อรรถกถาเล่มที่ ๑๑ หน้าที่ ๒๕๗.

คนฺธรสา คหิตา, มุตปเทน โผฏฺฐพฺพารมฺมณํ. โย เอตฺถ น ลิมฺปตีติ โย เอเตสุ ปญฺจกามคุเณสุ ตณฺหาทิฏฺฐิเลเปหิ ^๑- น ลิมฺปติ. อถ สฏฺฐิสิตา ^๒- สวิตกฺกา, ปุถู ชนตาย อธมฺมา นิวิฏฺฐาติ อถ ฉอารมฺมณนิสฺสิตา ปุถู อธมฺมวิตกฺกา ชนตาย นิวิฏฺฐาติ อตฺโถ. น จ วคฺคคตสฺส กุหิญฺจีติ เตสํ วเสน น กตฺถจิ กิเลสวคฺคโต ภเวยฺย. โน ปน ทุฏฺฐุลฺลภาณีติ ทุฏฺฐุลฺลํ วาจํ ภาณีปิ ^๓- น สิยา. ส ภิกฺขูติ โส เอวํ จิตฺโต ^๔- ภิกฺขุ นาม โหติ. ทพฺโพติ ทพฺพชาติโก ปณฺฑิโต. จิรรตฺตสมาหิโตติ ทีฆรตฺตํ สมาหิตจิตฺโต. นิปโกติ เนปกฺเกน สมนฺนาคโต ปริณตปญฺโญ. อปิหาลูติ นิตฺตโณฺห. สนฺตํ ปทนฺติ นิพฺพานํ. อชฺฌคมา มุนีติ อธิคโต มุนิ. ปฏิจฺจ ปรินิพฺพุโต กงฺขติ กาลนฺติ นิพฺพานํ ปฏิจฺจ กิเลสปรินิพฺพาเนน ปรินิพฺพุโต ปรินิพฺพานกาลํ อาคเมติ. ทุติยํ. ๓. เปสลาติมญฺญนาสุตฺตวณฺณนา ^*- [๒๑๑] ตติเย อติมญฺญตีติ "กึ อิเม มหลฺลกา, น อิเมสํ ^๕- ปาลิ, น อฏฺฐกถา, น ปทพฺยญฺชนมธุรตา, อมฺหากํ ปน ปาฬิปิ อฏฺฐกถาปิ นยสเตน นยสหสฺเสน อุปฏฺฐาตี"ติ อติกฺกมิตฺวา มญฺญติ. โคตมาติ โคตมพุทฺธสาวกตฺตา อตฺตานํ อาลปติ. มานปถนฺติ มานารมฺมณญฺเจว มานสหภุโน จ ธมฺเม. วิปฺปฏิสารีหุวาติ วิปฺปฏิสารี อหุวา, อโหสีติ อตฺโถ. มคฺคชิโนติ มคฺเคน ชิตกิเลโส. กิตฺติญฺจ สุขญฺจาติ วณฺณภณนญฺจ กายิกเจตสิกสุขญฺจ. อขีโลธ ปธานวาติ อขิโล อิธ ปธานวา วิริยสมฺปนฺโน. วิสุทฺโธติ วิสุทฺโธ ภเวยฺย. อเสสนฺติ นิสฺเสสํ นววิธํ. วิชฺชายนฺตกโรติ วิชฺชาย กิเลสานํ อนฺตกโรติ. สมิตาวีติ ราคาทีนํ สมิตตาย สมิตาวี. ตติยํ. @เชิงอรรถ: ^๑ ก. ตณฺหาทิฏฺฐิกิเลเสหิ ^* ฉ.ม. เปสลสุตฺต... ^๒ ฉ.ม. สฏฺฐินิสฺสิตา @^๓ ฉ.ม. ทุฏฺฐุลฺลวจนภาณีปิ ^๔ ฉ.ม. เอวํวิโธ ^๕ ฉ.ม. เอเตสํ

เนื้อความอรรถกถาฉบับภาษาบาลี อักษรไทย เล่มที่ ๑๑ หน้าที่ ๒๕๗. http://84000.org/tipitaka/read/attha_page.php?book=11&page=257&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=11&A=6649&modeTY=2&pagebreak=1 http://84000.org/tipitaka/atthapali/th_line.php?B=11&A=6649&modeTY=2&pagebreak=1#p257