อรรถกถาเล่มที่ ๑๕ หน้าที่ ๑๖๐.

คารยฺหํ ฐานนฺติ ครหิตพฺพยุตฺตกํ การณํ. อิทํ วุตฺตํ โหติ:- โภตา โคตเมน วุตฺตา สการณา วาทปฺปวตฺติ ^๑- กิญฺจิปิ คารยฺหํ การณํ น อาคจฺฉตีติ. อถวา เตหิ ปเรหิ วุตฺตา สการณา วาทปฺปวตฺติ กิญฺจิ คารยฺหการณํ น อาคจฺฉตีติ ปุจฺฉติ ^๑-. อนฺตรายกโร โหตีติ อนฺตรายํ วินาสํ กิญฺจิ โลมกํ ^๒- วิโลมกํ กโรติ. ปาริปนฺถิโกติ ปนฺถทูหนโจโร. ^๓- ขโต จ โหตีติ คุณขณเนน ขโต โหติ. อุปหโตติ คุณูปฆาเตเนว อุปหโต. จนฺทนิกายาติ อสุจิกลลกูเป. โอฬิคลฺเลติ นิทฺธมนกลเล. โส จาติ โส สีลวาติ วุตฺตขีณาสโว. สีลกฺขนฺเธนาติ สีลราสินา. เสสปเทสุปิ เอเสว นโย. เอตฺถ จ วิมุตฺติญาณทสฺสนนฺติ ^๔- วุจฺจติ ปจฺจเวกฺขณญาณํ, ตํ อเสกฺขสฺส ปวตฺตตฺตา อเสกฺขนฺติ วุตฺตํ. อิตรานิ สิกฺขาปริโยสานปฺปตฺตตาย สยมฺปิ อเสกฺขาเนว. ตานิ จ ปน โลกุตฺตรานิ, ปจฺจเวกฺขณญาณํ โลกิยํ. โรหิณีสูติ รตฺตวณฺณาสุ. สรูปาสูติ อตฺตโน วจฺฉเกหิ สมานรูปาสุ. ปาเรวตาสูติ กโปตวณฺณาสุ. ทนฺโตติ นิพฺพิเสวโน. ปุงฺคโวติ อุสโภ. โธรโยฺหติ ธุรวาโห. กลฺยาณชวนิกฺกโมติ กลฺยาเณน อุชุนา ชเวน สมนฺนาคโต ^๕-. นาสฺส วณฺณํ ปริกฺขเรติ อสฺส โคณสฺส สรีรวณฺณํ น อุปปริกฺขนฺติ, ธุรวหนกมฺมเมว ปน อุปปริกฺขนฺติ, ยสฺมึ กสฺมิญฺจิ ชาติเยติ ยตฺถ กตฺถจิ กุเล ชาเต. ยาสุ กาสุจิ เอตาสูติ เอตาสุ ขตฺติยาทิปฺปเภทาสุ ยาสุ กาสุจิ ชาตีสุ. พฺรหฺมจริยสฺส เกวลีติ พฺรหฺมจริยสฺส เกวเลน สมนฺนาคโต, ปริปุณฺณภาเวน ยุตฺโตติ อตฺโถ. ขีณาสโว หิ สกลพฺรหฺมจารี นาม โหติ. เตเนตํ วุตฺตํ. ปนฺนภาโรติ โอโรปิตภาโร, ^๖- ขนฺธภารํ กิเลสภารํ กามคุณภารญฺจ โอโรเปตฺวา ฐิโตติ อตฺโถ. @เชิงอรรถ: ^๑-๑ สี. กจฺจิ คารยฺหํ การณํ อาคจฺฉติ นาคจฺฉตีติ ปุจฺฉติ @^๒ ฉ.ม. กิจฺฉลาภกํ, อิ. วิโลปํ ^๓ ม. ปนฺถทูสนโจโร ^๔ ฉ.ม.,อิ....ทสฺสนํ @^๕ ฉ.,อิ. คนฺตา ^๖ ม. โอหิตภาโร

เนื้อความอรรถกถาฉบับภาษาบาลี อักษรไทย เล่มที่ ๑๕ หน้าที่ ๑๖๐. http://84000.org/tipitaka/read/attha_page.php?book=15&page=160&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=15&A=3648&modeTY=2&pagebreak=1 http://84000.org/tipitaka/atthapali/th_line.php?B=15&A=3648&modeTY=2&pagebreak=1#p160