ATTHAKATHA Book 16 : PALI ROMAN
Aṅ.A. (manoratha.3)
Page 268.

                        7. 2. Bhūmicālavagga 1-
                         1. Icchāsuttavaṇṇanā
     [61] Sattamassa paṭhame pavivittassāti kāyavivekena vivittassa.
Nirāyattavuttinoti katthaci anāyattavuttino vipassanākammikassa. Lābhāyāti
catupaccayalābhāya. Socī ca  paridevī cāti sokī ca paridevī ca. 2- Socicca
parideviccātipi pāṭho. Cuto ca saddhammāti taṃkhaṇaṃyeva vipassanāsaddhammā cuto.
Imasmiṃ sutte vaṭṭavivaṭṭaṃ kathitaṃ.
                          2. Alaṃsuttavaṇṇanā
      [62] Dutiye alaṃ attano alaṃ paresanti attano ca paresañca hitapaṭipattiyaṃ
samattho pariyatto anucchaviko. Khippanisantīti khippaṃ upadhāreti khandhadhātuāyatanādīsu
kathiyamānesu te dhamme khippaṃ jānātīti attho. Imasmiṃ sutte samathavipassanā
kathitā. Puggalajjhāsayena pana desanāvilāsena cetaṃ matthakato paṭṭhāya heṭṭhā
otarantaṃ kathitanti.
                        3. Saṅkhittasuttavaṇṇanā
     [63] Tatiye evamevāti nikkāraṇeneva. Yathā vā ayaṃ yācati, evameva.
Moghapurisāti mūḷahapurisā tucchapurisā. Ajjhesantīti yācanti. Anubandhitabbanti
iriyāpathānubandhanena 3- anubandhitabbaṃ maṃ na vijahitabbaṃ maññanti. Ājānanatthaṃ
apasādento evamāha. Esa kira bhikkhu ovāde dinnepi pamādamevānuyuñjati,
dhammaṃ sutvā tattheva vasati, na samaṇadhammaṃ kātuṃ icchati. Tasmā bhagavā evaṃ
apasādetvā puna yasmā so arahattassa upanissayasampanno, tasmā taṃ ovadanto
@Footnote: 1 ka. cālavagga  2 ka. soci ca paridevi cāti soko ca paridevo ca
@3 cha.Ma. iriyāpathānugamanena


The Pali Atthakatha in Roman Character Volume 16 Page 268.
http://84000.org/tipitaka/read/attha_page.php?book=16&page=268&pages=1&edition=roman
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_rm.php?B=16&A=6019&pagebreak=1
http://84000.org/tipitaka/atthapali/rm_line.php?B=16&A=6019&pagebreak=1#p268