อรรถกถาเล่มที่ ๑๖ ภาษาบาลี อักษรไทย
องฺ.อ. (มโนรถ.๓)
หน้าที่ ๓๐๖.

                        ๖. สิลายูปสุตฺตวณฺณนา
     [๒๖] ฉฏฺเฐ จนฺทิกาปุตฺโตติ มาตุนามวเสน ปญฺญาโต จนฺทิกาปุตฺตตฺเถโร.
เจตสา จิตํ โหตีติ จิตฺตวารปริยาเยน จิตฺตวารปริยาโย จิโต วฑฺฒิโต โหติ.
เจตสา จิตฺตํ สุปริจิตํ โหตีติ จิตฺตวารปริยาเยน จิตฺตวารปริยาโย อุปรูปุริ
สุจิโต สุวฑฺฒิโต โหติ. เนวสฺส จิตฺตํ ปริยาทิยนฺตีติ ตานิ อารมฺมณานิ ตสฺส
ขีณาสวสฺส จิตฺตุปฺปาทํ คเหตฺวา เขเปตฺวา ฐาตุํ น สกฺโกนฺติ. อมิสฺสีกตนฺติ
เตสํ อารมฺมณานํ ๑- อนลฺลีนตฺตา เตหิ อมิสฺสีกตํ. อาเนญฺชปฺปตฺตนฺติ อนิญฺชนภาวํ
นิปฺผนฺทนภาวํ ปตฺตํ.
     สิลายูโปติ สิลาถมฺโภ. โสฬสกุกฺกุโกติ ทีฆโต โสฬสหตฺโถ. เหฏฺฐาเนมงฺคมาติ
อาวาฏสฺส เหฏฺฐา คตา. อุปริเนมสฺสาติ อุปริอาวาฏสฺส. สุนิขาตตฺตาติ อยมุสเลหิ
โกฏฺเฏตฺวา ๒- สุฏฺฐุ นิขาตตฺตา. เอวเมว โขติ เอตฺถ สิลายูโป วิย ขีณาสโว
ทฏฺฐพฺโพ, มหาวาตา วิย ฉสุ ทฺวาเรสุ อุปฺปชฺชนกา กิเลสา, จตูหิ ทิสาหิ
อาคนฺตฺวา วาตานํ สิลายูปํ จาเลตุํ อสมตฺถภาโว วิย ฉสุ ทฺวาเรสุ อุปฺปชฺชนก-
กิเลสานํ ขีณาสวสฺส จิตฺตํ จาเลตุํ อสมตฺถภาโว เวทิตพฺโพ. อิมสฺมึปิ สุตฺเต
ขีณาสโวว กถิโต.
                       ๗-๘. เวรสุตฺตทฺวยวณฺณนา
     [๒๗-๒๘] สตฺตเม ภยํ เวรํ ปสวตีติ จิตฺตุตฺราสภยํ เจว ปุคฺคลเวรํ จ
ปฏิลภติ. เจตสิกนฺติ จิตฺตนิสฺสิตํ. ทุกฺขนฺติ กายวตฺถุกํ. โทมนสฺสนฺติ
ปฏิฆสมฺปยุตฺตํ ทุกฺขํ. อิมสฺมึ สุตฺเต โสตาปตฺติมคฺโค กถิโต. อฏฺฐมํ
ภิกฺขุสํฆสฺส กถิตํ, อิมสฺมึ ปน โสตาปนฺโนว กถิโตติ วุตฺตํ.
@เชิงอรรถ: ๑ ฉ.ม. ตานิ อารมฺมณานิ  ๒ ฉ.ม. โกฏฺเฏตฺวา โกฏฺเฏตฺวา


เนื้อความอรรถกถาฉบับภาษาบาลี อักษรไทย เล่มที่ ๑๖ หน้าที่ ๓๐๖.
http://84000.org/tipitaka/read/attha_page.php?book=16&page=306&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=16&A=6894&modeTY=2&pagebreak=1
http://84000.org/tipitaka/atthapali/th_line.php?B=16&A=6894&modeTY=2&pagebreak=1#p306