paliTIPITAKA Volume 4 - Vinaya Pitaka 4

[64] Tena kho pana samayena sañjayo paribbājako rājagahe paṭivasati mahatiyā paribbājakaparisāya saddhiṃ aḍḍhateyyehi paribbājakasatehi . Tena kho pana samayena sārīputtamoggallānā sañjaye paribbājake brahmacariyaṃ caranti . tehi katikā katā hoti yo paṭhamaṃ amataṃ adhigacchati so itarassa ^1- ārocetūti . athakho āyasmā assaji pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisi pāsādikena abhikkantena paṭikkantena ālokitena vilokitena sammiñjitena pasāritena okkhittacakkhu iriyāpathasampanno. {64.1} Addasā kho sārīputto paribbājako āyasmantaṃ assajiṃ rājagahe piṇḍāya carantaṃ pāsādikena abhikkantena paṭikkantena ālokitena vilokitena sammiñjitena pasāritena okkhittacakkhuṃ iriyāpathasampannaṃ disvānassa etadahosi ye vata loke arahanto vā arahattamaggaṃ vā samāpannā ayaṃ tesaṃ bhikkhu ^2- aññataro yannūnāhaṃ imaṃ bhikkhuṃ upasaṅkamitvā puccheyyaṃ kaṃsi tvaṃ āvuso uddissa pabbajito ko vā te satthā kassa vā tvaṃ dhammaṃ rocesīti . @Footnote: ¹ Sī. Yu. ayaṃ pāṭho na hoti . ² Yu. bhikkhūnaṃ. Athakho sārīputtassa paribbājakassa etadahosi akālo kho imaṃ bhikkhuṃ pucchituṃ antaragharaṃ paviṭṭho piṇḍāya carati yannūnāhaṃ imaṃ bhikkhuṃ piṭṭhito piṭṭhito anubandheyyaṃ atthikehi upaññātaṃ ^1- magganti . athakho āyasmā assaji rājagahe piṇḍāya caritvā piṇḍapātaṃ ādāya paṭikkami . athakho sārīputto paribbājako yenāyasmā assaji tenupasaṅkami upasaṅkamitvā āyasmatā assajinā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ aṭṭhāsi. {64.2} Ekamantaṃ ṭhito kho sārīputto paribbājako āyasmantaṃ assajiṃ etadavoca vippasannāni kho te āvuso indriyāni parisuddho chavivaṇṇo pariyodāto kaṃsi tvaṃ āvuso uddissa pabbajito ko vā te satthā kassa vā tvaṃ dhammaṃ rocesīti . atthāvuso mahāsamaṇo sakyaputto sakyakulā pabbajito tāhaṃ bhagavantaṃ uddissa pabbajito so ca me bhagavā satthā tassa cāhaṃ bhagavā dhammaṃ rocemīti. Kiṃvādī panāyasmato satthā kimakkhāyīti . ahaṃ kho āvuso navo acirapabbajito adhunāgato imaṃ dhammavinayaṃ na tāhaṃ sakkomi vitthārena dhammaṃ desetuṃ apica te saṅkhittena atthaṃ vakkhāmīti ^2-. @Footnote: ¹ Ma. upañātaṃ. ito paraṃ īdisameva . ² ito paraṃ sīhalapotthakaṃ ṭhapetvā sabbattha @athakho sārīputto paribbājako āyasmantaṃ assajiṃ etadavoca hotu āvuso appaṃ vā @bahuṃ vā bhāsassu .pe. bahunti dissati. taṃ atirekaṃ khāyati purato athakhohaṃ assajiṃ @bhikkhuṃ etadavocanti sabbattha adissamānattā. Appaṃ vā bahuṃ vā bhāsassu atthaṃyeva me brūhi attheneva me attho kiṃ kāhasi byañjanaṃ bahunti.

The Pali Tipitaka in Roman Character Volume 4 page 72-74. http://84000.org/tipitaka/pitaka_item/roman_item_s.php?book=4&item=64&items=1 Classified by [Item Number] :- http://84000.org/tipitaka/pitaka_item/roman_item_s.php?book=4&item=64&items=1&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=4&item=64&items=1 Compare with The Royal Version of Thai Tipitaka :- http://84000.org/tipitaka/read/byitem_s.php?book=4&item=64&items=1 Study Atthakatha :- http://84000.org/tipitaka/attha/attha.php?b=4&i=64 The Pali Atthakatha in Thai :- http://84000.org/tipitaka/atthapali/read_th.php?B=3&A=625 The Pali Atthakatha in Roman :- http://84000.org/tipitaka/atthapali/read_rm.php?B=3&A=625 Contents of The Tipitaka Volume 4 http://84000.org/tipitaka/read/?index_4