p1 TIPITAKA PALI ROMAN Volume 1

Vinayapiṭake mahāvibhaṅgassa paṭhamo bhāgo --------- namo tassa bhagavato arahato sammāsambuddhassa. Verañjakaṇḍaṃ [1] Tena samayena buddho bhagavā verañjāyaṃ viharati naḷerupucimandamūle mahatā bhikkhusaṅghena saddhiṃ pañcamattehi bhikkhusatehi . assosi kho verañjo brāhmaṇo samaṇo khalu bho gotamo sakyaputto sakyakulā pabbajito verañjāyaṃ viharati naḷerupucimandamūle mahatā bhikkhusaṅghena saddhiṃ pañcamattehi bhikkhusatehi . taṃ kho pana bhavantaṃ gotamaṃ evaṃ kalyāṇo kittisaddo abbhuggato itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavāti so imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedeti so dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāseti sādhu kho pana tathārūpānaṃ arahataṃ dassanaṃ hotīti.

The Pali Tipitaka in Roman Character Volume 1 Page 1. http://84000.org/tipitaka/pitaka_item/read_page.php?book=1&page=1&pages=1&edition=roman Read this seperated by Index :- https://84000.org/tipitaka/pitaka_item/roman_read.php?B=1&A=1&pagebreak=1 https://84000.org/tipitaka/roman/roman_line.php?B=1&A=1&pagebreak=1#p1 Contents of The Tipitaka Volume 1 :- https://84000.org/tipitaka/read/?index_1 https://84000.org/tipitaka/english/?index_1