บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
ATTHAKATHA Book 15 : PALI ROMAN Aṅ.A. (manoratha.2) Page 225.
2. Ājīvakasuttavaṇṇanā [73] Dutiye tenahi gahapatīti thero kira cintesi "ayaṃ idhāgacchanto na aññātukāmo hutvā āgami, 1- pariggaṇhanatthaṃ pana āgato. Iminā pucchitaṃ pañhaṃ imināva kathāpessāmī"ti. Iti taṃyeva kathaṃ kathāpetukāmo tenahītiādimāha. Tattha tenahīti kāraṇāpadeso. Yasmā tvaṃ evaṃ pucchasi, tasmā taññevettha paṭipucchāmīti. Kesannoti katamesaṃ nu. Sadhammukkaṃsanāti attano laddhiyā ukkhipitvā ṭhapanā. Paradhammāpasādanāti paresaṃ laddhiyā ghaṭṭanā vambhanā avakkhipanā. Āyataneva 2- dhammadesanāti kāraṇasmiṃyeva dhammadesanā. Attho ca vuttoti mayā pucchitapañhassa 3- attho ca pakāsito. Attā ca anupanītoti amhe evarūpāti evaṃ attā ca na upanīto. Nupanītotipi 4- pāṭho. 3. Mahānāmasakkasuttavaṇṇanā [74] Tatiye gilānā vuṭṭhitoti 5- gilāno hutvā vuṭṭhito. Gelaññāti gilānabhāvato. Upasaṅkamīti bhuttapātarāso mālāgandhādīni ādāya mahāparivāraparivuto upasaṅkami. Bāhāyaṃ gahetvāti na bāhāyaṃ gahetvā ākaḍḍhi, nisinnāsanato uṭṭhāya 6- tassa santikaṃ gantvā dakkhiṇabāhāyaṃ aṅguṭṭhakena saññaṃ datvā ekamantaṃ apanesīti veditabbo. Athassa "sekhaṃpi kho mahānāma sīlan"tiādinā nayena sattannaṃ sekhānaṃ sīlañca samādhiñca paññañca kathetvā upari arahattaphalavasena asekhasīlasamādhipaññāyo kathento "sekhasamādhito sekhaṃ vipassanāñāṇaṃ asekhañca phalañāṇaṃ pacchā, sekhavipassanāñāṇato ca asekhaphalasamādhi pacchā uppajjatī"ti dīpeti. Yāni pana sampayuttāni samādhiñāṇāni, tesaṃ apacchā apure uppatti veditabbāti. @Footnote: 1 Ma. āgamissati 2 Sī. āyatane ca 3 cha.Ma. pucchitapañhāya @4 Sī. nūpanītotipi, Ma. nuparitotipi 5 cha. gilānavuṭṭhitoti 6 cha.Ma. vuṭṭhāyaThe Pali Atthakatha in Roman Character Volume 15 Page 225. http://84000.org/tipitaka/read/attha_page.php?book=15&page=225&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=15&A=5211&pagebreak=1 http://84000.org/tipitaka/atthapali/rm_line.php?B=15&A=5211&pagebreak=1#p225
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถา อักษรโรมัน. หากพบข้อผิดพลาด กรุณาแจ้งได้ที่ [email protected]