Suttantapiṭake khuddakanikāyassa
vimānavatthu
--------
namo tassa bhagavato arahato sammāsambuddhassa.
Paṭhamo pīṭhavaggo
[1] /vimāna./ |1.1| Pīṭhante sovaṇṇamayaṃ uḷāraṃ
manojavaṃ gacchati yenakāmaṃ
alaṅkate mālyadhare 1- suvatthe
obhāsasi vijjurivabbhakūṭaṃ
|1.2| kena tetādiso vaṇṇo kena te idhamijjhati
uppajjanti ca te bhogā ye keci manaso piyā
|1.3| pucchāmi taṃ devi mahānubhāve
manussabhūtā kimakāsi puññaṃ
kenāsi evañjalitānubhāvā
vaṇṇo ca te sabbadisā pabhāsatīti.
|1.4| Sā devatā attamanā moggallānena pucchitā
@Footnote: 1 yuropiyapotthake malyadhare .pe.
Pañhaṃ puṭṭhā viyākāsi yassa kammassidaṃ phalaṃ
|1.5| ahaṃ manussesu manussabhūtā
abbhāgatānāsanakaṃ adāsiṃ
abhivādayiṃ añjalikaṃ akāsiṃ
yathānubhāvañca adāsi dānaṃ
|1.6| tena metādiso vaṇṇo tena me idhamijjhati
uppajjanti ca me bhogā ye keci manaso piyā
|1.7| akkhāmi te bhikkhu mahānubhāva
manussabhūtā yamakāsi puññaṃ
tenamhi evañjalitānubhāvā
vaṇṇo ca me sabbadisā pabhāsatīti.
Pīṭhavimānaṃ paṭhamaṃ.
[2] |2.8| Pīṭhante veḷuriyamayaṃ uḷāraṃ
manojavaṃ gacchati yenakāmaṃ
alaṅkate mālyadhare suvatthe
obhāsasi vijjurivabbhakūṭaṃ
|2.9| kena tetādiso vaṇṇo kena te idhamijjhati
uppajjanti ca te bhogā ye keci manaso piyā
|2.10| pucchāmi taṃ devi mahānubhāve
manussabhūtā kimakāsi puññaṃ
Kenāsi evañjalitānubhāvā
vaṇṇo ca te sabbadisā pabhāsatīti.
|2.11| Sā devatā attamanā moggallānena pucchitā
pañhaṃ puṭṭhā viyākāsi yassa kammassidaṃ phalaṃ
|2.12| ahaṃ manussesu manussabhūtā
abbhāgatānāsanakaṃ adāsiṃ
abhivādayiṃ añjalikaṃ akāsiṃ
yathānubhāvañca adāsi dānaṃ
|2.13| tena metādiso vaṇṇo tena me idhamijjhati
uppajjanti ca me bhogā ye keci manaso piyā
|2.14| akkhāmi te bhikkhu mahānubhāva
manussabhūtā yamakāsi puññaṃ
tenamhi evañjalitānubhāvā
vaṇṇo ca me sabbadisā pabhāsatīti.
Pīṭhavimānaṃ dutiyaṃ.
[3] |3.15| Pīṭhante sovaṇṇamayaṃ uḷāraṃ
manojavaṃ gacchati yenakāmaṃ
alaṅkate mālyadhare suvatthe
obhāsasi vijjurivabbhakūṭaṃ
|3.16| kena tetādiso vaṇṇo kena te idhamijjhati
Uppajjanti ca te bhogā ye keci manaso piyā
|3.17| pucchāmi taṃ devi mahānubhāve
manussabhūtā kimakāsi puññaṃ
kenāsi evañjalitānubhāvā
vaṇṇo ca te sabbadisā pabhāsatīti.
|3.18| Sā devatā attamanā moggalānena pucchitā
pañhaṃ puṭṭhā viyākāsi yassa kammassidaṃ phalaṃ
|3.19| appassa kammassa phalaṃ mamedaṃ
yenamhi evañjalitānubhāvā
ahaṃ manussesu manussabhūtā
purimāya jātiyā manussaloke
|3.20| addasaṃ virajaṃ bhikkhuṃ vippasannamanāvilaṃ
tassa adāsihaṃ pīṭhaṃ pasannā sakehi pāṇihi
|3.21| tena metādiso vaṇṇo tena me idhamijjhati
uppajjanti ca me bhogā ye keci manaso piyā
|3.22| akkhāmi te bhikkhu mahānubhāva
manussabhūtā yamakāsi puññaṃ
tenamhi evañjalitānubhāvā
vaṇṇo ca me sabbadisā pabhāsatīti.
Pīṭhavimānaṃ tatiyaṃ.
[4] |4.23| Pīṭhante veḷuriyamayaṃ uḷāraṃ
manojavaṃ gacchati yenakāmaṃ
alaṅkate mālyadhare suvatthe
obhāsasi vijjurivabbhakūṭaṃ
|4.24| kena tetādiso vaṇṇo kena te idhamijjhati
uppajjanti ca te bhogā ye keci manaso piyā
|4.25| pucchāmi taṃ devi mahānubhāve
manussabhūtā kimakāsi puññaṃ
kenāsi evañjalitānubhāvā
vaṇṇo ca te sabbadisā pabhāsatīti.
|4.26| Sā devatā attamanā moggallānena pucchitā
pañhaṃ puṭṭhā viyākāsi yassa kammassidaṃ phalaṃ
|4.27| appassa kammassa phalaṃ mamedaṃ
yenamhi evañjalitānubhāvā
ahaṃ manussesu manussabhūtā
purimāya jātiyā manussaloke
|4.28| addasaṃ virajaṃ bhikkhuṃ vippasannamanāvilaṃ
tassa adāsihaṃ pīṭhaṃ pasannā sakehi pāṇihi
|4.29| tena metādiso vaṇṇo tena me idhamijjhati
uppajjanti ca me bhogā ye keci manaso piyā
|4.30| Akkhāmi taṃ bhikkhu mahānubhāva
manussabhūtā yamahaṃ 1- akāsiṃ
tenamhi evañjalitānubhāvā
vaṇṇo ca me sabbadisā pabhāsatīti.
Pīṭhavimānaṃ catutthaṃ.
[5] |5.31| Kuñjaro te varāroho nānāratanakappano
ruciro thāmavā javasampanno ākāsamhi samīhati
|5.32| padumī padumapattakkhī 2- padumuppalajutindharo 3-
padumacuṇṇābhikiṇṇaṅgo 2- sovaṇṇapokkharamālavā
|5.33| padumānusataṃ maggaṃ padumapattavibhūsitaṃ 2-
ṭhitaṃ vaggumanugghāti mitaṃ gacchati vāraṇo
|5.34| tassa pakkamamānassa sovaṇṇakaṃsā ratissarā
tesaṃ suyyati nigghoso turiye pañcaṅgike yathā
|5.35| tassa nāgassa khandhamhi sucivatthā alaṅkatā
mahantaṃ accharāsaṅghaṃ vaṇṇena atirocasi
|5.36| dānassa te idaṃ phalaṃ atho sīlassa vā pana
atho añjalikammassa taṃ me akkhāhi pucchitā (ti .)
|5.37| sā devatā attamanā moggallānena pucchitā
pañhaṃ puṭṭhā viyākāsi yassa kammassidaṃ phalaṃ
@Footnote:1. Ma. yamakāsi puññaṃ . 2 Ma. Yu. padma - . 3 Ma. Yu. padmuppala -.
|5.38| Disvāna guṇasampannaṃ jhāyiṃ jhānarataṃ sataṃ
adāsiṃ pupphābhikiṇṇaṃ āsanaṃ dussasanthataṃ
|5.39| upaḍḍhapadumamālāhaṃ āsanassa samantato
abbhokirissaṃ pattehi pasannā sakehi pāṇihi
|5.40| tassa kammakusalassa idaṃ me tādisaṃ phalaṃ
sakkāro garukāro ca devānaṃ apacitā ahaṃ
|5.41| yo ve sammāvimuttānaṃ santānaṃ brahmacārinaṃ
pasanno āsanaṃ dajjā evaṃ nande yathā ahaṃ
|5.42| tasmā hi attakāmena mahattamabhikaṅkhatā
āsanaṃ dātabbaṃ hoti sarīrantimadhārinanti.
Kuñjaravimānaṃ pañcamaṃ.
[6] |6.43| Suvaṇṇacchadanaṃ nāvaṃ nāri āruyha tiṭṭhasi
ogāḷhasi 1- pokkharaṇiṃ padumaṃ 2- chindasi pāṇinā
|6.44| kūṭāgārā nivesā 3- te vibhattā bhāgaso mitā
daddallamānā ābhanti samantā caturo disā 4-
|6.45| kena tetādiso vaṇṇo kena te idhamijjhati
uppajjanti ca te bhogā ye keci manaso piyā
|6.46| pucchāmi taṃ devi mahānubhāve
manussabhūtā kimakāsi puññaṃ
@Footnote: 1 Po. Ma. Yu. ogāhasi . 2 Ma. Yu. padmaṃ . 3 Po. nivāsā . 4 Ma. kūṭāgārā .pe.
@caturo disāti ayaṃ gāthā na pākaṭā.
Kenāsi evañjalitānubhāvā
vaṇṇo ca te sabbadisā pabhāsatīti.
|6.47| Sā devatā attamanā moggallānena pucchitā
pañhaṃ puṭṭhā viyākāsi yassa kammassidaṃ phalaṃ
|6.48| ahaṃ manussesu manussabhūtā
purimāya 1- jātiyā manussaloke
disvāna bhikkhū tasite kilante
uṭṭhāya pātuṃ udakaṃ adāsiṃ
|6.49| yo ve kilantāna pipāsitānaṃ
uṭṭhāya pātuṃ udakaṃ dadāti
sītodakā tassa bhavanti najjo
pahūtamalyā bahupuṇḍarīkā
|6.50| taṃ āpagā anupariyanti sabbadā
sītodakā vālukasanthatā nadī
ambā ca sālā tilakā ca jambuyo
uddālakā pāṭaliyo ca phullā
|6.51| taṃ bhūmibhāgehi upetarūpaṃ
vimānaseṭṭhaṃ bhusasobhamānaṃ
tasseva kammassa ayaṃ vipāko
etādisaṃ puññakatā 2- labhanti
@Footnote: 1 Yu. parimayā . 2 Po. Sī. katapuññā.
|6.52| Kūṭāgārā nivesā me vibhattā bhāgaso mitā
daddallamānā 1- ābhanti samantā caturo disā
|6.53| tena metādiso vaṇṇo tena me idhamijjhati
uppajjanti ca me bhogā ye keci manaso piyā
|6.54| akkhāmi te bhikkhu mahānubhāva
manussabhūtā yamahaṃ 2- akāsiṃ
tenamhi evañjalitānubhāvā
vaṇṇo ca me sabbadisā pabhāsatīti.
Nāvāvimānaṃ chaṭṭhaṃ.
[7] |7.55| Suvaṇṇacchadanaṃ nāvaṃ nāri āruyha tiṭṭhasi
ogāḷhasi 3- pokkharaṇiṃ padumaṃ 4- chindasi pāṇinā
|7.56| kūṭāgārā nivesā te vibhattā bhāgaso mitā
daddallamānā ābhanti samantā caturo disā
|7.57| kena tetādiso vaṇṇo kena te idhamijjhati
uppajjanti ca te bhogā ye keci manaso piyā
|7.58| pucchāmi taṃ devi mahānubhāve
manussabhūtā kimakāsi puññaṃ
kenāsi evañjalitānubhāvā
vaṇṇo ca te sabbadisā pabhāsatīti.
@Footnote: 1 Po. daddaḷhamānā . 2 Ma. Yu. yamakāsi puññaṃ . 3 Po. Ma. Yu. ogāhasi.
@4 Ma. Yu. padmaṃ.
|7.59| Sā 1- devatā attamanā moggallānena pucchitā
pañhaṃ puṭṭhā viyākāsi yassa kammassidaṃ phalaṃ
|7.60| ahaṃ manussesu manussabhūtā
purimāya jātiyā manussaloke
disvāna bhikkhuṃ tasitaṃ kilantaṃ
uṭṭhāya pātuṃ udakaṃ adāsiṃ
|7.61| yo ve kilantassa pipāsitassa
uṭṭhāya pātuṃ udakaṃ dadāti
sītodakā tassa bhavanti najjo
pahūtamalyā bahupuṇḍarīkā
|7.62| taṃ āpagā anupariyanti sabbadā
sītodakā vālukasanthatā nadī
ambā ca sālā tilakā ca jambuyo
uddālakā pāṭaliyo ca phullā
|7.63| taṃ bhūmibhāgehi upetarūpaṃ
vimānaseṭṭhaṃ bhusasobhamānaṃ
tasseva 2- kammassa ayaṃ vipāko
etādisaṃ puññakatā labhanti
|7.64| tena metādiso vaṇṇo tena me idhamijjhati
uppajjanti ca me bhogā ye keci manaso piyā
@Footnote: 1 Yu. sa . 2 Ma. tassīdha.
|7.65| Akkhāmi te bhikkhu mahānubhāva
manussabhūtā yamakāsi puññaṃ
tenamhi evañjalitānubhāvā
vaṇṇo ca me sabbadisā pabhāsatīti.
Nāvāvimānaṃ sattamaṃ.
[8] |8.66| Suvaṇṇacchadanaṃ nāvaṃ nāri āruyha tiṭṭhasi
ogāḷhasi 1- pokkharaṇiṃ padumaṃ 2- chindasi pāṇinā
|8.67| kūṭāgārā nivesā te vibhattā bhāgaso mitā
daddallamānā ābhanti samantā caturo disā
|8.68| kena tetādiso vaṇṇo kena te idhamijjhati
uppajjanti ca te bhogā ye keci manaso piyā
|8.69| pucchāmi taṃ devi mahānubhāve
manussabhūtā kimakāsi puññaṃ
kenāsi evañjalitānubhāvā
vaṇṇo ca te sabbadisā pabhāsatīti.
|8.70| Sā devatā attamanā sambuddheneva pucchitā
pañhaṃ puṭṭhā viyākāsi yassa kammassidaṃ phalaṃ
|8.71| ahaṃ manussesu manussabhūtā
purimāya jātiyā manussaloke
@Footnote: 1 Yu. ogāhasi . 2 Ma. Yu. padmaṃ.
Disvāna bhikkhū tasite kilante
uṭṭhāya pātuṃ udakaṃ adāsiṃ
|8.72| yo ve kilantāna pipāsitānaṃ
uṭṭhāya pātuṃ udakaṃ dadāti
sītodakā tassa bhavanti najjo
pahūtamalyā bahupuṇḍarīkā
|8.73| taṃ āpagā anupariyanti sabbadā
sītodakā vālukasanthatā nadī
ambā ca sālā tilakā ca jambuyo
uddālakā pāṭaliyo ca phullā
|8.74| taṃ bhūmibhāgehi upetarūpaṃ
vimānaseṭṭhaṃ bhusasobhamānaṃ
tasseva kammassa ayaṃ vipāko
etādisaṃ puññakatā labhanti
|8.75| kūṭāgārā nivesā me vibhattā bhāgaso mitā
daddallamānā ābhanti samantā caturo disā
|8.76| tena metādiso vaṇṇo tena me idhamijjhati
uppajjanti ca me bhogā ye keci manaso piyā [1]-
|8.77| tenamhi evañjalitānubhāvā
vaṇṇo ca me sabbadisā pabhāsatīti
@Footnote: 1 Ma. akkhāmi te buddhamahānubhāva manussabhūtā yamakāsi puññaṃ.
Etassa kammassa ayaṃ vipāko 1-
uṭṭhāya 2- buddho udakaṃ apāsīti 3-.
Nāvāvimānaṃ aṭṭhamaṃ.
[9] |9.78| Abhikkantena vaṇṇena yā tvaṃ tiṭṭhasi devate
obhāsentī disā sabbā osadhī viya tārakā
|9.79| kena tetādiso vaṇṇo kena te idhamijjhati
uppajjanti ca te bhogā ye keci manaso piyā
|9.80| kena tvaṃ vimalobhāsā atirocasi devate
kena te sabbagattehi sabbā obhāsare disā
|9.81| pucchāmi taṃ devi mahānubhāve
manussabhūtā kimakāsi puññaṃ
kenāsi evañjalitānubhāvā
vaṇṇo ca te sabbadisā pabhāsatīti.
|9.82| Sā devatā attamanā moggallānena pucchitā
pañhaṃ puṭṭhā viyākāsi yassa kammassidaṃ phalaṃ
|9.83| ahaṃ manussesu manussabhūtā
purimāya jātiyā manussaloke
tamandhakāramhi 4- timīsikāyaṃ
padīpakālamhi adaṃ padīpaṃ
|9.84| yo andhakāramhi timīsikāyaṃ
@Footnote: 1 Po. kammassidaṃ phalaṃ. Ma. phalaṃ mamedaṃ . 2 Po. Ma. atthāya . 3 Ma. apāyīti.
@4 Po. samandhakāramhi.
Padīpakālamhi dadāti dīpaṃ
uppajjati jotirasaṃ vimānaṃ
pahūtamalyaṃ bahupuṇḍarīkaṃ
|9.85| tena metādiso vaṇṇo tena me idhamijjhati
uppajjanti ca me bhogā ye keci manaso piyā
|9.86| tenāhaṃ vimalobhāsā atirocāmi devatā
tena me sabbagattehi sabbā obhāsare disā
|9.87| akkhāmi te bhikkhu mahānubhāva
manussabhūtā yamakāsi 1- puññaṃ
tenamhi evañjalitānubhāvā
vaṇṇo ca me sabbadisā pabhāsatīti.
Padīpavimānaṃ navamaṃ.
[10] |10.88| Abhikkantena vaṇṇena yā tvaṃ tiṭṭhasi devate
obhāsentī disā sabbā osadhī viya tārakā
|10.89| kena tetādiso vaṇṇo kena te idhamijjhati
uppajjanti ca te bhogā ye keci manaso piyā
|10.90| pucchāmi taṃ devi mahānubhāve
manussabhūtā kimakāsi puññaṃ
kenāsi evañjalitānubhāvā
vaṇṇo ca te sabbadisā pabhāsatīti.
@Footnote: 1 Po. yamahaṃ akāsiṃ.
|10.91| Sā devatā attamanā moggallānena pucchitā
pañhaṃ puṭṭhā viyākāsi yassa kammassidaṃ phalaṃ
|10.92| ahaṃ manussesu manussabhūtā
purimāya jātiyā manussaloke
|10.93| addasaṃ virajaṃ buddhaṃ vippasannamanāvilaṃ
āsajja dānaṃ adāsiṃ akāmā tiladakkhiṇaṃ
dakkhiṇeyyassa buddhassa pasannā sakehi pāṇihi
|10.94| tena metādiso vaṇṇo tena me idhamijjhati
uppajjanti ca me bhogā ye keci manaso piyā
|10.95| akkhāmi te bhikkhu mahānubhāva
manussabhūtā yamakāsi puññaṃ
tenamhi evañjalitānubhāvā
vaṇṇo ca me sabbadisā pabhāsatīti.
Tiladakkhiṇavimānaṃ dasamaṃ.
[11] |11.96| Koñcā mayurā diviyā ca haṃsā
vaggussarā kokilā sampatanti
pupphābhikiṇṇaṃ rammamidaṃ vimānaṃ
anekacittaṃ naranārisevitaṃ
|11.97| tatthacchasi devi mahānubhāve
iddhī vikubbanti anekarūpā
Imā ca te accharāyo samantato
naccanti gāyanti pamodayanti 1-
|11.98| deviddhipattāsi mahānubhāve
manussabhūtā kimakāsi puññaṃ
kenāsi evañjalitānubhāvā
vaṇṇo ca te sabbadisā pabhāsatīti.
|11.99| Sā devatā attamanā moggallānena pucchitā
pañhaṃ puṭṭhā viyākāsi yassa kammassidaṃ phalaṃ
|11.100| ahaṃ manussesu manussabhūtā
patibbatā anaññamanā ahosiṃ
mātāva puttaṃ anurakkhamānā
kuddhāpihaṃ nappharusaṃ avocaṃ
|11.101| sacce ṭhitā mosavajjaṃ pahāya
dāne ratā saṅgahitattabhāvā
annañca pānañca pasannacittā
sakkacca dānaṃ vipulaṃ adāsiṃ
|11.102| tena metādiso vaṇṇo tena me idhamijjhati
uppajjanti ca me bhogā ye keci manaso piyā
|11.103| akkhāmi te bhikkhu mahānubhāva
manussabhūtā yamakāsi puññaṃ
@Footnote: 1 Po. pamodanti ca . Ma. mamodayanti ca.
Tenamhi evañjalitānubhāvā
vaṇṇo ca me sabbadisā pabhāsatīti.
Patibbatāvimānaṃ ekādasamaṃ.
[12] |12.104| Veḷuriyatthambhaṃ ruciraṃ pabhassaraṃ
vimānamāruyha anekacittaṃ
tatthacchasi devi mahānubhāve
uccāvacā iddhivikubbamānā
imā ca te accharāyo samantato
naccanti gāyanti pamodayanti
|12.105| deviddhipattāsi mahānubhāve
manussabhūtā kimakāsi puññaṃ
kenāsi evañjalitānubhāvā
vaṇṇo ca te sabbadisā pabhāsatīti.
|12.106| Sā devatā attamanā moggallānena pucchitā
pañhaṃ puṭṭhā viyākāsi yassa kammassidaṃ phalaṃ
|12.107| ahaṃ manussesu manussabhūtā
upāsikā cakkhumato ahosiṃ
pāṇātipātā viratā ahosiṃ
loke adinnaṃ parivajjayissaṃ
|12.108| amajjapā 1- nāpi musā abhāṇiṃ
@Footnote: 1 Ma. amajjapāno ca.
Sakena sāminā ahosiṃ tuṭṭhā
annañca pānañca pasannacittā
sakkacca dānaṃ vipulaṃ adāsiṃ
|12.109| tena metādiso vaṇṇo tena me idhamijjhati
uppajjanti ca me bhogā ye keci manaso piyā
|12.110| akkhāmi te bhikkhu mahānubhāva
manussabhūtā yamahaṃ akāsiṃ 1-
tenamhi evañjalitānubhāvā
vaṇṇo ca me sabbadisā pabhāsatīti.
Dutiyapatibbatāvimānaṃ dvādasamaṃ.
[13] |13.111| Abhikkantena vaṇṇena yā tvaṃ tiṭṭhasi devate
obhāsentī disā sabbā osadhī viya tārakā
|13.112| kena tetādiso vaṇṇo kena te idhamijjhati
uppajjanti ca te bhogā ye keci manaso piyā
|13.113| pucchāmi taṃ devi mahānubhāve
manussabhūtā kimakāsi puññaṃ
kenāsi evañjalitānubhāvā
vaṇṇo ca te sabbadisā pabhāsatīti.
|13.114| Sā devatā attamanā moggallānena pucchitā
pañhaṃ puṭṭhā viyākāsi yassa kammassidaṃ phalaṃ
@Footnote: 1 Ma. yamakāsi puññaṃ.
|13.115| Ahaṃ manussesu manussabhūtā
suṇisā ahosiṃ sasurassa ghare 1-
|13.116| addasaṃ virajaṃ bhikkhuṃ vippasannamanāvilaṃ
tassa adāsihaṃ pūvaṃ pasannā sakehi 2- pāṇihi
bhāgaḍḍhabhāgaṃ datvāna modāmi nandane vane
|13.117| tena metādiso vaṇṇo tena me idhamijjhati
uppajjanti ca me bhogā ye keci manaso piyā
|13.118| tenamhi evañjalitānubhāvā
vaṇṇo ca me sabbadisā pabhāsatīti.
Suṇisāvimānaṃ terasamaṃ.
[14] |14.119| Abhikkantena vaṇṇena yā tvaṃ tiṭṭhasi devate
obhāsentī disā sabbā osadhī viya tārakā
|14.120| kena tetādiso vaṇṇo kena te idhamijjhati
uppajjanti ca te bhogā ye keci manaso piyā
|14.121| pucchāmi taṃ devi mahānubhāve
manussabhūtā kimakāsi puññaṃ
kenāsi evañjalitānubhāvā
vaṇṇo ca te sabbadisā pabhāsatīti.
|14.122| Sā devatā attamanā moggallānena pucchitā
pañhaṃ puṭṭhā viyākāsi yassa kammassidaṃ phalaṃ
@Footnote: 1 Ma. gehe . 2 Ma. sehi.
|14.123| Ahaṃ manussesu manussabhūtā
suṇisā ahosiṃ sasurassa ghare
|14.124| addasaṃ virajaṃ bhikkhuṃ vippasannamanāvilaṃ
tassa adāsihaṃ bhāgaṃ pasannā sakehi pāṇihi
kummāsapiṇḍaṃ datvāna modāmi nandane vane
|14.125| tena metādiso vaṇṇo tena me idhamijjhati
uppajjanti ca me bhogā ye keci manaso piyā
|14.126| tenamhi evañjalitānubhāvā
vaṇṇo ca me sabbadisā pabhāsatīti.
Suṇisāvimānaṃ cuddasamaṃ.
[15] |15.127| Abhikkantena vaṇṇena yā tvaṃ tiṭṭhasi devate
obhāsentī disā sabbā osadhī viya tārakā
|15.128| kena tetādiso vaṇṇo kena te idhamijjhati
uppajjanti ca te bhogā ye keci manaso piyā
|15.129| pucchāmi taṃ devi mahānubhāve
manussabhūtā kimakāsi puññaṃ
kenāsi evañjalitānubhāvā
vaṇṇo ca te sabbadisā pabhāsatīti.
|15.130| Sā devatā attamanā moggallānena pucchitā
pañhaṃ puṭṭhā viyākāsi yassa kammassidaṃ phalaṃ
|15.131| Issā ca macchariyamāno 1- palāso
nāhosi mayhaṃ gharamāvasantiyā
akkodhanā bhattu vasānuvattinī
uposathe niccappamattā 2-
|15.132| cātuddasiṃ pañcadasiṃ yā ca pakkhassa aṭṭhamī
pāṭihāriyapakkhañca aṭṭhaṅgasusamāgataṃ
|15.133| uposathaṃ upavasiṃ 3- sadā sīle susaṃvutā
saññamā saṃvibhāgā ca vimānaṃ āvasāmahaṃ
|15.134| pāṇātipātā viratā musāvādā ca saññatā
theyyā ca aticārā ca majjapānā ca ārakā
|15.135| pañcasikkhāpade ratā ariyasaccānakovidā
upāsikā cakkhumato gotamassa yasassino
|15.136| sāhaṃ sakena sīlena yasasā ca yasassinī
anubhomi sakaṃ puññaṃ sukhitā camhi anāmayā
|15.137| tena metādiso vaṇṇo tena me idhamijjhati
uppajjanti ca me bhogā ye keci manaso piyā
|15.138| akkhāmi te bhikkhu mahānubhāva
manussabhūtā yamahaṃ akāsiṃ
tenamhi evañjalitānubhāvā
@Footnote: 1 Ma. maccheramatho. Yu. macchariyamatho . 2 Ma. niccahamappamattā.
@3 Po. Ma. upavasissaṃ.
Vaṇṇo ca me sabbadisā pabhāsatīti.
|15.139| Mama ca bhante vacanena bhagavato pāde sirasā vandeyyāsi
uttarā nāma bhante upāsikā bhagavato pāde sirasā vandatīti
anacchariyaṃ kho panetaṃ bhante yaṃ maṃ bhagavā aññatarasmiṃ sāmaññaphale
byākareyya taṃ bhagavā sakadāgāmiphale byākāsīti.
Uttarāvimānaṃ paṇṇarasamaṃ.
[16] |16.140| Yuttā ca te paramaalaṅkatā hayā
adhomukhā aghasi gamā balī javā
abhinimmitā pañca rathā satā ca te
anventi taṃ sārathicoditā hayā
|16.141| sā tiṭṭhasi rathavare alaṅkatā
obhāsayaṃ jalamiva jotipāvako
pucchāmi taṃ varatanu anomadassane
kasmā kāyā anadhivaraṃ upāgami
|16.142| kāmaggapattānaṃ yamāhu anuttarā
nimmāya nimmāya ramanti devatā
tasmā kāyā accharā kāmavaṇṇinī
idhāgatā anadhivaraṃ namassituṃ
|16.143| kiṃ tvaṃ pure sucaritamācarī idha
Kenāsi tvaṃ amitayasā sukhedhitā
iddhī ca te anadhivarā vihaṅgamā
vaṇṇo ca te dasa disā virocati
|16.144| devehi tvaṃ parivutā sakkatā casi
kuto cutā sugatigatāsi devate
kassa vā tvaṃ vacanakarānusāsaniṃ
ācikkha me tvaṃ yadi buddhasāvikā (ti).
|16.145| Nagantare nagaravare sumāpite
paricārikā rājavarassa sirīmato
naccehi gītehi 1- paramasusikkhitā ahuṃ
sirimāti maṃ rājagahe avediṃsu
|16.146| buddho ca me isinisabho vināyako
adesayi samudayadukkhaniccataṃ
asaṅkhataṃ dukkhanirodhaṃ sassataṃ
maggañcimaṃ akuṭilaṃ añjasaṃ sivaṃ
|16.147| sutvānahaṃ amatapadaṃ asaṅkhataṃ
tathāgatassa anadhivarassa sāsanaṃ
sīlesvāhaṃ paramasusaṃvutā ahuṃ
dhamme ṭhitā naravarabuddhadesite
|16.148| ñatvāna taṃ 2- virajaṃ padaṃ asaṅkhataṃ
@Footnote: 1 Ma. Yu. nacce gīte . 2 ñatvānahantipi.
Tathāgatena anadhivarena desitaṃ
tatthevahaṃ samathasamādhimāphusiṃ
sāyeva me paramaniyāmatā ahu
|16.149| laddhānahaṃ amatavaraṃ visesanaṃ
ekaṃsikā abhisamaye visesiya
asaṃsayā bahujanapūjitā ahaṃ
khiḍḍaṃ ratiṃ paccanubhomanappakaṃ
|16.150| evaṃ ahaṃ amatarasamhi devatā
tathāgatassa anadhivarassa sāvikā
dhammaddasā paṭhamaphale patiṭṭhitā
sotāpannā na ca punamatthi duggati
|16.151| sā vandituṃ anadhivaraṃ upāgamiṃ
pāsādike kusalarate ca bhikkhavo
namassituṃ samaṇasamāgamaṃ sivaṃ
sagāravā sirimato dhammarājino
|16.152| disvā muniṃ muditamanamhi pīṇitā
tathāgataṃ naravaradammasārathiṃ
taṇhacchidaṃ kusalarataṃ vināyakaṃ
vandāmahaṃ paramahitānukampakanti.
Sirimāvimānaṃ soḷasamaṃ.
[17] |17.153| Idaṃ vimānaṃ ruciraṃ pabhassaraṃ
veḷuriyatthambhaṃ satataṃ sunimmalaṃ 1-
suvaṇṇarukkhehi samantamotthataṃ
ṭhānaṃ mamaṃ kammavipākasambhavaṃ
|17.154| tatrūpapannā purimaccharā imā
sataṃ sahassāni sakena kammunā
tuvaṃsi ajjhūpagatā yasassinī
obhāsayaṃ tiṭṭhasi pubbadevatā
|17.155| sasī adhiggayha yathā virocati
nakkhattarājāriva tārakāgaṇaṃ
tatheva tvaṃ accharāsaṅgaṇaṃ imaṃ
daddallamānā yasasā virocasi
|17.156| kuto nu āgamma anomadassane
upapannā tvaṃ bhavanaṃ mamaṃ idaṃ
brahmaṃva devā tidasā sahindakā
sabbe na tappāmase dassanena tanti.
|17.157| Yametaṃ sakka anupucchase mamaṃ
kuto cutā idha āgatā tuvaṃ
bārāṇasī nāma puratthi kāsinaṃ
tattha pure ahosiṃ pesakārikā 2-
@Footnote: 1 Po. Ma. Yu. sunimmitaṃ . 2 Po. Ma. Yu. kesakārikā.
|17.158| Buddhe ca dhamme ca pasannamānasā
saṅghe ca ekantagatā asaṃsayā
akhaṇḍasikkhāpadā āgatapphalā
sambodhidhamme niyatā anāmayāti
|17.159| tantyābhinandāmase svāgatañca te
dhammena ca tvaṃ yasasā virocasi
buddhe ca dhamme ca pasannamānase
saṅghe ca ekantagate asaṃsaye
akhaṇḍasikkhāpade āgatapphale
sambodhidhamme niyate anāmayeti.
Pesakāriyavimānaṃ sattarasamaṃ.
Uddānaṃ
pañca pīṭhā tayo nāvā padīpā tiladakkhiṇā
dve patī dve suṇisā uttarā sirimā pesakārikā
vaggo tena pavuccatīti.
Itthīvimāne vaggo paṭhamo.
Dutiyo cittalatāvaggo
[18] |18.160| 1 Api sakkova devindo ramme cittalatāvane
samantā anupariyāsi nārīgaṇapurakkhatā
Obhāsentī disā sabbā osadhī viya tārakā
|18.161| kena tetādiso vaṇṇo kena te idhamijjhati
uppajjanti ca te bhogā ye keci manaso piyā
|18.162| pucchāmi taṃ devi mahānubhāve
manussabhūtā kimakāsi puññaṃ
kenāsi evañjalitānubhāvā
vaṇṇo ca te sabbadisā pabhāsatīti.
|18.163| Sā devatā attamanā moggallānena pucchitā
pañhaṃ puṭṭhā viyākāsi yassa kammassidaṃ phalaṃ
|18.164| ahaṃ manussesu manussabhūtā
dāsī ahosiṃ parapessiyā kule
|18.165| upāsikā cakkhumato gotamassa yasassino
tassā me nikkamo āsi sāsane tassa tādino
|18.166| kāmaṃ bhijjatu yaṃ kāyo neva atthettha santhanaṃ
sikkhāpadānaṃ pañcannaṃ maggo sovatthiko sivo
|18.167| akaṇṭako agahano uju sabbhi pavedito
nikkamassa phalaṃ passa yathidaṃ pāpuṇitthikā
|18.168| āmantanikā raññomhi sakkassa vasavattino
saṭṭhi turiyasahassāni paṭibodhaṃ karonti me
|18.169| ālambo gaggamo bhīmo sādhuvādi pasaṃsiyo
Pokkharo ca suphasso ca vīṇāmokkhā ca nāriyo
|18.170| nandā ceva sunandā ca soṇadinnā sucimhitā
ālambusā missakesī 1- puṇḍarīkāti dāruṇī
|18.171| enipassā supassā ca subhaddā mudukāvadī
etā aññā ca seyyāse accharānaṃ pabodhikā
|18.172| tā maṃ kālenupāgantvā abhibhāsanti devatā
handa naccāma gāyāma handa taṃ ramayāmase
|18.173| nayidaṃ akatapuññānaṃ katapuññānamevidaṃ
asokaṃ nandanaṃ rammaṃ tidasānaṃ mahāvanaṃ
|18.174| sukhaṃ akatapuññānaṃ idha natthi parattha ca
sukhañca katapuññānaṃ idha ceva parattha ca
|18.175| tesaṃ sahabyakāmānaṃ kattabbaṃ kusalaṃ bahuṃ
katapuññā hi modanti sagge bhogasamaṅginoti.
Dāsīvimānaṃ paṭhamaṃ.
[19] |19.176| 2 Abhikkantena vaṇṇena yā tvaṃ tiṭṭhasi devate
obhāsentī disā sabbā osadhī viya tārakā
|19.177| kena tetādiso vaṇṇo ... Pe ...
Vaṇṇo ca te sabbadisā pabhāsatīti.
|19.178| Sā devatā attamanā moggallānena pucchitā
@Footnote: 1 Po. Ma. Yu. alambusā missakesī ca.
Pañhaṃ puṭṭhā viyākāsi yassa kammassidaṃ phalaṃ
|19.179| kevaṭṭadvārā nikkhamma ahu mayhaṃ nivesanaṃ
tattha saṃsaramānānaṃ sāvakānaṃ mahesinaṃ
|19.180| odanaṃ kummāsaṃ ḍākaṃ loṇasovīrakañcahaṃ
adāsiṃ ujubhūtesu vippasannena cetasā
|19.181| cātuddasiṃ pañcadasiṃ yā ca pakkhassa aṭṭhamī
pāṭihāriyapakkhañca aṭṭhaṅgasusamāgataṃ
|19.182| uposathaṃ upavasiṃ sadā sīlesu saṃvutā
saññamā saṃvibhāgā ca vimānaṃ āvasāmahaṃ
|19.183| pāṇātipātā viratā musāvādā ca saññatā
theyyā ca aticārā ca majjapānā ca ārakā
|19.184| pañcasikkhāpade ratā ariyasaccānakovidā
upāsikā cakkhumato gotamassa yasassino
|19.185| tena metādiso vaṇṇo ... Pe ...
Vaṇṇo ca me sabbadisā pabhāsatīti.
Mama ca bhante vacanena bhagavato pāde sirasā vandeyyāsi
lakhumā nāma bhante upāsikā bhagavato pāde sirasā vandatīti
anacchariyaṃ kho panetaṃ bhante yaṃ maṃ bhagavā aññatarasmiṃ sāmaññaphale
byākareyya taṃ bhagavā sakadāgāmiphale byākāsīti.
Lakhumāvimānaṃ dutiyaṃ.
The Pali Tipitaka in Roman Character Volume 26 page 1-29.
https://84000.org/tipitaka/pitaka_item/roman_item.php?book=26&item=0&items=19
Classified by [Item Number] :-
http://84000.org/tipitaka/pitaka_item/roman_item.php?book=26&item=0&items=19&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=26&item=0&items=19
Compare with The Royal Version of Thai Tipitaka :-
https://84000.org/tipitaka/read/byitem.php?book=26&item=0&items=19
Study Atthakatha :-
https://84000.org/tipitaka/attha/attha.php?b=26&i=0
Contents of The Tipitaka Volume 26
https://84000.org/tipitaka/read/?index_26
https://84000.org/tipitaka/english/?index_26
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
