อรรถกถาเล่มที่ ๑๒ ภาษาบาลี อักษรไทย
สํ.อ. (สารตฺถ.๒)
หน้าที่ ๒๘๘.

                     ๗. อุปาทาปริตสฺสนาสุตฺตวณฺณนา
    [๗] สตฺตเม อุปาทาปริตสฺสนนฺติ คหเณน อุปฺปนฺนํ ปริตสฺสนํ.
อนุปาทาอปริตสฺสนนฺติ อคหเณน อปริตสฺสนํ. รูปวิปริณามานุปริวตฺติ
วิญฺญาณํ โหตีติ "มม รูปํ วิปริณตนฺ"ติ วา "อหุ วต เมตํ, ทานิ วต เม
นตฺถี"ติ วา อาทินา นเยน กมฺมวิญฺญาณํ รูปสฺส เภทานุปริวตฺติ โหติ.
วิปริณามานุปริวตฺติชาติ วิปริณามสฺส อนุปริวตฺติโต วิปริณามารมฺมณจิตฺตโต ชาตา.
ปริตสฺสนาธมฺมสมุปฺปาทาติ ตณฺหาปริตสฺสนา จ อกุสลธมฺมสมุปฺปาทา จ. จิตฺตนฺติ
กุสลจิตฺตํ. ปริยาทาย ติฏฺฐนฺตีติ ปริยาทิยิตฺวา ติฏฺฐนฺติ. อุตฺตาสวาติ
สอุตฺตาโส. วิฆาตวาติ สวิฆาโต สทุกฺโข. อเปกฺขวาติ สาลโย. อุปาทาย จ
ปริตสฺสตีติ คณฺหิตฺวา ปริตสฺสโก นาม โหติ. น รูปวิปริณามานุปริวตฺตีติ
ขีณาสวสฺส กมฺมวิญฺญาณเมว นตฺถิ, ตสฺมา รูปเภทานุปริวตฺติ น โหตีติ วตฺตุํ
วฏฺฏติ. สตฺตมํ.
                   ๘. ทุติยอุปาทาปริตสฺสนาสุตฺตวณฺณนา
    [๘] อฏฺฐเม ตณฺหามานทิฏฺฐิวเสน เทสนา กตา. อิติ ปฏิปาฏิยา จตูสุ
สุตฺเตสุ วฏฺฏวิวฏฺฏเมว กถิตํ. อฏฺฐมํ.
                      ๙. กาลตฺตยอนิจฺจสุตฺตวณฺณนา
    [๙] นวเม โก ปน วาโท ปจฺจุปฺปนฺนสฺสาติ ปจฺจุปฺปนฺนมฺปิ
กถาว กา, อนิจฺจเมว ตํ. เต ภิกฺขู อตีตานาคตํ อนิจฺจนฺติ สลฺลกฺเขตฺวา
ปจฺจุปฺปนฺเน กิลมึสุ, อถ เนสํ อิโต อตีตานาคเตปิ ๑- "ปจฺจุปฺปนฺนํ
อนิจฺจนฺ"ติ วุจฺจมาเน ๒- พุชฺฌิสฺสนฺตีติ อชฺฌาสยํ วิทิตฺวา สตฺถา
ปุคฺคลชฺฌาสเยน อิมํ เทสนํ เทเสสิ. นวมํ.
@เชิงอรรถ: ๑ สี. อตีตานาคตโตปิ, ม. อตีตานาคโตปิ     ๒ ม. วุจฺจมาโน


เนื้อความอรรถกถาฉบับภาษาบาลี อักษรไทย เล่มที่ ๑๒ หน้าที่ ๒๘๘.
http://84000.org/tipitaka/read/attha_page.php?book=12&page=288&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=12&A=6346&modeTY=2&pagebreak=1
http://84000.org/tipitaka/atthapali/th_line.php?B=12&A=6346&modeTY=2&pagebreak=1#p288