9. Dānamahapphalasuttavaṇṇanā
[52] Navame sāpekkhoti sataṇho. Paṭibaddhacittoti vipāke baddhacitto.
Sannidhipekkhoti nidhānapekkho hutvā. Peccāti paralokaṃ gantvā. Taṃ kammaṃ
khepetvāti taṃ kammavipākaṃ khepetvā. Iddhinti vipākiddhiṃ. Yasanti parivārasampadaṃ.
Adhipateyyanti 1- jeṭṭhabhāvakāraṇaṃ. Āgantā itthattanti itthabhāvaṃ ime
pañcakkhandhe puna āgantā, na tatrūpapattiko na uparūpapattiko, heṭṭhāgāmīyeva hotīti
attho. Sāhu dānanti dānannāmetaṃ sādhu bhaddakaṃ sundaraṃ. Tāni mahāyaññānīti tāni
sappinavanītadadhimadhuphāṇitādīhi niṭṭhānagatāni 2- mahādānāni. Cittālaṅkāraṃ
cittaparikkhāranti samathavipassanācittassa alaṅkārabhūtañceva parivārabhūtañca.
Brahmakāyikānaṃ devānaṃ sahabyatanti na sakkā tattha dānena uppajjituṃ. Yasmā pana taṃ
samathavipassanācittassa alaṅkārabhūtaṃ, tasmā tena dānālaṅkatena cittena jhānañceva
ariyamaggañca nibbattetvā jhānena tattha uppajjati. Anāgāmī hotīti jhānānāgāmī
nāma hoti. Anāgantā itthattanti puna itthabhāvaṃ na āgantā, uparūpapattiko
vā tatrūpapattiko vā hutvā tattheva parinibbāyati. Iti imesu dānesu paṭhamaṃ
taṇhuttariyadānaṃ, dutiyaṃ cittīkāradānaṃ, tatiyaṃ hirottappadānaṃ, catutthaṃ
niravasesadānaṃ, pañcamaṃ dakkhiṇeyyadānaṃ, chaṭṭhaṃ somanassūpavicāradānaṃ, sattamaṃ
alaṅkāraparivāradānaṃ nāmāti.
10. Nandamātāsuttavaṇṇanā
[53] Dasamaṃ atthuppattivasena desitaṃ. Satthā kira vuṭṭhavasso pavāretvā dve
aggasāvake ohāya "dakkhiṇāgiricārikaṃ gamissāmī"ti nikkhami, rājā pasenadikosalo,
anāthapiṇḍiko gahapati, visākhā mahāupāsikā, aññe ca bahujanā dasabalaṃ
@Footnote: 1 cha.Ma. ādhipaccanti 2 Ma. niṭṭhānaṃ katāni
The Pali Atthakatha in Roman Character Volume 16 Page 186.
http://84000.org/tipitaka/read/attha_page.php?book=16&page=186&pages=1&edition=roman
ศึกษาพระสูตร (เนื้อความ) นี้แยกตามสารบัญ :-
http://84000.org/tipitaka/pitaka_item/read_rm.php?B=16&A=4141&pagebreak=1
http://84000.org/tipitaka/atthapali/rm_line.php?B=16&A=4141&pagebreak=1#p186
