Catutthaṃ ekapupphiyattherāpadānaṃ (284)
[286] |286.16| Dakkhiṇamhi duvāramhi pisāco āsahantadā
addasaṃ virajaṃ buddhaṃ pītaraṃsīva bhāṇumaṃ.
|286.17| Vipassissa naraggassa sabbalokahitesino
ekapupphaṃ mayā dinnaṃ dipadindassa tādino.
|286.18| Ekanavute ito kappe yaṃ pupphamadadiṃ tadā
duggatiṃ nābhijānāmi buddhapūjāyidaṃ phalaṃ.
@Footnote: 1 Ma. paccuggamane idaṃ phalaṃ. 2 sattatiṃse. 3 Ma. Yu. saparivāroti.
|286.19| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ekapupphiyo thero imā gāthāyo
abhāsitthāti.
Ekapupphiyattherassa apadānaṃ samattaṃ.
Pañcamaṃ maghavapupphiyattherāpadānaṃ (285)
[287] |287.20| Nammadānadiyā tīre sayambhū aparājito
samādhiṃ so samāpanno vippasanno anāvilo.
|287.21| Disvā pasanno sumano sambuddhaṃ aparājitaṃ
tāhaṃ maghavapupphena sayambhuṃ pūjayiṃ tadā.
|287.22| Ekanavute ito kappe yaṃ pupphamabhipūjayiṃ
duggatiṃ nābhijānāmi buddhapūjāyidaṃ phalaṃ.
|287.23| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā maghavapupphiyo thero imā gāthāyo
abhāsitthāti.
Maghavapupphiyattherassa apadānaṃ samattaṃ.
Chaṭṭhaṃ upaṭṭhāyikattherāpadānaṃ (286)
[288] |288.24| Rathiyaṃ paṭipajjantaṃ āhutīnaṃ paṭiggahaṃ
dipadindaṃ mahānāgaṃ lokajeṭṭhaṃ narāsabhaṃ.
|288.25| Pakkosāpiyatassāhaṃ sabbalokahitesino
upaṭṭhāko mayā dinno siddhatthassa mahesino.
|288.26| Paṭiggahetvāna sambuddho niyyātesi 1- mahāmuni
uṭṭhāya āsanā tamhā pakkāmi pācināmukho.
|288.27| Catunavute ito kappe upaṭṭhākamadaṃ tadā
duggatiṃ nābhijānāmi upaṭṭhānassidaṃ phalaṃ.
|288.28| Sattapaññāsito kappe balasenasanāmako
sattaratanasampanno cakkavatti mahabbalo.
|288.29| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā upaṭṭhāyiko thero imā gāthāyo
abhāsitthāti.
Upaṭṭhāyikattherassa apadānaṃ samattaṃ.
Sattamaṃ apadāniyattherāpadānaṃ (287)
[289] |289.30| Apadānaṃ sugatānaṃ kittayiṃhaṃ 2- mahesinaṃ
pāde ca sirasā vandiṃ pasanno sehi pāṇihi.
@Footnote: 1 Ma. niyyādesi. 2 Po. Yu. kittayissaṃ.
|289.31| Dvenavute ito kappe apadānaṃ pakittayiṃ
duggatiṃ nābhijānāmi kittanāya idaṃ phalaṃ.
|289.32| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā apadāniyo thero imā gāthāyo
abhāsitthāti.
Apadāniyattherassa apadānaṃ samattaṃ.
Aṭṭhamaṃ sattāhapabbajitattherāpadānaṃ (288)
[290] |290.33| Vipassissa bhagavato saṅgho sakkatamānito
byasanaṃ me anuppattaṃ ñātibhedo pure ahu.
|290.34| Pabbajjaṃ upagantvāna byasanupasamāyahaṃ
sattāhābhirato tattha satthusāsanakamyatā.
|290.35| Ekanavute ito kappe yamahaṃ pabbajiṃ tadā
duggatiṃ nābhijānāmi pabbajjāya idaṃ phalaṃ.
|290.36| Sattasaṭṭhimhito kappe satta āsuṃ mahīpatī
sunekkhammāti ñāyanti cakkavattī mahabbalā.
|290.37| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā sattāhapabbajito thero imā gāthāyo
abhāsitthāti.
Sattāhapabbajitattherassa apadānaṃ samattaṃ.
Navamaṃ buddhupaṭṭhāyikattherāpadānaṃ (289)
[291] |291.38| Vedhambhinīti 1- me nāmaṃ pitu santaṃ mamaṃ tadā
mama hatthaṃ gahetvāna upānayi mahāmuniṃ.
|291.39| Ime maṃ uddisiyanti buddhā lokagganāyakā
tehaṃ upaṭṭhi 2- sakkaccaṃ pasanno sehi pāṇihi.
|291.40| Ekattiṃse ito kappe buddhe paricariṃ 3- tadā
duggatiṃ nābhijānāmi upaṭṭhānassidaṃ phalaṃ.
|291.41| Tevīsamhi ito kappe caturo āsu khattiyā
samaṇupaṭṭhakā nāma cakkavattī mahabbalā.
|291.42| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā buddhupaṭṭhāyiko thero imā gāthāyo
abhāsitthāti.
Buddhupaṭṭhāyikattherassa apadānaṃ samattaṃ.
@Footnote: 1 Ma. veṭambhinīti ---. Yu. veṭambarīti me nāma. 2 Po. Ma. upaṭṭhiṃ.
@Yu. upaṭṭhahiṃ. 3 Ma. upaṭṭhahiṃ.
Dasamaṃ pubbaṅgamaniyattherāpadānaṃ (290)
[292] |292.43| Cullāsītisahassāni pabbajimha akiñcanā
tesaṃ pubbaṅgamo āsiṃ uttamatthassa pattiyā.
|292.44| Sarāgā samohā 1- cete vippasannamanāvilaṃ 2-
upaṭṭhahiṃsu sakkaccaṃ pasannā sehi pāṇihi.
|292.45| Khīṇāsavā vantadosā katakiccā anāsavā
phariṃsu mettacittena sayambhū aparājitā.
|292.46| Tesaṃ upaṭṭhahitvāna sambuddhānaṃ paṭissato
maraṇañca anuppattā 3- devattañca agamhase.
|292.47| Catunavute ito kappe yaṃ sīlamanupālayiṃ
duggatiṃ nābhijānāmi saññamassa idaṃ phalaṃ.
|292.48| Paṭisambhidā catasso vimokkhāpica aṭṭhime.
Chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā pubbaṅgamaniyo thero imā gāthāyo
abhāsitthāti.
Pubbaṅgamaniyattherassa apadānaṃ samattaṃ.
Uddānaṃ
paṇṇaṃ phalaṃ uggamiyo ekapupphī ca māghavo
@Footnote: 1 Ma. -- sabhavā ---. Yu. --- sabhavā loke. 2 Ma. vippasannamanāvilā.
@3 Ma. Yu. anupatto.
Upaṭṭhākopadānañca pabbajjā ca upaṭṭhitaṃ.
Pubbaṅgamo ca gāthāyo aṭṭhatāḷīsa kittitā.
Paṇṇadāyakavaggo ekūnatiṃso.
------
The Pali Tipitaka in Roman Character Volume 32 page 365-371.
http://84000.org/tipitaka/pitaka_item/roman_item_s.php?book=32&item=286&items=7
Classified by [Item Number] :-
http://84000.org/tipitaka/pitaka_item/roman_item_s.php?book=32&item=286&items=7&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=32&item=286&items=7
Compare with The Royal Version of Thai Tipitaka :-
http://84000.org/tipitaka/read/byitem_s.php?book=32&item=286&items=7
Study Atthakatha :-
http://84000.org/tipitaka/attha/attha.php?b=32&i=286
The Pali Atthakatha in Thai :-
http://84000.org/tipitaka/atthapali/read_th.php?B=50&A=5095
The Pali Atthakatha in Roman :-
http://84000.org/tipitaka/atthapali/read_rm.php?B=50&A=5095
Contents of The Tipitaka Volume 32
http://84000.org/tipitaka/read/?index_32
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
