บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
ATTHAKATHA Book 16 : PALI ROMAN Aṅ.A. (manoratha.3) Page 338.
Attho pana ekoyeva. Indriyādīsupi eseva nayo. Tena vuttaṃ "eso ceva tassa attho"ti. Atthato hi ubhayampetaṃ majjhe bhinnasuvaṇṇamiva hoti. 9. Paṭhamakosalasuttavaṇṇanā [29] Navame yāvatāti yattakā. Kāsīkosalāti kāsīkosalajanapadā. Attheva. Aññathattanti ṭhitassa aññathattaṃ atthiyeva. Atthi vipariṇāmoti maraṇaṃpi atthiyeva. Tasmiṃpi nibbindatīti tasmiṃpi sampattijāte ukkaṇṭhati. Agge virajjatīti sampattiyā agge kosalarājabhāvepi virajjati. Pageva hīnasminti paṭhamataraṃyeva hīne ittaramanussānaṃ pañcakāmaguṇajāte. Manomayāti jhānamanena nibbattā. Bārāṇaseyyakanti bārāṇasiyaṃ uppannaṃ. Tattha kira kappāsopi mudu, suttakantikāyopi tantavāyāpi chekā, udakampi suci siniddhaṃ. Ubhatobhāgavimaṭṭhanti dvīsupi passesu maṭṭhaṃ mudu siniddhaṃ khāyati. Catasso paṭipadā lokiyalokuttaramissikā kathitā. Saññāsu paṭhamā kāmāvacarasaññā dutiyā rūpāvacarasaññā, tatiyā lokuttarasaññā, catutthā ākiñcaññāyatanasaññā. Yasmā pana sā saññā aggāti āgatā, tato paraṃ saññāpaññatti nāma natthi, tasmā aggāti vuttā. Bāhirakānanti sāsanato bahiddhā pavattānaṃ. No cassaṃ no ca me siyāti sace ahaṃ atīte nābhavissaṃ, etarahipi me ayaṃ attabhāvo na siyā. Na bhavissāmi na me bhavissatīti sacepi anāgate na bhavissāmi, na ca me kiñci palibodhajātaṃ bhavissati. Agge virajjatīti ucchedadiṭṭhiyaṃ virajjati. Ucchedadiṭṭhi hi idha nibbānassa santattā agganti jātā. Paramayakkhavisuddhinti uttamasatte visuddhiṃ. 1- Nevasaññānāsaññāyatanasamāpattiyā etaṃ adhivacanaṃ. Ākiñcaññāyatanañhi vipassanāpadaṭṭhānattā aggaṃ nāma jātaṃ, @Footnote: 1 cha.Ma. paramatthavisuddhinti uttamatthavisuddhiṃThe Pali Atthakatha in Roman Character Volume 16 Page 338. http://84000.org/tipitaka/read/attha_page.php?book=16&page=338&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=16&A=7602&pagebreak=1 http://84000.org/tipitaka/atthapali/rm_line.php?B=16&A=7602&pagebreak=1#p338
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถา อักษรโรมัน. หากพบข้อผิดพลาด กรุณาแจ้งได้ที่ [email protected]