Dasamaṃ bodhigharakārakattherāpadānaṃ 1- (450)
[40] |40.68| Siddhatthassa bhagavato dipadindassa tādino
pasannacitto sumano bodhigharamakārayiṃ.
|40.69| Tussitaṃ upapannomhi vasāmi ratane ghare
na me sītaṃ va uṇhaṃ vā vāto gatte na samphuse.
|40.70| Pañcasaṭṭhimhito kappe cakkavatti ahosahaṃ
kāsikaṃ nāma nagaraṃ visukammena māpitaṃ.
|40.71| Dasayojanaāyāmaṃ aṭṭhayojanavitthataṃ
na tamhi nagare atthi kaṭṭhaṃ vallī ca mattikā.
|40.72| Tiriyaṃ yojanaṃ āsi aḍḍhayojanavitthataṃ
maṅgalo nāma pāsādo visukammena māpito.
|40.73| Cūḷāsītisahassāni thambhā sovaṇṇiyā ahu
maṇimayā ca niyyūhā chadanaṃ rūpiyaṃ ahu.
|40.74| Sabbasoṇṇamayaṃ gharaṃ visukammena māpitaṃ
ajjhāvutthaṃ mayā etaṃ gharadānassidaṃ phalaṃ.
|40.75| Te sabbe anubhotvāna devamānusake bhave
ajja pattomhi nibbānaṃ santipadaṃ anuttaraṃ.
|40.76| Tiṃsakappasahassamhi bodhigharamakārayiṃ
@Footnote: 1 Ma. bodhigharadāyatthera .... Yu. bodhighariyatthera ....
Duggatiṃ nābhijānāmi gharadānassidaṃ phalaṃ.
|40.77| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|40.78| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|40.79| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā bodhigharakārako thero imā gāthāyo abhāsitthāti.
Bodhigharakārakattherassa apadānaṃ samattaṃ.
Uddānaṃ
vibhedaki kolaphali billabhallātakappado
ummā ambāṭaki ceva āsani pādapīṭhako.
Vedikā bodhighariko gāthāyo gaṇitāpica
ekūnāsītikā sabbā asmiṃ vagge pakittitā.
Vibhedakivaggo pañcacattāḷīso.
---------------------
The Pali Tipitaka in Roman Character Volume 33 page 65-66.
http://84000.org/tipitaka/pitaka_item/roman_item_s.php?book=33&item=40&items=1
Classified by [Item Number] :-
http://84000.org/tipitaka/pitaka_item/roman_item_s.php?book=33&item=40&items=1&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=40&items=1
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=40&items=1
Study Atthakatha :-
http://84000.org/tipitaka/attha/attha.php?b=33&i=40
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
