Sattacattāḷīso sālapupphivaggo
paṭhamaṃ sālakusumiyattherāpadānaṃ (461)
[51] |51.1| Parinibbute bhagavati jalajuttamanāmake
āropitamhi citake sālapupphaṃ apūjayiṃ.
|51.2| Satasahasse ito kappe yaṃ pupphamabhipūjayiṃ
duggatiṃ nābhijānāmi citapūjāyidaṃ phalaṃ.
|51.3| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|51.4| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|51.5| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā sālakusumiyo thero imā gāthāyo abhāsitthāti.
Sālakusumiyattherassa apadānaṃ samattaṃ.
Dutiyaṃ citakapūjakattherāpadānaṃ (462)
[52] |52.6| Jhāyamānassa bhagavato sikhino lokabandhuno
aṭṭha campakapupphāni citakaṃ abhiropayiṃ.
|52.7| Ekatiṃse ito kappe yaṃ pupphaṃ abhiropayiṃ
Duggatiṃ nābhijānāmi buddhapūjāyidaṃ 1- phalaṃ.
|52.8| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|52.9| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|52.10| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā citakapūjako thero imā gāthāyo abhāsitthāti.
Citakapūjakattherassa apadānaṃ samattaṃ.
Tatiyaṃ citakanibbāpakattherāpadānaṃ (463)
[53] |53.11| Ḍayhamāne sarīramhi vessabhussa mahesino
gandhodakaṃ gahetvāna citaṃ nibbāpayiṃ ahaṃ.
|53.12| Ekattiṃse ito kappe citaṃ nibbāpayiṃ ahaṃ
duggatiṃ nābhijānāmi gandhodakassidaṃ phalaṃ.
|53.13| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|53.14| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
@Footnote: 1 Ma. Yu. citapūjāyidaṃ phalaṃ.
|53.15| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā citakanibbāpako thero imā gāthāyo abhāsitthāti.
Citakanibbāpakattherassa apadānaṃ samattaṃ.
Catutthaṃ setudāyakattherāpadānaṃ (464)
[54] |54.16| Vipassino bhagavato caṅkamantassa sammukhā
pasannacitto sumano setuṃ kārāpayiṃ ahaṃ.
|54.17| Ekanavute ito kappe yaṃ setuṃ kārayiṃ ahaṃ
duggatiṃ nābhijānāmi setudānassidaṃ phalaṃ.
|54.18| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|54.19| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|54.20| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā setudāyako thero imā gāthāyo abhāsitthāti.
Setudāyakattherassa apadānaṃ samattaṃ.
Pañcamaṃ sumanatālavaṇṭiyattherāpadānaṃ (465)
[55] |55.21| Siddhatthassa bhagavato tālavaṇṭaṃ adāsahaṃ
sumanehi paṭicchannaṃ dhārayāmi mahāyasaṃ.
|55.22| Catunavute ito kappe tālavaṇṭaṃ adāsahaṃ
duggatiṃ nābhijānāmi tālavaṇṭassidaṃ phalaṃ.
|55.23| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|55.24| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|55.25| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā sumanatālavaṇṭiyo thero imā gāthāyo abhāsitthāti.
Sumanatālavaṇṭiyattherassa apadānaṃ samattaṃ.
Chaṭṭhaṃ avaṭaphaliyattherāpadānaṃ (466)
[56] |56.26| Sataraṃsī nāma bhagavā sayambhū aparājito
vivekakāmo sambuddho gocarāyābhinikkhami.
|56.27| Phalahattho ahaṃ disvā upagañchiṃ narāsabhaṃ
pasannacitto sumano adāsiṃ avaṭaṃ phalaṃ.
|56.28| Catunavute ito kappe yaṃ phalaṃ adadiṃ tadā
duggatiṃ nābhijānāmi phaladānassidaṃ phalaṃ.
|56.29| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|56.30| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|56.31| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā avaṭaphaliyo thero imā gāthāyo abhāsitthāti.
Avaṭaphaliyattherassa apadānaṃ samattaṃ.
Sattamaṃ labujaphaladāyakattherāpadānaṃ (467)
[57] |57.32| Nagare bandhumatiyā ārāmiko ahaṃ tadā
addasaṃ virajaṃ buddhaṃ gacchantaṃ anilañjase.
|57.33| Labujaphalamādāya buddhaseṭṭhassadāsahaṃ
ākāseva ṭhito santo paṭiggaṇhi mahāyaso.
|57.34| Vittisañjanano 1- mayhaṃ diṭṭhadhamme sukhāvaho
phalaṃ buddhassa datvāna vippasannena cetasā.
|57.35| Adhiggañchiṃ tadā pītiṃ vipulaṃ sukhamuttamaṃ
uppajjate me ratanaṃ nibbattassa tahiṃ tahiṃ.
@Footnote: 1 Yu. vittaṃ sañjanano.
|57.36| Ekanavute ito kappe yaṃ phalaṃ adadiṃ tadā
duggatiṃ nābhijānāmi phaladānassidaṃ phalaṃ.
|57.37| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|57.38| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|57.39| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā labujaphaladāyako thero imā gāthāyo abhāsitthāti.
Labujaphaladāyakattherassa apadānaṃ samattaṃ.
Aṭṭhamaṃ milakkhuphaladāyakattherāpadāna 1- (468)
[58] |58.40| Vanantare 2- buddhaṃ disvā atthadassiṃ mahāyasaṃ
pasannacitto sumano milakkhussa phalaṃ adaṃ.
|58.41| Aṭṭhārase kappasate yaṃ phalaṃ adadiṃ tadā
duggatiṃ nābhijānāmi phaladānassidaṃ phalaṃ.
|58.42| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|58.43| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
@Footnote: 1 Ma. pilakkhaphala.... Yu. pilakkhuphala.... 2 Yu. vanante.
|58.44| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā milakkhuphaladāyako thero imā gāthāyo abhāsitthāti.
Milakkhuphaladāyakattherassa apadānaṃ samattaṃ.
Navamaṃ sayampaṭibhāṇiyattherāpadānaṃ (469)
[59] |59.45| Kakudhaṃ vilasantaṃva devadevaṃ narāsabhaṃ
rathiyaṃ paṭipajjantaṃ ko disvā nappasīdati.
|59.46| Tamandhakāraṃ nāsetvā santāretvā bahuṃ janaṃ
ñāṇālokena jotantaṃ ko disvā nappasīdati.
|59.47| Vasīsatasahassehi niyyantaṃ lokanāyakaṃ
uddharantaṃ ḷahū satte ko disvā nappasīdati.
|59.48| Āhanitvā dhammabheriṃ maddantaṃ titthiye gaṇe
sīhanādaṃ va nadantaṃ ko disvā nappasīdati.
|59.49| Yāvatā brahmalokamhā āgantvāna sabrahmakā
pucchanti nipuṇe pañhe ko disvā nappasīdati.
|59.50| Yassañjaliṃ karitvāna ādhāvanti 1- sadevakā
tena puññaṃ anubhonti ko disvā nappasīdati.
|59.51| Sabbe janā samāgantvā sampavārenti cakkhumaṃ
na vikampati ajjhiṭṭho ko disvā nappasīdati.
@Footnote: 1 Ma. Yu. āyācanti.
|59.52| Nagaraṃ pavīsato yassa nadanti 1- bheriyo bahū
vinadanti gajā 2- mattā ko disvā nappasīdati.
|59.53| Vīthiyā gacchato yassa pabhā 3- vā jotate sadā
abbhunnatā samā honti ko disvā nappasīdati.
|59.54| Byāharantassa buddhassa cakkavāḷamhi *- suyyati
sabbe satte viññāpeti ko disvā nappasīdati.
|59.55| Satasahasse ito kappe yaṃ buddhamabhikittayiṃ
duggatiṃ nābhijānāmi kittanāya idaṃ phalaṃ.
|59.56| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|59.57| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|59.58| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā sayampaṭibhāṇiyo thero imā gāthāyo abhāsitthāti.
Sayampaṭibhāṇiyattherassa apadānaṃ samattaṃ.
Dasamaṃ nimittabyākaraṇiyattherāpadānaṃ (470)
[60] |60.59| Ajjhogahetvā himavantaṃ mante vācemahantadā
catupaññāsasahassāni sissā mayhaṃ upaṭṭhahuṃ.
@Footnote: 1 Ma. ravanti. Yu. ravante. 2 Yu. anugajjā. 3 Ma. Yu. sabbābhā.
@* mīkārkṛ´์ khagœ cakvāḷamhi peḌna cakkavāḷamhi
|60.60| Adhitā vedagū sabbe chaḷaṅge pāramiṃ gatā
sakavijjāhupatthaddhā himavante vasanti te.
|60.61| Cavitvā tusitā kāyā devaputto mahāyaso
uppajji mātukucchismiṃ sampajāno paṭissato.
|60.62| Sambuddhe upapajjante dasasahassi kampatha
andhā cakkhuṃ alabhiṃsu uppajjantamhi nāyake.
|60.63| Chappakāramakampittha 1- kevalā vasudhā ayaṃ
nigghosasaddaṃ sutvāna vimhayiṃsu 2- mahājanā.
|60.64| Sabbe janā samāgamma agañchuṃ mama santike
vasudhāyaṃ pakampittha kiṃvipāko bhavissati.
|60.65| Vidassāmi 3- tadā tesaṃ mā bhāyittha natthi vo bhayaṃ
vissaṭṭhā hotha sabbepi uppādoyaṃ sukhatthiko 4-.
|60.66| Aṭṭhahetūhi samphassā vasudhāyaṃ pakampati
tathā nimittā dissanti obhāso vipulo mahā.
|60.67| Asaṃsayaṃ buddhaseṭṭho uppajjissati cakkhumā
saññāpetvāna janataṃ pañca sīle kathesahaṃ.
|60.68| Sutvāna pañca sīlāni buddhuppādañca dullabhaṃ
ubbeṅgajātā sumanā tuṭṭhahaṭṭhā ahesu te.
|60.69| Dvenavute ito kappe yaṃ nimittaṃ viyākariṃ
duggatiṃ nābhijānāmi byākaraṇassidaṃ phalaṃ.
@Footnote: 1 Ma. sabbākāraṃ pakampittha. Yu. chabbikāraṃ .... 2 Ma. Yu. ubbijjiṃsu.
@3 Ma. avacāsiṃ tadā tesaṃ. Yu. avacāsi .... 4 Ma. suvatthiko.
|60.70| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|60.71| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|60.72| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā nimittabyākaraṇiyo thero imā gāthāyo abhāsitthāti.
Nimittabyākaraṇiyattherassa apadānaṃ samattaṃ.
Uddānaṃ
sālakusumiyo thero pūjā nibbāpakopica
setudo tālavaṇṭi ca avaṭaṃ labujampado
milakkhu paṭibhāṇī ca veyyākaraṇiyo dijā
dvesattati ca gāthāyo gaṇitāyo vibhāvibhi.
Sālapupphivaggo sattacattāḷīso.
-----------------------
Aṭṭhacattāḷīso naḷamālivaggo
The Pali Tipitaka in Roman Character Volume 33 page 77-87.
http://84000.org/tipitaka/pitaka_item/roman_item_s.php?book=33&item=51&items=10
Classified by [Item Number] :-
http://84000.org/tipitaka/pitaka_item/roman_item_s.php?book=33&item=51&items=10&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=51&items=10
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=51&items=10
Study Atthakatha :-
http://84000.org/tipitaka/attha/attha.php?b=33&i=51
The Pali Atthakatha in Thai :-
http://84000.org/tipitaka/atthapali/read_th.php?B=50&A=5513
The Pali Atthakatha in Roman :-
http://84000.org/tipitaka/atthapali/read_rm.php?B=50&A=5513
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
