Sattattiṃso mandāravapupphiyavaggo
paṭhamaṃ mandāraviyattherāpadānaṃ (361)
[363] |363.1| Tāvatiṃsā idhāgantvā maṅgalo nāma māṇavo
mandāravaṃ gahetvāna vipassissa mahesino.
|363.2| Samādhinā nisinnassa matthake dhārayiṃ ahaṃ
sattāhaṃ dhārayitvāna devalokaṃ punāgamiṃ.
|363.3| Ekanavute ito kappe yaṃ buddhaṃ 1- abhipūjayiṃ
duggatiṃ nābhijānāmi buddhapūjāyidaṃ phalaṃ.
|363.4| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā mandāraviyo thero imā gāthāyo
abhāsitthāti.
Mandāraviyattherassa apadānaṃ samattaṃ.
Dutiyaṃ kakkārupupphiyattherāpadānaṃ (362)
[364] |364.5| Yāmā devā idhāgantvā gotamaṃ sirivacchayaṃ 2-
kakkārupupphaṃ 3- paggayha buddhassa abhiropayiṃ.
|364.6| Dvenavute ito kappe yaṃ pupphaṃ 4- abhipūjayiṃ
duggatiṃ nābhijānāmi buddhapūjāyidaṃ phalaṃ.
@Footnote: 1 Ma. ... pupphamabhipūjayiṃ. 2 Ma. Yu. sirivacchasaṃ. 3 Ma. kakkārumālaṃ.
@Yu. kekkhārupupphaṃ. 4 Ma. Yu. buddhaṃ.
|364.7| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā kakkārupupphiyo thero imā gāthāyo
abhāsitthāti.
Kakkārupupphiyattherassa apadānaṃ samattaṃ.
Tatiyaṃ bhisamuḷāladāyakattherāpadānaṃ (363)
[365] |365.8| Phusso nāmāsi sambuddho sabbadhammāna pāragū
vivekakāmo sappañño 1- āgacchi mama santike.
|365.9| Tasmiṃ cittaṃ pasādetvā mahākāruṇike jine
bhisamuḷālaṃ paggayha buddhaseṭṭhassadāsahaṃ.
|365.10| Dvenavute ito kappe yaṃ bhisaṃ adadiṃ tadā
duggatiṃ nābhijānāmi bhisadānassidaṃ phalaṃ.
|365.11| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā bhisamuḷāladāyako thero imā gāthāyo
abhāsitthāti.
Bhisamuḷāladāyakattherassa apadānaṃ samattaṃ.
@Footnote: 1 Ma. sabbaññū. Yu. supañño.
Catutthaṃ kesarapupphiyattherāpadānaṃ (364)
[366] |366.12| Vijjādharo tadā āsiṃ himavantamhi pabbate
addasaṃ virajaṃ buddhaṃ caṅkamantaṃ mahāyasaṃ.
|366.13| Tīṇi kesarapupphāni sīse katvānahaṃ tadā
upasaṅkamma sambuddhaṃ vessabhuṃ abhipūjayiṃ.
|366.14| Ekattiṃse ito kappe yaṃ kammamakariṃ tadā
duggatiṃ nābhijānāmi buddhapūjāyidaṃ phalaṃ.
|366.15| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā kesarapupphiyo thero imā gāthāyo
abhāsitthāti.
Kesarapupphiyattherassa apadānaṃ samattaṃ.
Pañcamaṃ aṅkolapupphiyattherāpadānaṃ (365)
[367] |367.16| Padumo nāma sambuddho cittakūṭe vasī tadā
disvāna tamahaṃ buddhaṃ sayambhuṃ upagañchahaṃ 1-.
|367.17| Aṅkolaṃ pupphitaṃ disvā ocinitvānahaṃ tadā
upagantvāna sambuddhaṃ pūjesiṃ padumaṃ jinaṃ.
|367.18| Ekattiṃse ito kappe yaṃ kammamakariṃ 2- tadā
duggatiṃ nābhijānāmi buddhapūjāyidaṃ phalaṃ.
@Footnote: 1 Ma. aparājitaṃ. 2 Ma. Yu. ... pupphamabhipūjayiṃ.
|367.19| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā aṅkolapupphiyo thero imā gāthāyo
abhāsitthāti.
Aṅkolapupphiyattherassa apadānaṃ samattaṃ.
Chaṭṭhaṃ kadambapupphiyattherāpadānaṃ (366)
[368] |368.20| Suvaṇṇavaṇṇaṃ sambuddhaṃ gacchantaṃ antarāpaṇe
kañcanagghiyasaṅkāsaṃ dvattiṃsavaralakkhaṇaṃ.
|368.21| Nisajja pāsādavare addasaṃ lokanāyakaṃ
kadambapupphaṃ paggayha vipassiṃ abhipūjayiṃ.
|368.22| Ekanavute ito kappe yaṃ pupphamabhipūjayiṃ 1-
duggatiṃ nābhijānāmi buddhapūjāyidaṃ phalaṃ.
|368.23| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā kadambapupphiyo thero imā gāthāyo
abhāsitthāti.
Kadambapupphiyattherassa apadānaṃ samattaṃ.
@Footnote: 1 Ma. ... buddhamabhipūjayiṃ.
Sattamaṃ uddālakapupphiyattherāpadānaṃ (367)
[369] |369.24| Sujāto 1- nāma sambuddho gaṅgākūle vasī tadā
uddālakaṃ gahetvāna pūjayiṃ aparājitaṃ.
|369.25| Ekattiṃse ito kappe yaṃ pupphaṃ abhipūjayiṃ
duggatiṃ nābhijānāmi buddhapūjāyidaṃ phalaṃ.
|369.26| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā uddālakapupphiyo thero imā gāthāyo
abhāsitthāti.
Uddālakapupphiyattherassa apadānaṃ samattaṃ.
Aṭṭhamaṃ ekacampakapupphiyattherāpadānaṃ (368)
[370] |370.27| Upasanto ca 2- sambuddho vasati pabbatantare
ekacampakamādāya upagañchiṃ naruttamaṃ.
|370.28| Pasannacitto sumano paccekamunimuttamaṃ
ubhohatthehi paggayha pūjayiṃ aparājitaṃ.
|370.29| Ekattiṃse 3- ito kappe yaṃ pupphamabhipūjayiṃ
duggatiṃ nābhijānāmi buddhapūjāyidaṃ phalaṃ.
@Footnote: 1 Ma. anomo nāma. Yu. anātho. 2 Yu. va. 3 Ma. pañcasaṭṭhimhito kappe.
|370.30| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ekacampakapupphiyo thero imā gāthāyo
abhāsitthāti.
Ekacampakapupphiyattherassa apadānaṃ samattaṃ.
Navamaṃ timirapupphiyattherāpadānaṃ (369)
[371] |371.31| Candabhāgānadītīre anusotaṃ vajāmahaṃ
addasaṃ virajaṃ buddhaṃ sālarājaṃva pupphitaṃ 1-.
|371.32| Pasannacitto sumano paccekamunimuttamaṃ
gahetvā timiraṃ pupphaṃ matthake okiriṃ ahaṃ.
|371.33| Ekanavute ito kappe yaṃ pupphamabhipūjayiṃ
duggatiṃ nābhijānāmi buddhapūjāyidaṃ phalaṃ.
|371.34| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā timirapupphiyo thero imā gāthāyo
abhāsitthāti.
Timirapupphiyattherassa apadānaṃ samattaṃ.
@Footnote: 1 Ma. Yu. phullitaṃ.
Dasamaṃ salaḷapupphiyattherāpadānaṃ (370)
[372] |372.35| Candabhāgānadītīre ahosiṃ kinnaro tadā
athaddasaṃ 1- devadevaṃ caṅkamantaṃ narāsabhaṃ.
|372.36| Ocinitvāna salaḷaṃ buddhaseṭṭhassadāsahaṃ 2-
upasiṅghi mahāvīro salaḷaṃ devagandhikaṃ.
|372.37| Paṭiggahetvā sambuddho vipassī lokanāyako
upasiṅghi mahāvīro pekkhamānassa me tadā 3-.
|372.38| Pasannacitto sumano vanditvā dipaduttamaṃ
añjaliṃ paggahetvāna puna pabbatamāruhiṃ.
|372.39| Ekanavute ito kappe yaṃ pupphamabhipūjayiṃ
duggatiṃ nābhijānāmi buddhapūjāyidaṃ phalaṃ.
|372.40| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā salaḷapupphiyo thero imā gāthāyo
abhāsitthāti.
Salaḷapupphiyattherassa apadānaṃ samattaṃ.
Uddānaṃ
mandāravañca kakkāru bhisakesarapupphiyo
@Footnote: 1 Ma. tatthaddasaṃ. 2 Ma. Yu. pupphaṃ buddhassadāsahaṃ. 3 Ma. sato.
Aṅkolako kadambī ca uddālaṃ ekacampako
timiraṃ salaḷañceva gāthā tāḷīsameva ca.
Mandāravapupphiyavaggo sattattiṃso.
-----------
The Pali Tipitaka in Roman Character Volume 32 page 446-453.
http://84000.org/tipitaka/pitaka_item/roman_item_s.php?book=32&item=363&items=10
Classified by [Item Number] :-
http://84000.org/tipitaka/pitaka_item/roman_item_s.php?book=32&item=363&items=10&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=32&item=363&items=10
Compare with The Royal Version of Thai Tipitaka :-
http://84000.org/tipitaka/read/byitem_s.php?book=32&item=363&items=10
Study Atthakatha :-
http://84000.org/tipitaka/attha/attha.php?b=32&i=363
Contents of The Tipitaka Volume 32
http://84000.org/tipitaka/read/?index_32
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
