อรรถกถาเล่มที่ ๑๑ หน้าที่ ๒๙๙.

อนุปุพฺพีกถํ กเถตฺวา มตฺถเก จตฺตาริ สจฺจานิ ปกาเสสิ. เสฏฺฐี ธมฺมเทสนํ สุตฺวา โสตาปตฺติผเล ปติฏฺฐาย พุทฺธปฺปมุขํ ภิกฺขุสํฆํ นิมนฺเตตฺวา ปุนทิวสโต ปฏฺฐาย มหาทานํ ทาตุํ อารภิ. พิมฺพิสารราชาทโย เสฏฺฐิสฺส สาสนํ เปเสนฺติ "ตฺวํ อาคนฺตุโก, ยํ นปฺปโหติ, ตํ อิโต อาหราเปหี"ติ. โส "อลํ ตุเมฺห พหุกิจฺจา"ติ สพฺเพ ปฏิกฺขิปิตฺวา ปญฺจหิ สกฏสเตหิ อานีตวิภเวน สตฺตาหํ มหาทานํ อทาสิ. ทานปริโยสาเน จ ภควนฺตํ สาวตฺถิยํ วสฺสาวาสํ ปฏิชานาเปตฺวา ราชคหสฺส จ สาวตฺถิยา จ อนฺตเร โยชเน โยชเน สตสหสฺสํ ทตฺวา ปญฺจจตฺตาฬีสวิหาเร ^๑- กาเรนฺโต สาวตฺถึ คนฺตฺวา เชตวนมหาวิหารํ กาเรตฺวา พุทฺธปฺปมุขสฺส ภิกฺขุสํฆสฺส นิยฺยาเทสิ. ^๒- อฏฺฐมํ. ๙. ปฐมสุกฺกาสุตฺตวณฺณนา [๒๔๓] นวเม รถิกาย รถิกนฺติ เอกรถิกํ คเหตฺวา ตโต อปรํ คจฺฉนฺโต รถิกาย รถิกํ อุปสงฺกมนฺโต นาม อโหสิ. ^๓- สิงฺฆาฏเกปิ เอเสว นโย. เอตฺถ จ รถิกาติ รจฺฉา. สิงฺฆาฏกนฺติ จตุกฺกํ. กิมฺเม กตาติ กึ เม ^๔- กตา, กึ กโรนฺตีติ อตฺโถ. มธุปีตาว เสยเรติ คนฺธมธุปานปีตา ^๕- วิย สยนฺติ. คนฺธมธุปานปีโต กิร สีสํ อุกฺขิปิตุํ น สกฺโกติ, อสญฺญี หุตฺวา สยเตว. ตสฺมา เอวมาห. ตญฺจ ปน อปฺปฏิวานียนฺติ ตญฺจ ปน ธมฺมํ อปฺปฏิวานียํ เทเสติ. พาหิรกญฺหิ สุมธุรํปิ โภชนํ ปุนปฺปุนํ ภุญฺชนฺตสฺส น รุจฺจติ, "อปเนถ, กึ อิมินา"ติ ปฏิวาเนตพฺพํ อปเนตพฺพํ โหติ, น เอวมยํ ธมฺโม. อิมํ หิ ธมฺมํ ปณฺฑิตา วสฺสสตํปิ วสฺสสหสฺสํปิ สุณนฺตา ติตฺตึ น คจฺฉนฺติ. เตนาห "อปฺปฏิวานียนฺติ. อเสจนกโมชวนฺ"ติ อนาสิตฺตกํ โอชวนฺตํ. ยถา หิ พาหิรานิ อสมฺภินฺนปายาสาทีนิปิ สปฺปิมธุสกฺขราหิ อาสิตฺตานิ โยชิตาเนว มธุรานิ โอชวนฺตานิ โหนฺติ, น เอวมยํ ธมฺโม. อยํ หิ อตฺตโนว ^๖- ธมฺมตาย มธุโร เจว โอชวา จ, น อญฺเญน อุปสิตฺโต. เตนาห "อเสจนกโมชวนฺ"ติ. @เชิงอรรถ: ^๑ ก. จตฺตาฬีสวิหาเร ^๒ ฉ.ม. นิยฺยาเทสีติ ^๓ ฉ.ม. โหติ ^๔ ฉ.ม., อิ. อิเม @^๕ ฉ.ม., อิ. คนฺธมธุปานํ ปีตา, เอวมุปริปิ ^๖ ฉ.ม., อิ. อตฺตโน

เนื้อความอรรถกถาฉบับภาษาบาลี อักษรไทย เล่มที่ ๑๑ หน้าที่ ๒๙๙. http://84000.org/tipitaka/read/attha_page.php?book=11&page=299&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=11&A=7718&modeTY=2&pagebreak=1 http://84000.org/tipitaka/atthapali/th_line.php?B=11&A=7718&modeTY=2&pagebreak=1#p299