Chaṭṭhaṃ macchadāyakattherāpadānaṃ (266)
[268] |268.23| Candabhāgānadītīre ahosiṃ 2- ukkuso tadā
mahantaṃ macchaṃ paggayha siddhatthassa munino adaṃ.
@Footnote: 1 Po. mayhaṃ dinnaṃ. Yu. mamaṃ dinnā. 2 Ma. Yu. ukkuso āsahaṃ tadā.
|268.24| Catunavute ito kappe yaṃ macchamadadiṃ tadā
duggatiṃ nābhijānāmi macchadānassidaṃ phalaṃ.
|268.25| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā macchadāyako thero imā gāthāyo
abhāsitthāti.
Macchadāyakattherassa apadānaṃ samattaṃ.
Sattamaṃ javahaṃsakattherāpadānaṃ (267)
[269] |269.26| Candabhāgānadītīre āsiṃ vanacaro tadā
siddhatthaṃ addasaṃ buddhaṃ gacchantaṃ anilañjase.
|269.27| Añjaliṃ paggahetvāna olokento 1- mahāmuniṃ
sakaṃ cittaṃ pasādetvā abhivandiṃ 2- lokanāyakaṃ.
|269.28| Catunavute ito kappe yaṃ avandiṃ narāsabhaṃ
duggatiṃ nābhijānāmi vandanāya idaṃ phalaṃ.
|269.29| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā javahaṃsako thero imā gāthāyo
abhāsitthāti.
Javahaṃsakattherassa apadānaṃ samattaṃ.
@Footnote: 1 Ma. Yu. ullokento. 2 Ma. Yu. avandiṃ nāyakaṃ ahaṃ.
Aṭṭhamaṃ salaḷapupphiyattherāpadānaṃ (268)
[270] |270.30| Candabhāgānadītīre ahosiṃ kinnaro tadā
vipassiṃ addasaṃ buddhaṃ raṃsijālasamākulaṃ.
|270.31| Pasannacitto sumano paramāya ca pītiyā
paggayha salaḷaṃ pupphaṃ vipassissa 1- okiriṃ ahaṃ.
|270.32| Ekanavute ito kappe yaṃ pupphamabhipūjayiṃ
duggatiṃ nābhijānāmi buddhapūjāyidaṃ phalaṃ.
|270.33| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā salaḷapupphiyo thero imā gāthāyo
abhāsitthāti.
Salaḷapupphiyattherassa apadānaṃ samattaṃ.
Navamaṃ upāgatahāsaniyattherāpadānaṃ (269)
[271] |271.34| Himavantassa vemajjhe saro āsi sunimmito
tatthāhaṃ rakkhaso āsiṃ heṭṭhasīso 2- bhayānako.
|271.35| Anukampako kāruṇiko vipassī lokanāyako
mamuddharitukāmo so āgañchi mama santike.
@Footnote: 1 Ma. Yu. vipassiṃ. 2 Yu. poṭṭhasīso.
|271.36| Upāgataṃ mahāvīraṃ devadevaṃ narāsabhaṃ
āsayā abhinikkhamma avandiṃ satthuno ahaṃ.
|271.37| Ekanavute ito kappe yaṃ vandiṃ purisuttamaṃ
duggatiṃ nābhijānāmi vandanāya idaṃ phalaṃ.
|271.38| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā upāgatahāsaniyo 1- thero imā gāthāyo
abhāsitthāti.
Upāgatahāsaniyattherassa apadānaṃ samattaṃ.
Dasamaṃ taraṇiyattherāpadānaṃ (270)
[272] |272.39| Suvaṇṇavaṇṇo sambuddho vipassī 2- nāma nāyako
nadītīre ṭhito satthā bhikkhusaṅghapurakkhato.
|272.40| Nāvā na vijjate tattha santāraṇī mahaṇṇave
nadiyā abhinikkhamma tāresiṃ lokanāyakaṃ.
|272.41| Ekanavute ito kappe yaṃ tāresiṃ naruttamaṃ
duggatiṃ nābhijānāmi tāraṇāya idaṃ phalaṃ.
|272.42| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
@Footnote: 1 Ma. upāgatāsayo. Yu. upāgatabhāsaniyo. 2 Ma. Yu. vipassī dakkhiṇāraho.
Itthaṃ sudaṃ āyasmā taraṇiyo thero imā gāthāyo
abhāsitthāti.
Taraṇiyattherassa apadānaṃ samattaṃ.
Uddānaṃ
ukkhepī telacandī ca dīpado ca viḷālido
maccho javo salaḷado rakkhaso taraṇo dasa
gāthāyo cettha saṅkhātā tāḷīsamekameva ca.
Padumukkhepavaggo sattavīso.
---------
The Pali Tipitaka in Roman Character Volume 32 page 351-355.
http://84000.org/tipitaka/pitaka_item/roman_item_s.php?book=32&item=268&items=5
Classified by [Item Number] :-
http://84000.org/tipitaka/pitaka_item/roman_item_s.php?book=32&item=268&items=5&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=32&item=268&items=5
Compare with The Royal Version of Thai Tipitaka :-
http://84000.org/tipitaka/read/byitem_s.php?book=32&item=268&items=5
Study Atthakatha :-
http://84000.org/tipitaka/attha/attha.php?b=32&i=268
The Pali Atthakatha in Thai :-
http://84000.org/tipitaka/atthapali/read_th.php?B=50&A=5026
The Pali Atthakatha in Roman :-
http://84000.org/tipitaka/atthapali/read_rm.php?B=50&A=5026
Contents of The Tipitaka Volume 32
http://84000.org/tipitaka/read/?index_32
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
