อรรถกถาเล่มที่ ๑๑ หน้าที่ ๒๗๓.

๙. วนสํยุตฺต ๑. วิเวกสุตฺตวณฺณนา [๒๒๑] วนสํยุตฺตสฺส ปฐเม โกสเลสุ วิหรตีติ สตฺถุ สนฺติเก กมฺมฏฺฐานํ คเหตฺวา ตสฺส ชนปทสฺส สุลภภิกฺขตาย ตตฺถ คนฺตฺวา วิหรติ. สํเวเชตุกามาติ วิเวกํ ปฏิปชฺชาเปตุกามา. วิเวกกาโมติ ตโย วิเวเก ปตฺถยนฺโต. นิจฺฉรตี พหิทฺธาติ พาหิเรสุ ปุถุตฺตารมฺมเณสุ จรติ. ชโน ชนสฺมินฺติ ตฺวํ ชโน อญฺญสฺมึ ชเน ฉนฺทราคํ วินยสฺสุ. ปชหาสีติ ปชห. ภวาสีติ ภว. สตํ ตํ สารยามเสติ ^๑- สติมนฺตํ ปณฺฑิตํ ตํ มยํปิ สารยาม, ^๒- สตํ วา ธมฺมํ มยนฺตํ สารยามาติ อตฺโถ. ปาตาลรโชติ อปฺปติฏฺฐฏฺเฐน ปาตาลสงฺขาโต กิเลสรโช. มา ตํ กามรโชติ อยํ กามราครโช ตํ มา อวหริ, อปายเมว มา เนตูติ อตฺโถ. ปํสุกุณฺฑิโตติ ^๓- ปํสุมกฺขิโต. วิธุนนฺติ วิธุนนฺโต. สิตํ รชนฺติ สรีรลคฺคํ รชํ. สํเวคมาปาทีติ เทวตาปิ นาม มํ เอวํ สาเรตีติ. ^๔- วิเวกมาปนฺโน, อุตฺตมวิริยํ วา ปคฺคยฺห ปรมวิเวกํ มคฺคเมว ปฏิปนฺโนติ. ปฐมํ. ๒. อุปฏฺฐานสุตฺตวณฺณนา [๒๒๒] ทุติเย สุปตีติ อยํ กิร ขีณาสโว, โส ทูเร ภิกฺขาจารคามํ คนฺตฺวา อาคโต ปณฺณสาลาย ปตฺตจีวรํ ปฏิสาเมตฺวา อวิทูเร ชาตสรํ โอตริตฺวา คตฺตานิ อุตุํ คาหาเปตฺวา ทิวาฏฺฐานํ สมฺมชฺชิตฺวา ตตฺถ นีจมญฺจกํ ปญฺญาเปตฺวา นิทฺทํ อโนกฺกมนฺโตว นิปนฺโน. ขีณาสวสฺสาปิ หิ กายทรโถ โหติเยวาติ ตสฺส วิโนทนตฺถํ, ตํ สนฺธาย สุปตีติ วุตฺตํ. อชฺฌภาสีติ "อยํ ภิกฺขุ สตฺถุ สนฺติเก กมฺมฏฺฐานํ คเหตฺวา ทิวา สุปติ, ทิวาโสปฺปญฺจ นาเมตํ วฑฺฒิตํ ทิฏฺฐธมฺมิก- สมฺปรายิกํ อตฺถํ นาเสตี"ติ มญฺญมานา "โจเทสฺสามิ นนฺ"ติ จินฺเตตฺวา อภาสิ. อาตุรสฺสาติ ชราตุโร โรคาตุโร กิเลสาตุโรติ ตโย อาตุรา, เตสุ กิเลสาตุรํ สนฺธาเยวมาห. สลฺลวิทฺธสฺสาติ สวิเสน สตฺติสลฺเลน วิย อวิชฺชาวิสฏฺเฐน ^๕- ตณฺหาสลฺเลน หทเย วิทฺธสฺส. รุปฺปโตติ ฆฏิยมานสฺส. ^๖- @เชิงอรรถ: ^๑ สี. สาทยามเสติ ^๒ สี. สาทยาม ^๓ ฉ.ม. ปํสุกุนฺถิโตติ, อิ. ปํสุกุณฺฐิโตติ @^๔ สี., ม., อิ. สาเวตีติ ^๕ สี., อิ. อวิชฺชาวิสทิทฺเธน, ฉ.ม. อวิชฺชาวิสวิฏฺเฐน @^๖ ฉ.ม., อิ. ฆฏฺฏิยมานสฺส

เนื้อความอรรถกถาฉบับภาษาบาลี อักษรไทย เล่มที่ ๑๑ หน้าที่ ๒๗๓. http://84000.org/tipitaka/read/attha_page.php?book=11&page=273&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=11&A=7055&modeTY=2&pagebreak=1 http://84000.org/tipitaka/atthapali/th_line.php?B=11&A=7055&modeTY=2&pagebreak=1#p273