ภควํมูลิกา ฯ
ธาเรสฺสนฺตีติ  ฯ  น  โข  อนุรุทฺธา  ตถาคโต  ชนกุหนตฺถํ  น ชนลปนตฺถํ
น   ลาภสกฺการสิโลกานิสํสตฺถํ   น   อิติ   มํ  ชโน  ชานาตูติ  สาวเก
อพฺภตีเต   กาลกเต   อุปปตฺตีสุ   พฺยากโรติ   อสุ   อมุตฺร   อุปฺปนฺโน
อสุ   อมุตฺร  อุปฺปนฺโนติ  ฯ  สนฺติ  จ  โข  อนุรุทฺธา  กุลปุตฺตา  สทฺธา
โอฬารเวทา    โอฬารปามุชฺชา   เต   ตํ   สุตฺวา   ตถตฺตาย   จิตฺตํ
อุปสํหรนฺติ เตสํ ตํ อนุรุทฺธา โหติ ทีฆรตฺตํ หิตาย สุขาย ฯ
     [๑๙๙]   อิธานุรุทฺธา  ภิกฺขุ  สุณาติ  อิตฺถนฺนาโม  ภิกฺขุ  กาลกโต
โส   ภควตา     พฺยากโต   อญฺญาย   สณฺฐหีติ   น  โข  โน  ภนฺเต
ภควติ   เอวํ   โหติ   เย  อาสวา  สงฺกิเลสิกา  โปโนพฺภวิกา  สทรา
ทุกฺขวิปากา    อายตึ    ชาติชรามรณิยา   อปฺปหีนา   เต   ตถาคตสฺส
ตสฺมา  ตถาคโต  สงฺขาเยกํ  ปฏิเสวติ  สงฺขาเยกํ  อธิวาเสติ สงฺขาเยกํ
ปริวชฺเชติ   สงฺขาเยกํ   วิโนเทตีติ   โส  โข  ปนสฺส  อายสฺมา  สามํ
ทิฏฺโฐ   วา   โหติ  อนุสฺสวสุโต  วา  เอวํสีโล  โส  อายสฺมา  อโหสิ
อิติปิ   เอวํธมฺโม   โส   อายสฺมา   อโหสิ   อิติปิ   เอวํปญฺโญ   โส
อายสฺมา   อโหสิ   อิติปิ   เอวํวิหารี   โส   อายสฺมา   อโหสิ  อิติปิ
เอวํ   วิมุตฺโต   โส  อายสฺมา  อโหสิ  อิติปีติ  ฯ  โส  ตสฺส  สทฺธญฺจ
สีลญฺจ    สุตญฺจ    จาคญฺจ   ปญฺญญฺจ   อนุสฺสรนฺโต   ตถตฺตาย   จิตฺตํ
อุปสํหรติ   ฯ   เอวมฺปิ  โข  อนุรุทฺธา  ภิกฺขุโน  ผาสุวิหาโร  โหติ  ฯ
อิธานุรุทฺธา    ภิกฺขุ    สุณาติ    อิตฺถนฺนาโม   ภิกฺขุ   กาลกโต   โส
ภควตา   พฺยากโต   ปญฺจนฺนํ   โอรมฺภาคิยานํ   สญฺโญชนานํ   ปริกฺขยา
โอปปาติโก    ตตฺถ    ปรินิพฺพายี    อนาวตฺติธมฺโม   ตสฺมา   โลกาติ
โส   โข  ปนสฺส  อายสฺมา  สามํ  ทิฏฺโฐ  วา  โหติ  อนุสฺสวสุโต  วา
เอวํสีโล   โส   อายสฺมา  อโหสิ  อิติปิ  เอวํธมฺโม  ฯเปฯ  เอวํปญฺโญ
...  เอวํวิหารี  ...   เอวํ  วิมุตฺโต โส อายสฺมา อโหสิ อิติปีติ ฯ โส
ตสฺส    สทฺธญฺจ    สีลญฺจ    สุตญฺจ   จาคญฺจ   ปญฺญญฺจ   อนุสฺสรนฺโต
ตถตฺตาย   ๑-   จิตฺตํ   อุปสํหรติ  ฯ  เอวมฺปิ  โข  อนุรุทฺธา  ภิกฺขุโน
ผาสุวิหาโร โหติ ฯ
     {๑๙๙.๑}   อิธานุรุทฺธา  ภิกฺขุ  สุณาติ  อิตฺถนฺนาโม  ภิกฺขุ กาลกโต
โส   ภควตา   พฺยากโต  ติณฺณํ  สญฺโญชนานํ  ปริกฺขยา  ราคโทสโมหานํ
ตนุตฺตา    สกทาคามี   สกิเทว   อิมํ   โลกํ   อาคนฺตฺวา   ทุกฺขสฺสนฺตํ
กริสฺสตีติ  โส  โข  ปนสฺส  อายสฺมา  สามํ  ทิฏฺโฐ วา โหติ อนุสฺสวสุโต
วา  เอวํสีโล  โส อายสฺมา อโหสิ อิติปิ เอวํธมฺโม ฯเปฯ เอวํปญฺโญ ...
เอวํวิหารี  ...  เอวํ  วิมุตฺโต  โส  อายสฺมา อโหสิ อิติปีติ ฯ โส ตสฺส
สทฺธญฺจ   สีลญฺจ   สุตญฺจ   จาคญฺจ   ปญฺญญฺจ   อนุสฺสรนฺโต   ตถตฺตาย
จิตฺตํ อุปสํหรติ ฯ เอวมฺปิ โข อนุรุทฺธา ภิกฺขุโน ผาสุวิหาโร โหติ ฯ
     {๑๙๙.๒}   อิธานุรุทฺธา  ภิกฺขุ  สุณาติ  อิตฺถนฺนาโม  ภิกฺขุ กาลกโต
โส   ภควตา   พฺยากโต   ติณฺณํ   สญฺโญชนานํ   ปริกฺขยา  โสตาปนฺโน
อวินิปาตธมฺโม   นิยโต   สมฺโพธิปรายโนติ   โส  โข  ปนสฺส  อายสฺมา
สามํ  ทิฏฺโฐ  วา  โหติ อนุสฺสวสุโต ๒- วา เอวํสีโล โส อายสฺมา อโหสิ
อิติปิ เอวํธมฺโม ฯเปฯ เอวํปญฺโญ ... เอวํวิหารี ... เอวํ วิมุตฺโต โส อายสฺมา
@เชิงอรรถ:  ม.  ตทตฺถาย ฯ สพฺพตฺถ อีทิสเมว ฯ    ม. อนุสฺสาสฺสุโต ฯ
อโหสิ   อิติปีติ   ฯ   โส   ตสฺส   สทฺธญฺจ   สีลญฺจ   สุตญฺจ  จาคญฺจ
ปญฺญญฺจ    อนุสฺสรนฺโต    ตถตฺตาย    จิตฺตํ   อุปสํหรติ   ฯ   เอวมฺปิ
โข อนุรุทฺธา ภิกฺขุโน ผาสุวิหาโร โหติ ฯ
     [๒๐๐]   อิธานุรุทฺธา    ภิกฺขุนี   สุณาติ   อิตฺถนฺนามา   ภิกฺขุนี
กาลกตา   สา  ภควตา  พฺยากตา  อญฺญาย  สณฺฐหีติ  สา  โข  ปนสฺสา
ภคินี   สามํ  ทิฏฺฐา  วา  โหติ  อนุสฺสวสุตา  วา  เอวํสีลา  สา  ภคินี
อโหสิ   อิติปิ   เอวํธมฺมา   สา   ภคินี  อโหสิ  อิติปิ  เอวํปญฺญา  สา
ภคินี  อโหสิ  อิติปิ  เอวํวิหารินี  สา  ภคินี  อโหสิ  อิติปิ  เอวํ วิมุตฺตา
สา   ภคินี   อโหสิ   อิติปีติ   ฯ  สา  ตสฺสา  สทฺธญฺจ  สีลญฺจ  สุตญฺจ
จาคญฺจ    ปญฺญญฺจ    อนุสฺสรนฺตี    ตถตฺตาย    จิตฺตํ   อุปสํหรติ   ฯ
เอวมฺปิ โข อนุรุทฺธา ภิกฺขุนิยา ผาสุวิหาโร โหติ ฯ
     {๒๐๐.๑}   อิธานุรุทฺธา   ภิกฺขุนี   สุณาติ   อิตฺถนฺนามา   ภิกฺขุนี
กาลกตา     สา    ภควตา    พฺยากตา    ปญฺจนฺนํ    โอรมฺภาคิยานํ
สญฺโญชนานํ        ปริกฺขยา       โอปปาติกา       ตตฺถปรินิพฺพายินี
อนาวตฺติธมฺมา   ตสฺมา   โลกาติ   สา  โข  ปนสฺสา  ๑-  ภคินี  สามํ
ทิฏฺฐา  วา  โหติ  อนุสฺสวสุตา  วา  เอวํสีลา  สา  ภคินี  อโหสิ  อิติปิ
เอวํธมฺมา    สา    ภคินี    อโหสิ   อิติปิ   เอวํปญฺญา   สา   ภคินี
อโหสิ   อิติปิ   เอวํวิหารินี   สา   ภคินี  อโหสิ  อิติปิ  เอวํ  วิมุตฺตา
สา   ภคินี   อโหสิ   อิติปีติ   ฯ  สา  ตสฺสา  สทฺธญฺจ  สีลญฺจ  สุตญฺจ
จาคญฺจ    ปญฺญญฺจ    อนุสฺสรนฺตี    ตถตฺตาย    จิตฺตํ   อุปสํหรติ   ฯ
@เชิงอรรถ:  ม. ปน ฯ
เอวมฺปิ   โข   อนุรุทฺธา  ภิกฺขุนิยา  ผาสุวิหาโร  โหติ  ฯ  อิธานุรุทฺธา
ภิกฺขุนี    สุณาติ    อิตฺถนฺนามา    ภิกฺขุนี    กาลกตา   สา   ภควตา
พฺยากตา    ติณฺณํ   สญฺโญชนานํ   ปริกฺขยา   ราคโทสโมหานํ   ตนุตฺตา
สกทาคามินี   สกิเทว   อิมํ   โลกํ   อาคนฺตฺวา   ทุกฺขสฺสนฺตํ  กริสฺสตีติ
สา   โข   ปนสฺสา   ภคินี  สามํ  ทิฏฺฐา  วา  โหติ  อนุสฺสวสุตา  วา
เอวํสีลา  สา  ภคินี  อโหสิ  อิติปิ  เอวํธมฺมา  ฯเปฯ  เอวํปญฺญา  ...
เอวํวิหารินี  ...  เอวํ  วิมุตฺตา  สา  ภคินี  อโหสิ อิติปีติ ฯ สา ตสฺสา
สทฺธญฺจ    สีลญฺจ   สุตญฺจ   จาคญฺจ   ปญฺญญฺจ   อนุสฺสรนฺตี   ตถตฺตาย
จิตฺตํ อุปสํหรติ ฯ เอวมฺปิ โข อนุรุทฺธา ภิกฺขุนิยา ผาสุวิหาโร โหติ ฯ
     {๒๐๐.๒}   อิธานุรุทฺธา   ภิกฺขุนี   สุณาติ   อิตฺถนฺนามา   ภิกฺขุนี
กาลกตา   สา   ภควตา   พฺยากตา    ติณฺณํ   สญฺโญชนานํ   ปริกฺขยา
โสตาปนฺนา    อวินิปาตธมฺมา    นิยตา   สมฺโพธิปรายนาติ   สา   โข
ปนสฺสา  ภคินี  สามํ  ทิฏฺฐา  วา  โหติ  อนุสฺสวสุตา  วา  เอวํสีลา สา
ภคินี  อโหสิ  อิติปิ  เอวํธมฺมา  ฯเปฯ  เอวํปญฺญา ... เอวํวิหารินี ...
เอวํ   วิมุตฺตา   สา   ภคินี   อโหสิ  อิติปีติ  ฯ  สา  ตสฺสา  สทฺธญฺจ
สีลญฺจ    สุตญฺจ    จาคญฺจ    ปญฺญญฺจ   อนุสฺสรนฺตี   ตถตฺตาย   จิตฺตํ
อุปสํหรติ ฯ เอวมฺปิ โข อนุรุทฺธา ภิกฺขุนิยา ผาสุวิหาโร โหติ ฯ
     [๒๐๑]   อิธานุรุทฺธา   อุปาสโก   สุณาติ  อิตฺถนฺนาโม  อุปาสโก
กาลกโต     โส    ภควตา    พฺยากโต    ปญฺจนฺนํ    โอรมฺภาคิยานํ
สญฺโญชนานํ   ปริกฺขยา   อุปปาติโก   ตตฺถ   ปรินิพฺพายี  อนาวตฺติธมฺโม
ตสฺมา   โลกาติ   โส  โข  ปนสฺส  อายสฺมา  สามํ  ทิฏฺโฐ  วา  โหติ
อนุสฺสวสุโต   วา   เอวํสีโล   โส  อายสฺมา  อโหสิ  อิติปิ  เอวํธมฺโม
โส   อายสฺมา   อโหสิ   อิติปิ   เอวํปญฺโญ   โส   อายสฺมา   อโหสิ
อิติปิ   เอวํวิหารี   โส   อายสฺมา   อโหสิ  อิติปิ  เอวํ  วิมุตฺโต  โส
อายสฺมา   อโหสิ   อิติปีติ   ฯ   โส   ตสฺส   สทฺธญฺจ  สีลญฺจ  สุตญฺจ
จาคญฺจ    ปญฺญญฺจ    อนุสฺสรนฺโต    ตถตฺตาย   จิตฺตํ   อุปสํหรติ   ฯ
เอวมฺปิ โข อนุรุทฺธา อุปาสกสฺส ผาสุวิหาโร โหติ ฯ
     {๒๐๑.๑}   อิธานุรุทฺธา  อุปาสโก  สุณาติ  อิตฺถนฺนาโม  อุปาสโก
กาลกโต    โส   ภควตา   พฺยากโต   ติณฺณํ   สญฺโญชนานํ   ปริกฺขยา
ราคโทสโมหานํ   ตนุตฺตา   สกทาคามี   สกิเทว  อิมํ  โลกํ  อาคนฺตฺวา
ทุกฺขสฺสนฺตํ  กริสฺสตีติ  โส  โข  ปนสฺส  อายสฺมา  สามํ  ทิฏฺโฐ วา โหติ
อนุสฺสวสุโต  วา  เอวํสีโล  โส  อายสฺมา  อโหสิ อิติปิ เอวํธมฺโม ฯเปฯ
เอวํปญฺโญ  ...  เอวํวิหารี  ...  เอวํ  วิมุตฺโต  โส  อายสฺมา อโหสิ
อิติปีติ   ฯ   โส   ตสฺส   สทฺธญฺจ   สีลญฺจ   สุตญฺจ  จาคญฺจ  ปญฺญญฺจ
อนุสฺสรนฺโต   ตถตฺตาย   จิตฺตํ   อุปสํหรติ   ฯ  เอวมฺปิ  โข  อนุรุทฺธา
อุปาสกสฺส ผาสุวิหาโร โหติ ฯ
     {๒๐๑.๒}   อิธานุรุทฺธา    อุปาสโก    สุณาติ    อิตฺถนฺนาโม
อุปาสโก    กาลกโต   โส   ภควตา   พฺยากโต   ติณฺณํ   สญฺโญชนานํ
ปริกฺขยา    โสตาปนฺโน    อวินิปาตธมฺโม    นิยโต   สมฺโพธิปรายโนติ
โส   โข   ปนสฺส   อายสฺมา   สามํ   ทิฏฺโฐ  วา  โหติ  อนุสฺสวสุโต
วา     เอวํสีโล    โส    อายสฺมา    อโหสิ    อิติปิ    เอวํธมฺโม
ฯเปฯ  เอวํปญฺโญ  ...  เอวํวิหารี  ...  เอวํ  วิมุตฺโต  โส อายสฺมา
อโหสิ   อิติปีติ   ฯ   โส   ตสฺส   สทฺธญฺจ   สีลญฺจ   สุตญฺจ  จาคญฺจ
ปญฺญญฺจ    อนุสฺสรนฺโต    ตถตฺตาย    จิตฺตํ   อุปสํหรติ   ฯ   เอวมฺปิ
โข อนุรุทฺธา อุปาสกสฺส ผาสุวิหาโร โหติ ฯ
     [๒๐๒]   อิธานุรุทฺธา   อุปาสิกา   สุณาติ  อิตฺถนฺนามา  อุปาสิกา
กาลกตา     สา    ภควตา    พฺยากตา    ปญฺจนฺนํ    โอรมฺภาคิยานํ
สญฺโญชนานํ   ปริกฺขยา   โอปปาติกา  ตตฺถ  ปรินิพฺพายินี  อนาวตฺติธมฺมา
ตสฺมา   โลกาติ   สา   โข   ปนสฺสา  ภคินี  สามํ  ทิฏฺฐา  วา  โหติ
อนุสฺสวสุตา  วา  เอวํสีลา  สา  ภคินี  อโหสิ  อิติปิ  เอวํธมฺมา  ฯเปฯ
เอวํปญฺญา  ...  เอวํวิหารินี ... เอวํ วิมุตฺตา สา ภคินี อโหสิ อิติปีติ ฯ
สา   ตสฺสา   สทฺธญฺจ   สีลญฺจ   สุตญฺจ   จาคญฺจ  ปญฺญญฺจ  อนุสฺสรนฺตี
ตถตฺตาย   จิตฺตํ   อุปสํหรติ   ฯ   เอวมฺปิ   โข  อนุรุทฺธา  อุปาสิกาย
ผาสุวิหาโร โหติ ฯ
     {๒๐๒.๑}   อิธานุรุทฺธา  อุปาสิกา  สุณาติ  อิตฺถนฺนามา  อุปาสิกา
กาลกตา    สา   ภควตา   พฺยากตา   ติณฺณํ   สญฺโญชนานํ   ปริกฺขยา
ราคโทสโมหานํ   ตนุตฺตา   สกทาคามินี  สกิเทว  อิมํ  โลกํ  อาคนฺตฺวา
ทุกฺขสฺสนฺตํ  กริสฺสตีติ  สา  โข  ปนสฺสา  ภคินี  สามํ  ทิฏฺฐา  วา  โหติ
อนุสฺสวสุตา  วา  เอวํสีลา  สา  ภคินี  อโหสิ  อิติปิ  เอวํธมฺมา  ฯเปฯ
เอวํปญฺญา  ...  เอวํวิหารินี ... เอวํ วิมุตฺตา สา ภคินี อโหสิ อิติปีติ ฯ
สา   ตสฺสา   สทฺธญฺจ   สีลญฺจ   สุตญฺจ   จาคญฺจ  ปญฺญญฺจ  อนุสฺสรนฺตี
ตถตฺตาย   จิตฺตํ   อุปสํหรติ   ฯ   เอวมฺปิ   โข  อนุรุทฺธา  อุปาสิกาย
ผาสุวิหาโร โหติ ฯ
     {๒๐๒.๒}   อิธานุรุทฺธา    อุปาสิกา    สุณาติ    อิตฺถนฺนามา
อุปาสิกา    กาลกตา   สา   ภควตา   พฺยากตา   ติณฺณํ   สญฺโญชนานํ
ปริกฺขยา    โสตาปนฺนา    อวินิปาตธมฺมา    นิยตา   สมฺโพธิปรายนาติ
สา   โข   ปนสฺสา   ภคินี  สามํ  ทิฏฺฐา  วา  โหติ  อนุสฺสวสุตา  วา
เอวํสีลา   สา   ภคินี   อโหสิ   อิติปิ   เอวํธมฺมา  สา  ภคินี  อโหสิ
อิติปิ  [๑]-  เอวํวิหารินี  สา  ภคินี  อโหสิ  อิติปิ  เอวํ  วิมุตฺตา  สา
ภคินี   อโหสิ   อิติปีติ   ฯ   สา   ตสฺสา   สทฺธญฺจ   สีลญฺจ   สุตญฺจ
จาคญฺจ    ปญฺญญฺจ    อนุสฺสรนฺตี    ตถตฺตาย    จิตฺตํ   อุปสํหรติ   ฯ
เอวมฺปิ โข อนุรุทฺธา อุปาสิกาย ผาสุวิหาโร โหติ ฯ
     {๒๐๒.๓}   อิติ   โข   อนุรุทฺธา   ตถาคโต  น  ชนกุหนตฺถํ  น
ชนลปนตฺถํ    น    ลาภสกฺการสิโลกานิสํสตฺถํ    น    อิติ   มํ   ชโน
ชานาตูติ   สาวเก   อพฺภตีเต   ๒-   กาลกเต   อุปปตฺตีสุ  พฺยากโรติ
อสุ  อมุตฺร  อุปฺปนฺโน  ๓-  อสุ  อมุตฺร  อุปฺปนฺโนติ  ๔-  ฯ  สนฺติ  ๕-
โข    อนุรุทฺธา    กุลปุตฺตา   สทฺธา   โอฬารเวทา   โอฬารปามุชฺชา
เต   ตํ   สุตฺวา  ตถตฺตาย  จิตฺตํ  อุปสํหรนฺติ  เตสนฺตํ  อนุรุทฺธา  โหติ
ทีฆรตฺตํ หิตาย สุขายาติ ฯ
     อิทมโวจ    ภควา    อตฺตมโน   อายสฺมา   อนุรุทฺโธ   ภควโต
ภาสิตํ อภินนฺทีติ ฯ
                 นฬกปานสุตฺตํ นิฏฺฐิตํ อฏฺฐมํ ฯ
                      ----------
@เชิงอรรถ:  โป. ม. เอวํปญฺญา สา ภคินี อโหสิ อิติปิ ฯ    โป. อารภติ เต ฯ
@๓-๔ โป. ยุ. อุปปนฺโน ฯ    ม. ยุ. สนฺติ จ โข ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๑๓ หน้าที่ ๒๐๓-๒๑๓. https://84000.org/tipitaka/read/pali_read.php?B=13&A=4143&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=13&A=4143&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=13&item=195&items=8              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=13&siri=18              ศึกษาอรรถกถานี้ได้ที่ :- https://84000.org/tipitaka/attha/attha.php?b=13&i=195              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=9&A=3320              The Pali Atthakatha in Roman :- https://84000.org/tipitaka/atthapali/read_rm.php?B=9&A=3320              สารบัญพระไตรปิฎกเล่มที่ ๑๓ https://84000.org/tipitaka/read/?index_13 https://84000.org/tipitaka/english/?index_13

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]