Chandarāgoti evaṃ akusalavitakkena vitakkite vatthusmiṃ dubbalarāgo ca balavarāgo
ca uppajjati. Idañhi idha chandoti dubbalarāgassādhivacanaṃ. Ajjhosānanti ahaṃ
mamanti balavasanniṭṭhānaṃ. Pariggahoti taṇhādiṭṭhivasena pariggahakaraṇaṃ. Macchariyanti
parehi sādhāraṇabhāvassa asahanatā. Tenevassa porāṇā evaṃ vacanatthaṃ vadanti "idaṃ acchariyaṃ
mayhameva hotu, mā aññassa acchariyaṃ hotūti pavattattā macchariyanti vuccatī"ti.
Ārakkhāti 1- dvārapidahanamañjūsāgopanādivasena suṭṭhu rakkhanaṃ. Adhikarotīti adhikaraṇaṃ,
kāraṇassetaṃ nāmaṃ. Ārakkhādhikaraṇanti bhāvanapuṃsakaṃ, ārakkhāhetūti attho.
Daṇḍādānādīsu paranisedhanatthaṃ 2- daṇḍassa ādānaṃ daṇḍādānaṃ. Ekatodhārādino
satthassa ādānaṃ satthādānaṃ. Kalahoti kāyakalahopi vācākalahopi. Purimo viggaho,
pacchimo vivādo. 3- Tuvaṃtuvanti agāravavasena tuvaṃtuvaṃvacanaṃ.
4. Sattāvāsasuttavaṇṇanā
[24] Catutthe sattāvāsāti sattānaṃ āvāsā, vasanaṭṭhānānīti attho. Tattha
suddhāvāsopi 4- sattāvāsova, asabbakālikattā pana na gahito. 5- Suddhāvāsā hi
buddhānaṃ khandhāvāraṭṭhānasadisā, asaṅkhyeyyakappe buddhesu anibbattesu taṃ ṭhānaṃ
suññaṃ hoti. Iti asabbakālikattā na gahitā. Sesamettha viññāṇaṭṭhitīsu vuttanayeneva
veditabbaṃ.
5. Paññāsuttavaṇṇanā
[25] Pañcame yatoti yasmiṃ kāle. Suparicitaṃ hotīti suṭṭhu upacitaṃ suvaḍḍhitaṃ
hoti. Kallaṃ vacanāyāti yuttaṃ vattuṃ. Vītarāganti vigatarāgaṃ. Asarāgadhammanti rāgena 6-
na sārajjanasabhāvaṃ. 7- Anāvattidhammanti anāvattanasabhāvaṃ anibbattārahaṃ, appaṭisandhika-
sabhāveneva nirujjhanasabhāvanti attho. Imasmiṃ sutte khīṇāsavova kathito.
@Footnote: 1 cha.Ma. ārakkhoti 2 Sī. paṭisedhanatthaṃ 3 su.vi. 2/103/98 paṭiccasamuppādavaṇṇanā
@4 cha.Ma. suddhāvāsāpi 5 cha.Ma. gahitā
@6 cha.Ma., i. ayaṃ pāṭho na dissati 7 Sī. saṃrajjanabhāvaṃ, cha.Ma. ārajjasanabhāvaṃ
The Pali Atthakatha in Roman Character Volume 16 Page 305.
http://84000.org/tipitaka/read/attha_page.php?book=16&page=305&pages=1&edition=roman
ศึกษาพระสูตร (เนื้อความ) นี้แยกตามสารบัญ :-
http://84000.org/tipitaka/pitaka_item/read_rm.php?B=16&A=6870&pagebreak=1
http://84000.org/tipitaka/atthapali/rm_line.php?B=16&A=6870&pagebreak=1#p305
