อรรถกถาเล่มที่ ๑๑ หน้าที่ ๑๗๗.

อุปสงฺกมีติ "อชฺช สมณํ โคตมํ อภิวาเทตฺวา อาคมิสฺสามี"ติ ^๑- อุปสงฺกมิ. ฌายสีติ ฌายนฺโต อวชฺฌายนฺโต ^๒- นิสินฺโนสีติ วทติ. วิตฺตํ นุ ชีโนติ สตํ วา สหสฺสํ วา ชิโตสิ นุ. อาคุนฺนุ คามสฺมินฺติ กินฺนุ อนฺโตคาเม ปมาณาติกฺกนฺตํ ปาปกมฺมํ อกาสิ, เยน อญฺเญสํ มุขํ โอโลเกตุํ อวิสหนฺโต อปชฺฌายนฺโต นิสินฺโน ^๓- อรญฺเญ วิจรสิ. สกฺขินฺติ มิตฺตภาวํ. ปลิขายาติ ขนิตฺวา. ภวโลภชปฺปนฺติ ภวโลภสงฺขาตํ ตณฺหํ. อนาสโว ฌายามีติ นิตฺตโณฺห หุตฺวา ทฺวีหิ ฌาเนหิ ฌายามิ. ปมตฺตพนฺธูติ มารํ อาลปติ. โส หิ เย เกจิ โลเก ปมตฺตา, เตสํ พนฺธุ. สเจ มคฺคํ อนุพุทฺธนฺติ ยทิ ตยา ^๔- มคฺโค อนุพุทฺโธ. อเปหีติ อปยาหิ. อมจฺจุเธยฺยนฺติ มจฺจุโน อโนกาสภูตํ นิพฺพานํ. ปารคามิโนติ เยปิ ปารํ คตา, เตปิ ปารคามิโน. เยปิ ปารํ คนฺตุกามา, เตปิ ปารคามิโน. วิสูกายิกานีติ ^๕- มารวิสูกานิ. วิเสวิตานีติ วิรุทฺธเสวิตานิ, "อปฺปมายุ มนุสฺสานํ, อจฺจยนฺติ อโหรตฺตา"ติ วุตฺเต "ทีฆมายุมนุสฺสานํ, นาจฺจยนฺติ อโหรตฺตา"ติอาทีนิ ปฏิโลมการณานิ. วิปฺผนฺทิตานีติ ^๖- ตมฺหิ ตมฺหิ กาเล หตฺถิราชวณฺณสปฺปวณฺณาทิทสฺสนานิ. นิพฺเพชนียาติ อุกฺกณฺฑนียา. อนุปริยคาติอาทีสุ กิญฺจาปิ อตีตวจนํ กตํ, อตฺโถ ปน วิกปฺปวเสน เวทิตพฺโพ. อิทํ วุตฺตํ โหติ:- ยถา เมทวณฺณํ ปาสาณํ วายโส ทิสฺวา "อเปตฺถ ^๗- มุทุํ วินฺเทยฺยาม, อปิ อสฺสาโท สิยา"ติ อนุปริคจฺเฉยฺย, อถ โส ตตฺถ อสฺสาทํ อลภิตฺวาว วายโส เอโต อปกฺกเม, ^๘- ตโต ปาสาณา อปคจฺเฉยฺย, เอวํ มยมฺปิ โส กาโก วิย เสลํ โคตมํ อาสชฺช อสฺสาทํ วา สนฺถวํ วา อลภนฺตา โคตมํ ^๙- นิพฺพินฺทิตฺวา อปคจฺฉาม. จตุตฺถํ. @เชิงอรรถ: ^๑ สี. อติคเหตฺวา อาคมิสฺสามีติ, ฉ.ม. อติคเหตฺวา คมิสฺสามีติ @^๒ สี., อิ. อปชฺฌายนฺโต ^๓ ฉ.ม., อิ. อปชฺฌายนฺโต นิสินฺโนติ ปาฐา น ทิสฺสนฺติ @^๔ อิ. ตสฺส ^๕ ก. วิสูกายิตานีติ ^๖ สี.,ม. วิปฺผนฺทิตานิ กานิจิ กานิจีติ @^๗ ฉ.ม.อปิ นาเมตฺถ ^๘ ฉ.ม. อปกฺกเมยฺย ^๙ ฉ.ม. โคตมา

เนื้อความอรรถกถาฉบับภาษาบาลี อักษรไทย เล่มที่ ๑๑ หน้าที่ ๑๗๗. http://84000.org/tipitaka/read/attha_page.php?book=11&page=177&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=11&A=4612&modeTY=2&pagebreak=1 http://84000.org/tipitaka/atthapali/th_line.php?B=11&A=4612&modeTY=2&pagebreak=1#p177