ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๑๑ ภาษาบาลี อักษรไทย สํ.อ. (สารตฺถ.๑)

หน้าที่ ๒๐๙.

                        ๒. เทวทตฺตสุตฺตวณฺณนา
      [๑๘๓] ทุติเย อจิรปกฺกนฺเตติ สํฆํ ภินฺทิตฺวา นจิรสฺเสว เวฬุวนโต
คยาสีสํ คเต. อสฺสตรินฺติ คทฺรภสฺส วฬวาย ชาตํ. ทุติยํ.
                           ๓. อนฺธกวินฺทสุตฺตวณฺณนา
      [๑๘๔] ตติเย อนฺธกวินฺทนฺติ เอวํนามกํ คามํ. อุปสงฺกมีติ "สตฺถา
อิทานิปิ วิริยํ กโรติ ปธานมนุยุญฺชติ, คจฺฉามิสฺส สนฺติเก ฐตฺวา สาสนานุจฺฉวิกํ
วิริยปฏิสํยุตฺตํ คาถํ วกฺขามี"ติ อุปสงฺกมิ.
         ปนฺตานีติ ชนตํ อติกฺกมิตฺวา มนุสฺสานํ อนูปจาเร ฐิตานิ.
สญฺโญชนวิปฺปโมกฺขาติ ตานิ จ เสนาสนานิ เสวมาโน น จีวราทีนํ อตฺถาย เสเวยฺย,
อถโข ทสสญฺโญชนวิปฺปโมกฺขตฺถาย จเรยฺย. สํเฆ วเสติ เตสุ เสนาสเนสุ รตึ
อลภนฺโต อุปฏฺฐากาทีนํ จิตฺตานุรกฺขนตฺถํ คทฺรภปิฏฺเฐ รชํ วิย อุปฺปตนฺโต
อรญฺเญ อวสิตฺวา ๑- สํฆมชฺเฌ วเสยฺย. รกฺขิตฺตโต สติมาติ ตตฺถ จ วสนฺโต
สควจณฺโฑ โคโณ วิย สพฺรหฺมจาริโน อวิชฺฌนฺโต อฆเฏนฺโต รกฺขิตตฺโต
สติปฏฺฐานปรายโน หุตฺวา วเสยฺย.
       อิทานิ สํเฆ วสมานสฺส ภิกฺขุโน ภิกฺขาจารวตฺตํ อาจิกฺขนฺโต
กุลากุลนฺติอาทิมาห. ตตฺถ ปิณฺฑิกาย จรนฺโตติ ปิณฺฑตฺถาย จรมาโน. เสเวถ ปนฺตานิ
สยนาสนานีติ สํฆมชฺฌํ โอตริตฺวา วสมาโนปิ ธุรปริเวเณ ตาลนาฬิเกรอาทีนิ
โรเปตฺวา อุปฏฺฐากาทิสํสฏฺโฐ น วเสยฺย, จิตฺตกลฺลตํ ปน ชเนตฺวา จิตฺตํ
หาเสตฺวา โตเสตฺวา ปุน ปนฺตเสนาสเนว วเสยฺยาติ อรญฺญสฺเสว วณฺณํ กเถติ.
ภยาติ วฏฺฏภยโต. อภเยติ นิพฺพาเน. วิมุตฺโตติ อธิมุตฺโต หุตฺวา วเสยฺย.
        ยตฺถ เภรวาติ ยสฺมึ ฐาเน ภยชนกา สวิญฺญาณกา สีหพฺยคฺฆาทโย, อวิญฺญาณกา
รตฺติภาเค ขาณุวลฺลิอาทโย พหู อตฺถิ. สิรึสปาติ ๒- ทีฆชาติกาทิสิรึสปา.
นิสีทิ ตตฺถ ภิกฺขูติ ตาทิเส ฐาเน ภิกฺขุ นิสินฺโน. อิมินา อิทํ ทีเปติ ภควา:-
ยถา ตุเมฺห เอตรหิ ตตฺรฏฺฐกเภรวารมฺมณานิ เจว สิรึสเป จ วิชฺชุนิจฺฉารนาทีนิ
จ อมนสิกตฺวา นิสินฺนา, เอวเมว ปธานมนุยุตฺตา ภิกฺขู นิสีทนฺตีติ.
@เชิงอรรถ:  ฉ.ม. อจริตฺวา    ฉ.ม. สรีสปาติ, เอวมุปริปิ



เนื้อความอรรถกถาฉบับภาษาบาลี อักษรไทย เล่มที่ ๑๑ หน้าที่ ๒๐๙. http://84000.org/tipitaka/read/attha_page.php?book=11&page=209&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=11&A=5423&modeTY=2&pagebreak=1 http://84000.org/tipitaka/atthapali/th_line.php?B=11&A=5423&modeTY=2&pagebreak=1#p209


จบการแสดงผล หน้าที่ ๒๐๙.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]