paliTIPITAKA Volume 19 - Sutta Pitaka 11

[1052] Ekaṃ samayaṃ bhagavā rājagahe viharati gijjhakūṭe pabbate sūkarakhātāyaṃ . tatra kho bhagavā āyasmantaṃ sārīputtaṃ āmantesi kiṃ nu kho sārīputta atthavasaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatīti ^1-. [1053] Anuttaraṃ hi bhante yogakkhemaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatīti. [1054] Sādhu sādhu sārīputta anuttarañhi sārīputta yogakkhemaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattati. [1055] Katamo ca sārīputta anuttaro yogakkhemo yaṃ @Footnote: ¹ Po. Yu. pavattetīti. evamupari. Sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatīti. [1056] Idha bhante khīṇāsavo bhikkhu saddhindriyaṃ bhāveti upasamagāmiṃ sambodhagāmiṃ viriyindriyaṃ bhāveti . satindriyaṃ bhāveti . Samādhindriyaṃ bhāveti . paññindriyaṃ bhāveti upasamagāmiṃ sambodhagāmiṃ . ayaṃ kho bhante anuttaro yogakkhemo yaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatīti. [1057] Sādhu sādhu sārīputta eso hi sārīputta anuttaro yogakkhemo yaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattati. [1058] Katamo ca sārīputta paramanipaccakāro yaṃ khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatīti. [1059] Idha bhante khīṇāsavo bhikkhu satthari sagāravo viharati sappaṭisso dhamme sagāravo viharati sappaṭisso saṅghe sagāravo viharati sappaṭisso sikkhāya sagāravo viharati sappaṭisso samādhismiṃ sagāravo viharati sappaṭisso . ayaṃ kho bhante paramanipaccakāro yaṃ khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatīti. [1060] Sādhu sādhu sārīputta eso hi sārīputta paramanipaccakāro yaṃ khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatīti.

The Pali Tipitaka in Roman Character Volume 19 page 308-310. http://84000.org/tipitaka/pitaka_item/roman_item_s.php?book=19&item=1052&items=9&mode=bracket Classified by content :- http://84000.org/tipitaka/pitaka_item/roman_item_s.php?book=19&item=1052&items=9 Compare with The Pali Tipitaka in Thai Character :- http://84000.org/tipitaka/read/pali_item_s.php?book=19&item=1052&items=9&mode=bracket Compare with The Royal Version of Thai Tipitaka :- http://84000.org/tipitaka/read/byitem_s.php?book=19&item=1052&items=9&mode=bracket Study Atthakatha :- http://84000.org/tipitaka/attha/attha.php?b=19&i=1052 The Pali Atthakatha in Thai :- http://84000.org/tipitaka/atthapali/read_th.php?B=13&A=7110 The Pali Atthakatha in Roman :- http://84000.org/tipitaka/atthapali/read_rm.php?B=13&A=7110 Contents of The Tipitaka Volume 19 http://84000.org/tipitaka/read/?index_19