ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๕ ภาษาบาลี อักษรไทย พระวินัยปิฎกเล่มที่ ๕ วินย. มหาวคฺโค (๒)

                              โกสมฺพิกฺขนฺธกํ
     [๒๓๘]   เตน   สมเยน   พุทฺโธ   ภควา   โกสมฺพิยํ   วิหรติ
โฆสิตาราเม   ฯ   เตน   โข  ปน  สมเยน  อญฺญตโร  ภิกฺขุ  อาปตฺตึ
อาปนฺโน   โหติ   ฯ   โส   ตสฺสา   อาปตฺติยา   อาปตฺติทิฏฺฐิ   โหติ
อญฺเญ    ภิกฺขู    ตสฺสา    อาปตฺติยา   อนาปตฺติทิฏฺฐิโน   โหนฺติ   ฯ
โส    อปเรน    สมเยน   ตสฺสา   อาปตฺติยา   อนาปตฺติทิฏฺฐิ   โหติ
อญฺเญ    ภิกฺขู    ตสฺสา    อาปตฺติยา    อาปตฺติทิฏฺฐิโน   โหนฺติ   ฯ
อถโข  เต  ภิกฺขู  ตํ  ภิกฺขุํ  เอตทโวจุํ อาปตฺตึ ตฺวํ *- อาวุโส อาปนฺโน
ปสฺสเสตํ อาปตฺตินฺติ ฯ นตฺถิ เม อาวุโส อาปตฺติ ยมหํ ปสฺเสยฺยนฺติ ฯ
     {๒๓๘.๑}   อถโข  เต  ภิกฺขู  สามคฺคึ  ลภิตฺวา ตํ ภิกฺขุํ อาปตฺติยา
อทสฺสเน  อุกฺขิปึสุ  ฯ  โส  จ  ภิกฺขุ พหุสฺสุโต โหติ อาคตาคโม ธมฺมธโร
วินยธโร   มาติกาธโร   ปณฺฑิโต   พฺยตฺโต   เมธาวี  ลชฺชี  กุกฺกุจฺจโก
สิกฺขากาโม    ฯ   อถโข   โส   ภิกฺขุ   สนฺทิฏฺเฐ   สมฺภตฺเต   ภิกฺขู
อุปสงฺกมิตฺวา   เอตทโวจ   อนาปตฺติ   เอสา  อาวุโส  เนสา  อาปตฺติ
อนาปนฺโนมฺหิ    นมฺหิ    อาปนฺโน    อนุกฺขิตฺโตมฺหิ    นมฺหิ   อุกฺขิตฺโต
อธมฺมิเกนมฺหิ    กมฺเมน    อุกฺขิตฺโต   กุปฺเปน   อฏฺฐานารเหน   โหถ
เม   อายสฺมนฺโต  ธมฺมโต  วินยโต  ปกฺขาติ  ฯ  อลภิ  โข  โส  ภิกฺขุ
สนฺทิฏฺเฐ  สมฺภตฺเต  ภิกฺขู  ปกฺเข  ฯ  ชานปทานํ  [๑]-  จ  สนฺทิฏฺฐานํ
สมฺภตฺตานํ   ภิกฺขูนํ   สนฺติเก   ทูตํ  ปาเหสิ  อนาปตฺติ  เอสา  อาวุโส
@เชิงอรรถ:  ม. ยุ. ปิสทฺโท ฯ
@* มีการแก้ไขคำ ตวํ เป็น ตฺวํ
เนสา    อาปตฺติ    อนาปนฺโนมฺหิ    นมฺหิ    อาปนฺโน   อนุกฺขิตฺโตมฺหิ
นมฺหิ     อุกฺขิตฺโต    อธมฺมิเกนมฺหิ    กมฺเมน    อุกฺขิตฺโต    กุปฺเปน
อฏฺฐานารเหน   โหนฺตุ  เม  อายสฺมนฺโต  ธมฺมโต  วินยโต  ปกฺขาติ  ฯ
อลภิ โข โส ภิกฺขุ ชานปเทปิ สนฺทิฏฺเฐ สมฺภตฺเต ภิกฺขู ปกฺเข ฯ
     {๒๓๘.๒}   อถโข  เต อุกฺขิตฺตานุวตฺตกา ภิกฺขู เยน อุกฺเขปกา ภิกฺขู
เตนุปสงฺกมึสุ   อุปสงฺกมิตฺวา   อุกฺเขปเก   ภิกฺขู   เอตทโวจุํ  อนาปตฺติ
เอสา   อาวุโส   เนสา   อาปตฺติ   อนาปนฺโน   เอโส  ภิกฺขุ  เนโส
ภิกฺขุ   อาปนฺโน   อนุกฺขิตฺโต   เอโส   ภิกฺขุ   เนโส  ภิกฺขุ  อุกฺขิตฺโต
อธมฺมิเกน กมฺเมน อุกฺขิตฺโต กุปฺเปน อฏฺฐานารเหนาติ ฯ
     {๒๓๘.๓}   เอวํ  วุตฺเต  อุกฺเขปกา  ภิกฺขู  อุกฺขิตฺตานุวตฺตเก ภิกฺขู
เอตทโวจุํ  อาปตฺติ  เอสา  อาวุโส  เนสา  อนาปตฺติ  อาปนฺโน  เอโส
ภิกฺขุ   เนโส   ภิกฺขุ  อนาปนฺโน  อุกฺขิตฺโต  เอโส  ภิกฺขุ  เนโส  ภิกฺขุ
อนุกฺขิตฺโต   ธมฺมิเกน   กมฺเมน   อุกฺขิตฺโต  อกุปฺเปน  ฐานารเหน  มา
โข  ตุเมฺห  อายสฺมนฺโต เอตํ อุกฺขิตฺตกํ ภิกฺขุํ อนุวตฺติตฺถ อนุปริวาเรถาติ ฯ
เอวํปิ    โข    เต   อุกฺขิตฺตานุวตฺตกา   ภิกฺขู   อุกฺเขปเกหิ   ภิกฺขูหิ
วุจฺจมานา ตเถว ตํ อุกฺขิตฺตกํ ภิกฺขุํ อนุวตฺตึสุ อนุปริวาเรสุํ ฯ
     [๒๓๙]   อถโข   อญฺญตโร   ภิกฺขุ   เยน   ภควา  เตนุปสงฺกมิ
อุปสงฺกมิตฺวา   ภควนฺตํ   อภิวาเทตฺวา   เอกมนฺตํ   นิสีทิ  ฯ  เอกมนฺตํ
นิสินฺโน   โข   โส   ภิกฺขุ  ภควนฺตํ  เอตทโวจ  อิธ  ภนฺเต  อญฺญตโร
ภิกฺขุ   อาปตฺตึ   อาปนฺโน  อโหสิ  โส  ตสฺสา  อาปตฺติยา  อาปตฺติทิฏฺฐิ
อโหสิ     อญฺเญ     ภิกฺขู    ตสฺสา    อาปตฺติยา    อนาปตฺติทิฏฺฐิโน
อเหสุํ    โส   อปเรน   สมเยน   ตสฺสา   อาปตฺติยา   อนาปตฺติทิฏฺฐิ
อโหสิ    อญฺเญ   ภิกฺขู   ตสฺสา   อาปตฺติยา   อาปตฺติทิฏฺฐิโน   อเหสุํ
อถโข   เต   ภนฺเต   ภิกฺขู   ตํ   ภิกฺขุํ   เอตทโวจุํ   อาปตฺตึ   ตฺวํ
อาวุโส    อาปนฺโน    ปสฺสเสตํ    อาปตฺตินฺติ   นตฺถิ   เม   อาวุโส
อาปตฺติ   ยมหํ   ปสฺเสยฺยนฺติ   อถโข   เต   ภนฺเต   ภิกฺขู   สามคฺคึ
ลภิตฺวา   ตํ   ภิกฺขุํ   อาปตฺติยา   อทสฺสเน   อุกฺขิปึสุ  โส  จ  ภนฺเต
ภิกฺขุ    พหุสฺสุโต    อาคตาคโม    ธมฺมธโร   วินยธโร   มาติกาธโร
ปณฺฑิโต     พฺยตฺโต     เมธาวี    ลชฺชี    กุกฺกุจฺจโก    สิกฺขากาโม
อถโข   โส   ภนฺเต   ภิกฺขุ   สนฺทิฏฺเฐ  สมฺภตฺเต  ภิกฺขู  อุปสงฺกมิตฺวา
เอตทโวจ   อนาปตฺติ   เอสา   อาวุโส  เนสา  อาปตฺติ  อนาปนฺโนมฺหิ
นมฺหิ    อาปนฺโน    อนุกฺขิตฺโตมฺหิ    นมฺหิ    อุกฺขิตฺโต   อธมฺมิเกนมฺหิ
กมฺเมน   อุกฺขิตฺโต   กุปฺเปน   อฏฺฐานารเหน   โหถ  เม  อายสฺมนฺโต
ธมฺมโต  วินยโต  ปกฺขาติ  อลภิ  โข  โส ภนฺเต ภิกฺขุ สนฺทิฏฺเฐ สมฺภตฺเต
ภิกฺขู   ปกฺเข   ชานปทานํปิ   สนฺทิฏฺฐานํ   สมฺภตฺตานํ   [๑]-  สนฺติเก
ทูตํ   ปาเหสิ  อนาปตฺติ  เอสา  อาวุโส  เนสา  อาปตฺติ  อนาปนฺโนมฺหิ
นมฺหิ    อาปนฺโน    อนุกฺขิตฺโตมฺหิ    นมฺหิ    อุกฺขิตฺโต   อธมฺมิเกนมฺหิ
กมฺเมน   อุกฺขิตฺโต   กุปฺเปน   อฏฺฐานารเหน  โหนฺตุ  เม  อายสฺมนฺโต
ธมฺมโต  วินยโต  ปกฺขาติ  อลภิ  โข โส ภนฺเต ภิกฺขุ ชานปเทปิ สนฺทิฏฺเฐ
@เชิงอรรถ:  ม. ภิกฺขูนํ ฯ
สมฺภตฺเต ภิกฺขู ปกฺเข
     {๒๓๙.๑}   อถโข   เต   ภนฺเต  อุกฺขิตฺตานุวตฺตกา  ภิกฺขู  เยน
อุกฺเขปกา    ภิกฺขู    เตนุปสงฺกมึสุ   อุปสงฺกมิตฺวา   อุกฺเขปเก   ภิกฺขู
เอตทโวจุํ   อนาปตฺติ   เอสา   อาวุโส   เนสา   อาปตฺติ  อนาปนฺโน
เอโส   ภิกฺขุ  เนโส  ภิกฺขุ  อาปนฺโน  อนุกฺขิตฺโต  เอโส  ภิกฺขุ  เนโส
ภิกฺขุ     อุกฺขิตฺโต     อธมฺมิเกน     กมฺเมน    อุกฺขิตฺโต    กุปฺเปน
อฏฺฐานารเหนาติ   เอวํ   วุตฺเต   [๑]-   ภนฺเต   อุกฺเขปกา   ภิกฺขู
อุกฺขิตฺตานุวตฺตเก    ภิกฺขู    เอตทโวจุํ    อาปตฺติ    เอสา   อาวุโส
เนสา   อนาปตฺติ   อาปนฺโน   เอโส   ภิกฺขุ  เนโส  ภิกฺขุ  อนาปนฺโน
อุกฺขิตฺโต   เอโส   ภิกฺขุ   เนโส  ภิกฺขุ  อนุกฺขิตฺโต  ธมฺมิเกน  กมฺเมน
อุกฺขิตฺโต   อกุปฺเปน   ฐานารเหน  มา  โข  ตุเมฺห  อายสฺมนฺโต  เอตํ
อุกฺขิตฺตกํ   ภิกฺขุํ   อนุวตฺติตฺถ  อนุปริวาเรถาติ  เอวํปิ  โข  เต  ภนฺเต
อุกฺขิตฺตานุวตฺตกา    ภิกฺขู    อุกฺเขปเกหิ   ภิกฺขูหิ   วุจฺจมานา   ตเถว
ตํ อุกฺขิตฺตกํ ภิกฺขุํ อนุวตฺตนฺติ อนุปริวาเรนฺตีติ ฯ
     {๒๓๙.๒}   อถโข  ภควา  ภินฺโน  ภิกฺขุสงฺโฆ  ภินฺโน  ภิกฺขุสงฺโฆติ
อุฏฺฐายาสนา    เยน   อุกฺเขปกา   ภิกฺขู   เตนุปสงฺกมิ   อุปสงฺกมิตฺวา
ปญฺญตฺเต   อาสเน   นิสีทิ   ฯ   นิสชฺช  โข  ภควา  อุกฺเขปเก  ภิกฺขู
เอตทโวจ   มา   โข   ตุเมฺห   ภิกฺขเว  ปฏิภาติ  โน  ปฏิภาติ  โนติ
ยสฺมึ วา ตสฺมึ วา ภิกฺขุํ อุกฺขิปิตพฺพํ มญฺญิตฺถ ฯ
     {๒๓๙.๓}   อิธ    ปน   ภิกฺขเว   ภิกฺขุ   อาปตฺตึ   อาปนฺโน
โหติ     ฯ     โส    ตสฺสา    อาปตฺติยา    อนาปตฺติทิฏฺฐิ    โหติ
อญฺเญ       ภิกฺขู       ตสฺสา       อาปตฺติยา      อาปตฺติทิฏฺฐิโน
@เชิงอรรถ:  โป. ม. เต ฯ
โหนฺติ   ฯ   เต   เจ  ภิกฺขเว  ภิกฺขู   ตํ  ภิกฺขุํ  เอวํ  ชานนฺติ  อยํ
โข    อายสฺมา   พหุสฺสุโต   ฯเปฯ   สิกฺขากาโม   สเจ   มยํ   อิมํ
ภิกฺขุํ   อาปตฺติยา   อทสฺสเน   อุกฺขิปิสฺสาม   น   มยํ  อิมินา  ภิกฺขุนา
สทฺธึ   อุโปสถํ   กริสฺสาม   วินา   อิมินา  ภิกฺขุนา  อุโปสถํ  กริสฺสาม
ภวิสฺสติ    สงฺฆสฺส    ตโตนิทานํ   ภณฺฑนํ   กลโห   วิคฺคโห   วิวาโท
สงฺฆเภโท   สงฺฆราชิ   สงฺฆววตฺถานํ  สงฺฆนานากรณนฺติ  ฯ  เภทครุเกหิ
ภิกฺขเว ภิกฺขูหิ น โส ภิกฺขุ อาปตฺติยา อทสฺสเน อุกฺขิปิตพฺโพ ฯ
     {๒๓๙.๔}   อิธ  ปน  ภิกฺขเว  ภิกฺขุ  อาปตฺตึ อาปนฺโน โหติ ฯ โส
ตสฺสา    อาปตฺติยา    อนาปตฺติทิฏฺฐิ    โหติ   อญฺเญ   ภิกฺขู   ตสฺสา
อาปตฺติยา  อาปตฺติทิฏฺฐิโน  โหนฺติ  ฯ  เต  เจ  ภิกฺขเว  ภิกฺขู  ตํ ภิกฺขุํ
เอวํ   ชานนฺติ   อยํ   โข   อายสฺมา   พหุสฺสุโต  ฯเปฯ  สิกฺขากาโม
สเจ   มยํ   อิมํ   ภิกฺขุํ   อาปตฺติยา   อทสฺสเน  อุกฺขิปิสฺสาม  น  มยํ
อิมินา    ภิกฺขุนา    สทฺธึ    ปวาเรสฺสาม    วินา   อิมินา   ภิกฺขุนา
ปวาเรสฺสาม   น   มยํ   อิมินา   ภิกฺขุนา   สทฺธึ  สงฺฆกมฺมํ  กริสฺสาม
วินา   อิมินา   ภิกฺขุนา   สงฺฆกมฺมํ  กริสฺสาม  น  มยํ  อิมินา  ภิกฺขุนา
สทฺธึ   อาสเน   นิสีทิสฺสาม  วินา  อิมินา  ภิกฺขุนา  อาสเน  นิสีทิสฺสาม
น   มยํ   อิมินา   ภิกฺขุนา  สทฺธึ  ยาคุปาเน  นิสีทิสฺสาม  วินา  อิมินา
ภิกฺขุนา   ยาคุปาเน   นิสีทิสฺสาม   น   มยํ   อิมินา   ภิกฺขุนา   สทฺธึ
ภตฺตคฺเค   นิสีทิสฺสาม   วินา   อิมินา   ภิกฺขุนา   ภตฺตคฺเค  นิสีทิสฺสาม
น   มยํ   อิมินา   ภิกฺขุนา  สทฺธึ  เอกจฺฉนฺเน  วสิสฺสาม  วินา  อิมินา
ภิกฺขุนา   เอกจฺฉนฺเน   วสิสฺสาม   น   มยํ   อิมินา   ภิกฺขุนา   สทฺธึ
ยถาวุฑฺฒํ    อภิวาทนํ   ปจฺจุฏฺฐานํ   อญฺชลิกมฺมํ   สามีจิกมฺมํ   กริสฺสาม
วินา   อิมินา   ภิกฺขุนา   ยถาวุฑฺฒํ   อภิวาทนํ   ปจฺจุฏฺฐานํ  อญฺชลิกมฺมํ
สามีจิกมฺมํ     กริสฺสาม    ภวิสฺสติ    สงฺฆสฺส    ตโตนิทานํ    ภณฺฑนํ
กลโห    วิคฺคโห    วิวาโท    สงฺฆเภโท    สงฺฆราชิ   สงฺฆววตฺถานํ
สงฺฆนานากรณนฺติ   ฯ   เภทครุเกหิ   ภิกฺขเว   ภิกฺขูหิ   น  โส  ภิกฺขุ
อาปตฺติยา อทสฺสเน อุกฺขิปิตพฺโพติ ฯ
     {๒๓๙.๕}   อถโข    ภควา   อุกฺเขปกานํ   ภิกฺขูนํ   เอตมตฺถํ
ภาสิตฺวา      อุฏฺฐายาสนา      เยน     อุกฺขิตฺตานุวตฺตกา     ภิกฺขู
เตนุปสงฺกมิ    อุปสงฺกมิตฺวา   ปญฺญตฺเต   อาสเน   นิสีทิ   ฯ   นิสชฺช
โข   ภควา   อุกฺขิตฺตานุวตฺตเก   ภิกฺขู   เอตทโวจ   มา  โข  ตุเมฺห
ภิกฺขเว   อาปตฺตึ   อาปชฺชิตฺวา   นมฺห   อาปนฺนา   นมฺห   อาปนฺนาติ
อาปตฺตึ น ปฏิกาตพฺพํ มญฺญิตฺถ ฯ
     {๒๓๙.๖}   อิธ  ปน  ภิกฺขเว  ภิกฺขุ  อาปตฺตึ  อาปนฺโน  โหติ  ฯ
โส   ตสฺสา   อาปตฺติยา   อนาปตฺติทิฏฺฐิ   โหติ   อญฺเญ  ภิกฺขู  ตสฺสา
อาปตฺติยา  อาปตฺติทฏฺฐิโน  โหนฺติ  ฯ  โส  เจ  ภิกฺขเว  ภิกฺขุ เต ภิกฺขู
เอวํ  ชานาติ  อิเม  โข  อายสฺมนฺโต  ๑-  พหุสฺสุตา ฯเปฯ สิกฺขากามา
นาลํ  มมํ  วา  การณา  อญฺเญสํ  วา  การณา ฉนฺทา โทสา โมหา ภยา
อคตึ   คนฺตุํ   สเจ  มํ  อิเม  ภิกฺขู  อาปตฺติยา  อทสฺสเน  อุกฺขิปิสฺสนฺติ
น   มยา   สทฺธึ   อุโปสถํ   กริสฺสนฺติ  วินา  มยา  อุโปสถํ  กริสฺสนฺติ
@เชิงอรรถ:  สี. ยุ. อายสฺมนฺตา ฯ
ภวิสฺสติ    สงฺฆสฺส    ตโตนิทานํ   ภณฺฑนํ   กลโห   วิคฺคโห   วิวาโท
สงฺฆเภโท   สงฺฆราชิ   สงฺฆววตฺถานํ  สงฺฆนานากรณนฺติ  ฯ  เภทครุเกน
ภิกฺขเว ภิกฺขุนา ปเรสํปิ สทฺธาย สา อาปตฺติ เทเสตพฺพา ฯ
     {๒๓๙.๗}   อิธ  ปน  ภิกฺขเว  ภิกฺขุ  อาปตฺตึ  อาปนฺโน  โหติ  ฯ
โส   ตสฺสา   อาปตฺติยา   อนาปตฺติทิฏฺฐิ   โหติ   อญฺเญ  ภิกฺขู  ตสฺสา
อาปตฺติยา   อาปตฺติทิฏฺฐิโน   โหนฺติ   ฯ  โส  เจ  ภิกฺขเว  ภิกฺขุ  เต
ภิกฺขู   เอวํ   ชานาติ   อิเม   โข   อายสฺมนฺโต   พหุสฺสุตา   ฯเปฯ
สิกฺขากามา    นาลํ    มมํ   วา   การณา   อญฺเญสํ   วา   การณา
ฉนฺทา  โทสา  โมหา  ภยา  อคตึ  คนฺตุํ  สเจ  มํ อิเม ภิกฺขู อาปตฺติยา
อทสฺสเน   อุกฺขิปิสฺสนฺติ   น   มยา   สทฺธึ   ปวาเรสฺสนฺติ  วินา  มยา
ปวาเรสฺสนฺติ   น   มยา   สทฺธึ   สงฺฆกมฺมํ   กริสฺสนฺติ   วินา   มยา
สงฺฆกมฺมํ   กริสฺสนฺติ   น   มยา   สทฺธึ   อาสเน   นิสีทิสฺสนฺติ   วินา
มยา   อาสเน   นิสีทิสฺสนฺติ   น   มยา   สทฺธึ  ยาคุปาเน  นิสีทิสฺสนฺติ
วินา    มยา   ยาคุปาเน   นิสีทิสฺสนฺติ   น   มยา   สทฺธึ   ภตฺตคฺเค
นิสีทิสฺสนฺติ    วินา   มยา   ภตฺตคฺเค   นิสีทิสฺสนฺติ   น   มยา   สทฺธึ
เอกจฺฉนฺเน    วสิสฺสนฺติ    วินา   มยา   เอกจฺฉนฺเน   วสิสฺสนฺติ   น
มยา   สทฺธึ   ยถาวุฑฺฒํ   อภิวาทนํ   ปจฺจุฏฺฐานํ  อญฺชลิกมฺมํ  สามีจิกมฺมํ
กริสฺสนฺติ   วินา   มยา   ยถาวุฑฺฒํ   อภิวาทนํ   ปจฺจุฏฺฐานํ  อญฺชลิกมฺมํ
สามีจิกมฺมํ     กริสฺสนฺติ    ภวิสฺสติ    สงฺฆสฺส    ตโตนิทานํ    ภณฺฑนํ
กลโห    วิคฺคโห    วิวาโท    สงฺฆเภโท    สงฺฆราชิ   สงฺฆววตฺถานํ
สงฺฆนานากรณนฺติ    ฯ    เภทครุเกน    ภิกฺขเว    ภิกฺขุนา   ปเรสํปิ
สทฺธาย  สา  อาปตฺติ  เทเสตพฺพาติ  ฯ  อถโข ภควา อุกฺขิตฺตานุวตฺตกานํ
ภิกฺขูนํ เอตมตฺถํ ภาสิตฺวา อุฏฺฐายาสนา ปกฺกามิ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๕ หน้าที่ ๓๑๒-๓๑๙. https://84000.org/tipitaka/read/pali_read.php?B=5&A=6461&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=5&A=6461&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=5&item=238&items=2              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=5&siri=58              ศึกษาอรรถกถานี้ได้ที่ :- https://84000.org/tipitaka/attha/attha.php?b=5&i=238              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=3&A=5476              The Pali Atthakatha in Roman :- https://84000.org/tipitaka/atthapali/read_rm.php?B=3&A=5476              สารบัญพระไตรปิฎกเล่มที่ ๕ https://84000.org/tipitaka/read/?index_5 https://84000.org/tipitaka/english/?index_5

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]