อรรถกถาเล่มที่ ๑๑ หน้าที่ ๑๔๕.

โกกนทนฺติ ปทุมสฺเสเวตํ เววจนํ. ปาโตติ กาลสฺเสว. สิยาติ ภเวยฺย. อวีตคนฺธนฺติ อวิคตคนฺธํ. องฺคีรสนฺติ สมฺมาสมฺพุทฺธํ. ภควโต หิ องฺคโต รํสิโย ^๑- นิกฺขมนฺติ, ตสฺมา องฺคีรโสติ วุจฺจติ. ยถา โกกนทสงฺขาตํ ปทุมํ ปาโตว ผุลฺลํ อวีตคนฺธํ สุคนฺธํ ^๒- สิยา, เอวเมว ภควนฺตํ องฺคีรสํ ตปนฺตํ อาทิจฺจมิว อนฺตลิกฺเข วิโรจมานํ ปสฺสาติ อยเมตฺถ สงฺเขปตฺโถ. ภควนฺตํ อจฺฉาเทสีติ ภควโต อทาสีติ อตฺโถ. โลกโวหารโต ปเนตฺถ อีทิสํ วจนํ โหติ. โส กิร อุปาสโก "เอเต ตถาคตสฺส คุเณสุ ปสีทิตฺวา มยฺหํ ปญฺจ อุตฺตราสงฺเค เทนฺติ, อหํ เอเต ^๓- ภควโตว ทสฺสามี"ติ จินฺเตตฺวา อทาสิ. ทุติยํ. ๓. โทณปากสุตฺตวณฺณนา [๑๒๔] ตติเย ^๔- โทณปากสุทนฺติ โทณปากํ สุทํ. ^๔- โทณสฺส ตณฺฑุลานํ ปกฺกภตฺตํ ตทุปิยญฺจ สูปพฺยญฺชนํ ภุญฺชตีติ อตฺโถ. ภุตฺตาวีติ ปุพฺเพ ภตฺตสมฺมทํ วิโนเทตฺวา มุหุตฺตํ วิสฺสเมตฺวา พุทฺธุปฏฺฐานํ คจฺฉติ, ตํทิวสมฺปน ภุญฺชนฺโตว ทสพลํ สริตฺวา หตฺเถ โธวิตฺวาว อคมาสิ. มหสฺสาสีติ ตสฺส คจฺฉโต พลวา ภตฺตปริฬาโห อุทปาทิ, ตสฺมา มหนฺเตหิ อสฺสาเสหิ อสฺสสติ, คตฺตโตปิสฺส เสทพินฺทูนิ มุญฺจนฺติ, ^๕- ตเมนํ อุโภสุ ปสฺเสสุ ฐตฺวา ยมกตาลวณฺเฏหิ พีชนฺติ, พุทฺธคารเวน ปน นิปชฺชิตุํ น อุสฺสหตีติ อิทํ สนฺธาย "มหสฺสาสี"ติ วุตฺตํ. อิมํ คาถํ อภาสีติ ราชา โภชเน อมตฺตญฺญุตาย กิลมติ, ผาสุวิหารํ อิทานิสฺส กริสฺสามีติ จินฺเตตฺวา อภาสิ. มนุชสฺสาติ สตฺตสฺส. กหาปณสตนฺติ ปาตราเส ปณฺณาสํ สายมาเส ปณฺณาสนฺติ เอวํ กหาปณสตํ. ปริยาปุณิตฺวาติ รญฺญา สทฺธึ โถกํ คนฺตฺวา "อิมํ มงฺคลอสึ กสฺส ทมฺมิ มหาราชา"ติ. อสุกสฺส นามาติ วุตฺเต ^๖- โส ตํ อสึ ทตฺวา ^๗- นิวตฺติตฺวา ^๘- ทสพลสฺส สนฺติกํ อาคมฺม วนฺทิตฺวา ฐิตโกว "คาถํ วทถ โภ โคตมา"ติ วตฺวา ภควตา วุตฺตํ ปริยาปุณิตฺวาติ อตฺโถ. @เชิงอรรถ: ^๑ ฉ.ม., อิ. รสฺมิโย ^๒ ฉ.ม., อิ. อยํ ปาโฐ น ทิสฺสติ ^๓ ฉ.ม., อิ. อหมฺปิ เต @^๔-๔ ฉ.ม. โทณปากกุรนฺติ โทณปากํ กุรํ ^๕ ฉ.ม. มุจฺจนฺติ ^๖ ฉ.ม., อิ. นาม เทหีติ @^๗ สี., อิ. อญฺญสฺส ทตฺวา ^๘ ฉ.ม., อิ. อยํ ปาโฐ น ทิสฺสติ

เนื้อความอรรถกถาฉบับภาษาบาลี อักษรไทย เล่มที่ ๑๑ หน้าที่ ๑๔๕. http://84000.org/tipitaka/read/attha_page.php?book=11&page=145&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=11&A=3782&modeTY=2&pagebreak=1 http://84000.org/tipitaka/atthapali/th_line.php?B=11&A=3782&modeTY=2&pagebreak=1#p145