บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
ATTHAKATHA Book 12 : PALI ROMAN Saṃ.A. (sārattha.2) Page 247.
9. Opammasaṃyutta 1. Kūṭasuttavaṇṇanā [223] Opammasaṃyuttassa paṭhame kūṭaṃ gacchantīti kūṭaṅgamā. Kūṭaṃ samosarantīti kūṭasamosaraṇā. Kūṭasamugghātāti kūṭassa samugghātā. 1- Avijjāsamugghātāti arahattamaggena avijjāya samugghātā. 1- Appamattāti satiyā avippavāse ṭhitā hutvā. Paṭhamaṃ. 2. Nakhasikhasuttavaṇṇanā [224] Dutiye manussesu paccājāyantīti ye manussalokato cutā manussesu jāyanti, te evaṃ appakāti adhippāyo. Aññatra manussehīti ye 2- manussalokato cutā ṭhapetvā manussalokaṃ catūsu apāyesu paccajāyanti, te mahāpaṭhaviyaṃ paṃsu viya bahutaRā. Imasmiṃ ca sutte devāpi manusseheva saṅgahitā. Tasmā yathā manussesu jāyantā appakā, evaṃ devesupīti veditabbā. Dutiyaṃ. 3. Kulasuttavaṇṇanā [225] Tatiye supadhaṃsiyānīti suviheṭhiyāni. Kumbhatthenakehīti ye paragharaṃ pavisitvā dīpālokena oloketvā parabhaṇḍaṃ haritukāmā ghaṭe dīpaṃ katvā pavisanti, te kumbhatthenakā nāma, tehi kumbhatthenakehi. Supadhaṃsiyo hoti amanussehīti mettābhāvanārahitaṃ hi paṃsupisācakā vidhaṃsayanti, 3- pageva uḷārā amanussā. Bhāvitāti vaḍḍhitā. Bahulīkatāti punappunaṃ katā. Yānīkatāti yuttayānaṃ viya katā. Vatthukatāti patiṭṭhānaṭṭhena vatthu viya katā. Anuṭṭhitāti adhiṭṭhitā. 4- Paricitāti samantato citā suvaḍḍhitā susamāraddhāti cittena suṭṭhu samāraddhā. Tatiyaṃ. @Footnote: 1 Sī. kūṭasamugghātena, cha.Ma. samugghātena 2 cha.Ma.,i. ye pana @3 Sī. paṃsupisācakāpi dhaṃsayanti 4 Sī. avaṭṭhitāThe Pali Atthakatha in Roman Character Volume 12 Page 247. http://84000.org/tipitaka/read/attha_page.php?book=12&page=247&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=12&A=5447&pagebreak=1 http://84000.org/tipitaka/atthapali/rm_line.php?B=12&A=5447&pagebreak=1#p247
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถา อักษรโรมัน. หากพบข้อผิดพลาด กรุณาแจ้งได้ที่ [email protected]