อรรถกถาเล่มที่ ๑๖ หน้าที่ ๓๒๑.

๓-๔. สํโยชนสุตฺตาทิวณฺณนา [๑๓-๑๔] ตติเย โอรมฺภาคิยานีติ เหฏฺฐาภาคิยานิ. อุทฺธมฺภาคิยานีติ อุปริ ภาคิยานิ. อิมสฺมึ สุตฺเต วฏฺฏเมว กถิตํ. จตุตฺเถ ขีลวินิพนฺธา ปญฺจกนิปาเต วิตฺถาริตาเยว. อาโรหปริณาเหนาติ ทีฆถุลตฺเตน. ^๑- ๕. อปฺปมาทสุตฺตวณฺณนา [๑๕] ปญฺจเม เอวเมว โขติ ยถา สพฺพสตฺตานํ สมฺมาสมฺพุทฺโธ อคฺโค, เอวํ สพฺเพสํ กุสลธมฺมานํ การาปกอปฺปมาโท อคฺโคติ ทฏฺฐพฺโพ. นนุ เจส โลกิโยว, กุสลธมฺมา ปน โลกุตฺตราปิ. อยญฺจ กามาวจโรว, กุสลธมฺมา ปน จตุภูมิกา. กถเมส เตสํ อคฺโคติ? ปฏิลาภกฏฺเฐน. ^๒- อปฺปมาเทน หิ เต ปฏิลพฺภนฺติ, ตสฺมา โส เตสํ อคฺโค. เตน วุตฺตํ สพฺเพ เต อปฺปมาทมูลกาติ. ชงฺคลานนฺติ ^๓- ปฐวีตลจารีนํ. ปาณานนฺติ สปาทกปาณานํ. ปทชาตานีติ ปทานิ. สโมธานํ คจฺฉนฺตีติ โอธานํ ปกฺเขปํ คจฺฉนฺติ. อคฺคมกฺขายตีติ เสฏฺฐมกฺขายติ. ยทิทํ มหนฺตตฺเตนาติ มหนฺตภาเวน อคฺคมกฺขายติ, น คุณวเสนาติ ^๔- อตฺโถ. วิสฺสิกนฺติ สุมนปุปฺผํ. อิทํ กิร สุตฺตํ สุตฺวา ภาติยมหาราชา วีมํสิตุกามตาย เอกสฺมึ คพฺเภ จตุชาติคนฺเธหิ ปริภณฺฑํ กตฺวา สุรภิปุปฺผานิ ^๕- อาหราเปตฺวา เอกสฺส คพฺภสฺส ^๖- มชฺเฌ สุมนปุปฺผมุฏฺฐึ ฐเปตฺวา เสสานิ ตสฺส สมนฺตโต มุฏฺฐึ กตฺวา ฐเปตฺวา ทฺวารํ ปิธาย พหิ นิกฺขนฺโต. อถสฺส มุหุตฺตํ พหิ วีตินาเมตฺวา ทฺวารํ วิวริตฺวา ปวิสนฺตสฺส สพฺพปฺปฐมํ สุมนปุปฺผคนฺโธ ฆานํ ปหริ, โส มหาตลสฺมิญฺเญว มหาเจติยาภิมุโข นิปชฺชิตฺวา "วิสฺสิกํ เตสํ อคฺคนฺติ กเถนฺเตน สุกถิตํ สมฺมาสมฺพุทฺเธนา"ติ เจติยํ วนฺทิ. ขุทฺทราชาโนติ ^๗- ขุทฺทกราชาโน. กูฏราชาโนติปิ ปาโฐ. @เชิงอรรถ: ^๑ ฉ.ม. ทีฆปุถุลนฺเตน ^๒ ฉ.ม. ปฏิลาภกตฺเตน ^๓ สี. ชงฺคมานนฺติ @^๔ ฉ.ม. น คุณคฺเคนาติ ^๕ ฉ.ม. สุคนฺธปุปฺผานิ @^๖ ฉ.ม. สมุคฺคสฺส ^๗ สี. กุฑฺฑราชาโนติปิ

เนื้อความอรรถกถาฉบับภาษาบาลี อักษรไทย เล่มที่ ๑๖ หน้าที่ ๓๒๑. http://84000.org/tipitaka/read/attha_page.php?book=16&page=321&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=16&A=7211&modeTY=2&pagebreak=1 http://84000.org/tipitaka/atthapali/th_line.php?B=16&A=7211&modeTY=2&pagebreak=1#p321