Catutthaṃ sakulātheriyāpadānaṃ (24)
[164] |164.131| Padumuttaro nāma jino sabbadhammāna pāragū
ito satasahassamhi kappe uppajji nāyako.
|164.132| Hitāya sabbasattānaṃ sukhāya vadataṃ varo
atthāya purisājañño paṭipanno sadevake.
|164.133| Yasaggappatto sirimā kittivaṇṇabhato 1- jino
pūjito 2- sabbalokassa disā sabbā suvissuto.
|164.134| Uttiṇṇavicikiccho so vītivattakathaṃkatho
sampuṇṇamanasaṅkappo patto sambodhimuttamaṃ.
|164.135| Anuppannassa maggassa uppādetā naruttamo
anakkhātañca akkhāsi asañjātañca sañjanī.
|164.136| Maggaññū ca maggavidū maggakkhāyī narāsabho
maggassa kusalo satthā sārathīnaṃ varuttamo.
|164.137| Mahākāruṇiko nātho 3- dhammaṃ deseti nāyako
nimugge kāmapaṅkamhi 4- samuddharati pāṇino.
|164.138| Tadāhaṃ haṃsavatiyaṃ jātā khattiyanandanā
surūpā sadhanā cāpi 5- dayitā ca 6- sirīmatī.
|164.139| Ānandassa mahārañño dhītā paramasobhanā
vemātā bhaginī cāpi padumuttaranāmino.
@Footnote: 1 Ma. Yu. kittivaṇṇagato. 2 Yu. jino sabbassa lokassa. 3 Ma. Yu. satthā.
@4 Yu. mohapaṅkamhi. 5 Yu. sadhanā ṭhāsiṃ. 6 Yu. va.
|164.140| Rājakaññāhi sahitā sabbābharaṇabhūsitā
upagamma 1- mahāvīraṃ assosiṃ dhammadesanaṃ.
|164.141| Tadā hi so lokavidū 2- bhikkhuniṃ dibbacakkhukaṃ 3-
catuparisāya 4- majjhe aggaṭṭhāne ṭhapesi taṃ.
|164.142| Suṇitvā tamahaṃ haṭṭhā dānaṃ datvāna satthuno
pūjetvāna ca sambuddhaṃ dibbacakkhuṃ apatthayiṃ.
|164.143| Tato avoca maṃ satthā nande lacchasi patthitaṃ
padīpadhammadānānaṃ phalametaṃ sunicchitaṃ.
|164.144| Satasahasse ito kappe okkākakulasambhavo
gotamo nāma nāmena satthā loke bhavissati.
|164.145| Tassa dhammesu dāyādā orasā dhammanimmitā
sakulāti 5- ca nāmena hessasi satthusāvikā.
|164.146| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|164.147| Imamhi bhaddake kappe brahmabandhu mahāyaso
kassapo nāma nāmena uppajji vadataṃ varo.
|164.148| Paribbājikinī 6- āsiṃ tadāhaṃ ekacārinī
bhikkhāya vicaritvāna alabhiṃ telamattakaṃ.
|164.149| Tena dīpaṃ padīpetvā 7- upaṭṭhiṃ sabbasaṃvaraṃ 8-
cetiyaṃ dipadaggassa vippasannena cetasā.
@Footnote: 1 Ma. upāgamma. 2 Ma. lokagaru. Yu. lokagurū. 3 Yu. dibbacakkhukiṃ.
@4 Ma. kittayaṃ parisāmajjhe. Yu. kittayī.... 5 Ma. Yu. sakulā nāma nāmena.
@6 Ma. paribbājakinī. 7 Yu. pajāle2tvā. 8 Ma. sabbasaṃvariṃ.
|164.150| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|164.151| Yattha yatthūpapajjāmi tassa kammassa vāhasā
sañjalanti 1- mahādīpā tattha tattha gatāya me.
|164.152| Tirokuḍḍaṃ tiroselaṃ samatiggayha pabbataṃ
passāmahaṃ yadicchāmi dīpadānassidaṃ phalaṃ.
|164.153| Visuddhanayanā homi yasasā pajjalāmahaṃ 2-
saddhā paññavatī 3- ceva dīpadānassidaṃ phalaṃ.
|164.154| Pacchime ca bhave dāni jātā vippakule ahaṃ
pahūtadhanadhaññamhi mudite rājapūjite.
|164.155| Ahaṃ sabbaṅgasampannā sabbābharaṇabhūsitā
purappavese sugataṃ vātapāne ṭhitā ahaṃ.
|164.156| Disvā jalantaṃ yasasā devamanussasakkataṃ
anubyañjanasampannaṃ lakkhaṇehi vibhūsitaṃ.
|164.157| Udaggacittā sumanā pabbajjaṃ samarocayiṃ
na cireneva kālena arahattaṃ apāpuṇiṃ.
|164.158| Iddhīsu ca vasī homi dibbāya sotadhātuyā
paracittāni jānāmi satthusāsanakārikā.
|164.159| Pubbenivāsaṃ jānāmi dibbacakkhuṃ visodhitaṃ
khepetvā āsave sabbe visuddhāsiṃ sunimmalā.
@Footnote: 1 Ma. pajjalanti. 2 Ma. Yu. ca jalāmahaṃ. 3 Yu. paññā satī ceva.
|164.160| Pariciṇṇo mayā satthā kataṃ buddhassa sāsanaṃ
ohito garuko bhāro bhavanetti samūhatā.
|164.161| Yassatthāya pabbajitā agārasmā anagāriyaṃ
so me attho anuppatto sabbasaṃyojanakkhayo.
|164.162| Tato mahākāruṇiko etadagge ṭhapesi maṃ
dibbacakkhukānaṃ 1- aggā sakulāti naruttamo.
|164.163| Kilesā jhāpitā mayhaṃ bhavā sabbe samūhatā
nāgīva bandhanaṃ chetvā viharāmi anāsavā.
|164.164| Svāgataṃ vata me āsi buddhaseṭṭhassa santike
tisso vijjā anuppattā kataṃ buddhassa sāsanaṃ.
|164.165| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ sakulā bhikkhunī imā gāthāyo abhāsitthāti.
Sakulātheriyā apadānaṃ samattaṃ.
The Pali Tipitaka in Roman Character Volume 33 page 339-342.
http://84000.org/tipitaka/pitaka_item/roman_item_s.php?book=33&item=164&items=1
Classified by [Item Number] :-
http://84000.org/tipitaka/pitaka_item/roman_item_s.php?book=33&item=164&items=1&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=164&items=1
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=164&items=1
Study Atthakatha :-
http://84000.org/tipitaka/attha/attha.php?b=33&i=164
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
