อรรถกถาเล่มที่ ๑๖ หน้าที่ ๓๖๙.

ฐานุปฺปตฺติปญฺญาสงฺขาตาย เมธาย สมนฺนาคโต. อนุปริยายปถนฺติ อนุปริยายนามกํ ปาการมคฺคํ. ^๑- ปาการสนฺธินฺติ ทฺวินฺนํ อิฏฺฐกานํ อปคตฏฺฐานํ. ปาการวิวรนฺติ ปาการสฺส ฉินฺนฏฺฐานํ. ตเทเวตํ ปญฺหนฺติ ตํเยว "สสฺสโต โลโก"ติอาทินา นเยน ปุฏฺฐํ ฐปนียํ ปญฺหํ ปุนปิ ปุจฺฉิ. สพฺโพ จ เตน โลโกติ สตฺตูปลทฺธิยํเยว ฐตฺวา อญฺเญนากาเรน ปุจฺฉตีติ ทสฺเสติ. ๖. โกกนุทสุตฺตวณฺณนา [๙๖] ฉฏฺเฐ ปุพฺพาปยมาโนติ ปุพฺพสทิสานิ นิรุทกานิ กุรุมาโน. เกฺวตฺถ อาวุโสติ โก เอตฺถ อาวุโส. ยาวตา อาวุโส ทิฏฺฐีติ ยตฺติกา ทฺวาสฏฺฐิวิธาปิ ทิฏฺฐิ นาม อตฺถิ. ยาวตา ทิฏฺฐิฏฺฐานนฺติ "ขนฺธาปิ ทิฏฺฐิฏฺฐานํ, อวิชฺชาปิ, ผสฺโสปิ, สญฺญาปิ, วิตกฺโกปิ, อโยนิโสมนสิกาโรปิ, ปาปมิตฺโตปิ, ปรโตโฆโสปิ ทิฏฺฐิฏฺฐานนฺ"ติ ^๒- เอวํ ยตฺตกํ อฏฺฐวิธํ ทิฏฺฐิฏฺฐานํ ทิฏฺฐิการณํ นาม อตฺถิ. อธิฏฺฐานนฺติ ทิฏฺฐาธิฏฺฐานํ, ^๓- อธิฐตฺวา ^๔- อธิภวิตฺวา ปวตฺตาย ทิฏฺฐิยา เอตํ นามํ. ทิฏฺฐิปริยุฏฺฐานนฺติ "กตมานิ อฏฺฐารส ทิฏฺฐิปริยุฏฺฐานานิ. ยา ทิฏฺฐิ ทิฏฺฐิคตํ ทิฏฺฐิคฺคหนํ ทิฏฺฐิกนฺตารํ ทิฏฺฐิวิสูกํ ทิฏฺฐิวิปฺผนฺทิตํ ทิฏฺฐิสํโยชนํ ทิฏฺฐิสลฺลํ ทิฏฺฐิสมฺพาโธ ทิฏฺฐิปลิโพโธ ทิฏฺฐิพนฺธนํ ทิฏฺฐิปปาโต ทิฏฺฐานุสโย ทิฏฺฐิสนฺตาโป ทิฏฺฐิปริฬาโห ทิฏฺฐิคนฺโถ ทิฏฺฐุปาทานํ ทิฏฺฐาภินิเวโส ทิฏฺฐิปรามาโส. อิมานิ อฏฺฐารส ทิฏฺฐิปริยุฏฺฐานานี"ติ ^๕- เอวํ วุตฺตทิฏฺฐิปริยุฏฺฐานํ. สมุฏฺฐานนฺติ ทิฏฺฐิฏฺฐานสฺเสว เววจนํ. วุตฺตเญฺหตํ "ขนฺธา ปจฺจโย ทิฏฺฐีนํ อุปาทาย สมุฏฺฐานฏฺเฐนา"ติ ^๖- สพฺพํ วิตฺถาเรตพฺพํ. โสตาปตฺติมคฺโค ปน ทิฏฺฐิสมุคฺฆาโต นาม สพฺพทิฏฺฐีนํ สมุคฺฆาตกตฺตา. ตมหนฺติ ตํ สพฺพํ อหํ ชานามิ. กฺยาหํ วกฺขามีติ กึการณา อหํ วกฺขามิ. @เชิงอรรถ: ^๑ ฉ.ม. มคฺคํ ^๒ ขุ.ปฏิ. ๓๑/๓๐๔/๒๐๐ ทิฏฺฐิกถา (สฺยา) @^๓ ฉ.ม. ทิฏฺฐาธิฏฺฐานนฺติ ทิฏฺฐีนํ อธิฏฺฐานํ ^๔ ม. อธิติฏฺฐิตฺวา @^๕ ขุ. ปฏิ. ๓๑/๓๐๕/๒๐๑ ทิฏฺฐิกถา (สฺยา) ^๖ ขุ.ปฏิ. ๓๑/๓๐๔/๒๐๐ ทิฏฺฐิกถา (สฺยา)

เนื้อความอรรถกถาฉบับภาษาบาลี อักษรไทย เล่มที่ ๑๖ หน้าที่ ๓๖๙. http://84000.org/tipitaka/read/attha_page.php?book=16&page=369&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=16&A=8303&modeTY=2&pagebreak=1 http://84000.org/tipitaka/atthapali/th_line.php?B=16&A=8303&modeTY=2&pagebreak=1#p369