อรรถกถาเล่มที่ ๑๓ ภาษาบาลี อักษรไทย
สํ.อ. (สารตฺถ.๓)
หน้าที่ ๖๐.

    นิมิตฺตสฺสาทคถิตนฺติ นิมิตฺตสฺสาเทน จ คนฺถิตํ พนฺธํ. วิญฺญาณนฺติ
กมฺมวิญฺญาณํ. ตสฺมึ เจ สมเย กาลํ กเรยฺยาติ น โกจิ สงฺกิลิฏฺเฐน จิตฺเตน
กาลํ กโรนฺโต นาม อตฺถิ. สพฺพสตฺตานํ หิ ภวงฺเคเนว กาลกิริยา โหติ.
กิเลสภยํ ปน ทสฺเสนฺโต เอวมาห. สมยวเสน วา เอวํ วุตฺตํ. จกฺขุทฺวารสฺมึ
หิ อาปาถคเต อารมฺมเณ รตฺตจิตฺตํ วา ทุฏฺฐจิตฺตํ วา มุฬฺหจิตฺตํ วา อารมฺมณรสํ
อนุภวิตฺวา ภวงฺคํ โอตรติ, ภวงฺเค ฐตฺวา กาลกิริยํ กโรติ. ตสฺมึ สมเย กาลํ
กโรนฺตสฺส เทฺวว คติโย ปาฏิกงฺขา, อิมสฺส สมยสฺส วเสน ตํ วุตฺตํ.
    อิมํ ขฺวาหํ ภิกฺขเว อาทีนวนฺติ อิมํ อเนกานิ วสฺสสตสหสฺสานิ นิรเย
อนุภวิตพฺพํ ทุกฺขํ สมฺปสฺสมาโน เอวํ วทามิ ตตฺตาย อโยสลากาย อกฺขีนิ
อญฺชาเปตุกาโมติ. อิมินา นเยน สพฺพตฺถ อตฺโถ เวทิตพฺโพ. อโยสํกุนาติ
อยสูเลน. สมฺปลิมฏฺฐนฺติ เทฺวปิ กณฺณจฺฉิทฺทานิ วินิวิชฺฌิตฺวา ปฐวิยํ
อาโกฏนวเสน สมฺปลิมฏฺฐํ.
    ตติยวาเร สมฺปลิมฏฺฐนฺติ นขจฺเฉทนํ ๑- ปเวเสตฺวา อุกฺขิปิตฺวา สห
ธุนฏฺเฐน ๒- ฉินฺทิตฺวา ปาตนวเสน สมฺปลิมฏฺฐํ. จตุตฺถวาเร สมฺปลิมฏฺฐนฺติ
พนฺธนมูลํ เฉตฺวา ปาตนวเสน สมฺปลิมฏฺฐํ. ปญฺจมวาเร สมฺปลิมฏฺฐนฺติ ติขิณาย
สตฺติยา กายปสาทํ อุปฺปาเฏตฺวา ปาตนวเสน สมฺปลิมฏฺฐํ. สตฺติยาติ ๓- เอตฺถ
มหตี ทณฺฑกวาสี เวทิตพฺพา. โสตฺตนฺติ นิปชฺชิตฺวา นิทฺโทกฺกมนํ. ยถารูปานํ
วิตกฺกานํ วสํ คโต สํฆํ ภินฺเทยฺยาติ อิมินา วิตกฺกานํ ยาว สํฆเภทา
ปาปกมฺมาวหนตา ทสฺสิตา. เสสเมตฺถ อุตฺตานเมว.
                  ๙-๑๐. ปฐมหตฺถปาโทปมสุตฺตาทิวณฺณนา
    [๒๓๖-๒๓๗] นวเม หตฺเถสุ ภิกฺขเว สตีติ หตฺเถสุ วิชฺชมาเนสุ.
@เชิงอรรถ: ๑ สี., ม. นิขาทนํ     ๒ สี. สห ธุนนฺเตน     ๓ ก. สตฺตีหิ


เนื้อความอรรถกถาฉบับภาษาบาลี อักษรไทย เล่มที่ ๑๓ หน้าที่ ๖๐.
http://84000.org/tipitaka/read/attha_page.php?book=13&page=60&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=13&A=1282&modeTY=2&pagebreak=1
http://84000.org/tipitaka/atthapali/th_line.php?B=13&A=1282&modeTY=2&pagebreak=1#p60