paliTIPITAKA Volume 19 - Sutta Pitaka 11

[1494] Ye te bhikkhave anukampeyyātha ye ca sotabbaṃ maññeyyuṃ mittā vā amaccā vā ñātī vā sālohitā vā te bhikkhave catūsu sotāpattiyaṅgesu samādapetabbā nivesetabbā patiṭṭhāpetabbā . katamesu catūsu . buddhe aveccappasāde samādapetabbā nivesetabbā patiṭṭhāpetabbā itipi so bhagavā .pe. Satthā devamanussānaṃ buddho bhagavāti. [1495] Siyā bhikkhave catunnaṃ mahābhūtānaṃ aññathattaṃ paṭhavīdhātuyā āpodhātuyā tejodhātuyā vāyodhātuyā. Na tveva buddhe aveccappasādena samannāgatassa ariyasāvakassa siyā aññathattaṃ . tatrīdaṃ aññathattaṃ . So vata buddhe aveccappasādena samannāgato ariyasāvako nirayaṃ vā tiracchānayoniṃ vā pittivisayaṃ vā upapajjissatīti netaṃ ṭhānaṃ vijjati . Dhamme saṅghe . ariyakantesu sīlesu samādapetabbā nivesetabbā patiṭṭhāpetabbā akkhaṇḍesu .pe. Samādhisaṃvattanikesu. [1496] Siyā bhikkhave catunnaṃ mahābhūtānaṃ aññathattaṃ paṭhavīdhātuyā āpodhātuyā tejodhātuyā vāyodhātuyā . na tveva ariyakantehi sīlehi samannāgatassa ariyasāvakassa siyā aññathattaṃ . Tatrīdaṃ aññathattaṃ . so vata ariyakantehi sīlehi samannāgato Ariyasāvako nirayaṃ vā tiracchānayoniṃ vā pittivisayaṃ vā upapajjissatīti netaṃ ṭhānaṃ vijjati. [1497] Ye te bhikkhave anukampeyyātha ye ca sotabbaṃ maññeyyuṃ mittā vā amaccā vā ñātī vā sālohitā vā te bhikkhave imesu catūsu sotāpattiyaṅgesu samādapetabbā nivesetabbā patiṭṭhāpetabbāti.

The Pali Tipitaka in Roman Character Volume 19 page 457-458. http://84000.org/tipitaka/pitaka_item/roman_item_s.php?book=19&item=1494&items=4&mode=bracket Classified by content :- http://84000.org/tipitaka/pitaka_item/roman_item_s.php?book=19&item=1494&items=4 Compare with The Pali Tipitaka in Thai Character :- http://84000.org/tipitaka/read/pali_item_s.php?book=19&item=1494&items=4&mode=bracket Compare with The Royal Version of Thai Tipitaka :- http://84000.org/tipitaka/read/byitem_s.php?book=19&item=1494&items=4&mode=bracket Study Atthakatha :- http://84000.org/tipitaka/attha/attha.php?b=19&i=1494 The Pali Atthakatha in Thai :- http://84000.org/tipitaka/atthapali/read_th.php?B=13&A=8004 The Pali Atthakatha in Roman :- http://84000.org/tipitaka/atthapali/read_rm.php?B=13&A=8004 Contents of The Tipitaka Volume 19 http://84000.org/tipitaka/read/?index_19