อรรถกถาเล่มที่ ๑๑ หน้าที่ ๑๐๙.

ปเรสญฺจ อมธุรํ เทติ, โส ทานสงฺขาตสฺส เทยฺยธมฺมสฺส ทาโส หุตฺวา เทติ. โย ยํ อตฺตนา ภุญฺชติ, ตเทว เทติ, โส สหาโย หุตฺวา เทติ. โย ปน อตฺตนา เยน เตน ยาเปติ, ปเรสญฺจ ^๑- มธุรํ เทติ, โส ปติ เชฏฺฐโก สามี หุตฺวา เทติ. "อหํ ตาทิโส อโหสินฺ"ติ วทติ. จตูสุ ทฺวาเรสูติ ตสฺส กิร รญฺโญ สินฺธวรฏฺฐํ โสวีรกรฏฺฐนฺติ ^๒- เทฺว รฏฺฐานิ อเหสุํ, นครํ โรรุวํ นาม. ตสฺส เอเกกสฺมึ ทฺวาเร เทวสิกํ สตสหสฺสํ อุปฺปชฺชติ, อนฺโต นคเร วินิจฺฉยฏฺฐาเน สตสหสฺสํ. โส พหุหิรญฺญสุวณฺณํ ราสิภูตํ ทิสฺวา กมฺมสฺสกตญาณํ อุปฺปาเทตฺวา จตูสุ ทฺวาเรสุ ทานสาลา ^๓- กาเรตฺวา ตสฺมึ ตสฺมึ ทฺวาเร อุฏฺฐิตทาเยน ^๔- ทานํ เทถาติ อมจฺเจ ฐเปติ. ^๕- เตนาห "จตูสุ ทฺวาเรสุ ทานํ ทียิตฺถา"ติ. สมณพฺราหฺมณกปณทฺธิกวณิพฺพกยาจกานนฺติ เอตฺถ สมณาติ ปพฺพชฺชูปคตา. พฺราหฺมณาติ โภวาทิโน. สมิตปาปวาหิตปาเป ปน สมณพฺราหฺมเณ เอส นาลตฺถ. กปณาติ ทุคฺคตา ทลิททมนุสฺสา กาณกุณิอาทโย. อทฺธิกาติ ปถาวิโน. วณิพฺพกาติ เย "อิฏฺฐํ ทินฺนํ, กนฺตํ, มนาปํ, กาเลน, อนวชฺชํ ทานํ, ^๖- ททํ จิตฺตํ ปสาเทยฺย, คจฺฉตุ ภวํ พฺรหฺมโลกนฺ"ติอาทินา นเยน ทานสฺส วณฺณํ โถมยมานา วิจรนฺติ. ยาจกาติ เย "ปสตมตฺตํ เทถ, สราวมตฺตํ เทถา"ติอาทีนิ วตฺวา ยาจมานา วิจรนฺติ. อิตฺถาคารสฺส ทานํ ทียิตฺถาติ ปฐมทฺวารสฺส ลทฺธตฺตา ตตฺถ อุปฺปชฺชนกสตสหสฺเส อญฺญํปิ ธนํ ปกฺขิปิตฺวา รญฺโญ อมจฺเจ หาเรตฺวา อตฺตโน อมจฺเจ ฐเปตฺวา รญฺญา ทินฺนทานโต ราชิตฺถิโย มหนฺตตรํ ทานํ อทํสุ. ตํ สนฺธาเยวมาห. มม ทานํ ปฏิกฺกมีติ ยํ มม ทานํ ตตฺถ ทียิตฺถ, ตํ ปฏินิวตฺตํ. ^๗- เสสทฺวาเรสุปิ เอเสว นโย. โกจีติ กตฺถจิ. ทีฆรตฺตนฺติ อสีติวสฺสสหสฺสานิ. เอตฺตกํ กิร กาลํ ตสฺส รญฺโญ ทานํ ทียิตฺถ. ตติยํ. จตุตฺถํ วุตฺตตฺถเมว. @เชิงอรรถ: ^๑ ฉ.ม., อิ. จ-สทฺโท น ทิสฺสติ ^๒ ฉ.ม. โสธิวากรฏฺฐนฺติ, อิ., ม. โสธิกรฏฺฐนฺติ @^๓ ฉ.ม., อิ. ทานสาลาโย ^๔ ฉ.ม., อิ...... อาเยน ^๕ ฉ.ม., อิ. ฐเปสิ @^๖ ฉ.ม., อิ. ทินฺนํ ^๗ ฉ.ม., อิ. ปฏินิวตฺติ

เนื้อความอรรถกถาฉบับภาษาบาลี อักษรไทย เล่มที่ ๑๑ หน้าที่ ๑๐๙. http://84000.org/tipitaka/read/attha_page.php?book=11&page=109&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=11&A=2852&modeTY=2&pagebreak=1 http://84000.org/tipitaka/atthapali/th_line.php?B=11&A=2852&modeTY=2&pagebreak=1#p109