ATTHAKATHA Book 16 : PALI ROMAN
Aṅ.A. (manoratha.3)
Page 1.

                   Manorathapūraṇī nāma aṅguttaranikāyaṭṭhakathā
                         pañcakādinipātavaṇṇanā
                       ------------------
                namo tassa bhagavato arahato sammāsambudadhassa.
                          Pañcakanipātavaṇṇanā
                          1. Paṭhamapaṇṇāsaka
                  1. Sekhabalavagga 1. Saṅkhittasuttavaṇṇanā
      [1] Pañcakanipātassa paṭhame sattannaṃ sekhānaṃ balānīti sekhabalāni. Saddhābalādīsu
assaddhiyena 1- na kampatīti saddhābalaṃ. Ahirikena 2- na kampatīti hiribalaṃ.
Anottappena 3- na kampatīti ottappabalaṃ. Kosajjena 4- na kampatīti viriyabalaṃ.
Avijjāya na kampatīti paññābalaṃ. Tasmāti yasmā imāni sattannaṃ sekhānaṃ balāni,
tasmā.
                         2. Vitthatasuttavaṇṇanā
       [2] Dutiye kāyaduccaritenātiādīsu upayogatthe karaṇavacanaṃ, hiriyitabbāni
kāyaduccaritādīni hiriyati jigucchatīti attho. Ottappaniddese hetvatthe
karaṇavacanaṃ, kāyaduccaritādīhi ottappassa hetubhūtehi ottappati bhāyatīti attho.
        Āraddhaviriyoti paggahitaviriyo anosakkitamānaso. Pahānāyāti pahānatthāya.
Upasampadāyāti paṭilābhatthāya. Thāmavāti viriyathāmena samannāgato. Daḷhaparakkamoti
thiraparakkamo. Anikkhittadhuro kusalesu dhammesūti kusalesu anoropitadhuro
anosakkitaviriyo.
@Footnote: 1 cha.Ma. assaddhiye  2 cha.Ma. ahirike  3 cha.Ma. anottappe  4 cha.Ma. kosajje


The Pali Atthakatha in Roman Character Volume 16 Page 1.
http://84000.org/tipitaka/read/attha_page.php?book=16&page=1&pages=1&edition=roman
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_rm.php?B=16&A=1&pagebreak=1
http://84000.org/tipitaka/atthapali/rm_line.php?B=16&A=1&pagebreak=1#p1