บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
ATTHAKATHA Book 16 : PALI ROMAN Aṅ.A. (manoratha.3) Page 57.
Padese. Kiñcināti 1- koci appamattakopi. Iti imasmiṃ sutte pañcasu ṭhānesu vipassanāva kathitā. Taṃ āraddhavipassako eko 2- bhikkhu kātuṃ sakkoti, ñāṇavā paññuttaro bahussutasamaṇopi kātuṃ sakkoti. Sotāpannasakadāgāmianāgāmino kātuṃ sakkontiyeva, khīṇāsave vattabbameva natthīti. Pañcamaṃ uttānatthameva. 6. Mittasuttavaṇṇanā [146] Chaṭṭhe kammantaṃ kāretīti khettādikammantaṃ kāreti. Adhikaraṇaṃ ādiyatīti cattāri adhikaraṇāni ādiyati. Pāmokkhesu bhikkhūsūti disāpāmokkhesu bhikkhūsu. Paṭiviruddho hotīti paccanīkaggāhitāya viruddho hoti. Avaṭṭhānacārikanti avavaṭṭhāne cārikaṃ. 3- 7. Asappurisadānasuttavaṇṇanā [147] Sattame asakkaccaṃ dānaṃ 4- detīti na sakkaritvā suciṃ katvā deti. Acittīkatvā detīti acittīkārena agāravavasena deti. Apaviṭṭhaṃ 5- detīti na nirantaraṃ deti, athavā chaḍḍetukāmo viya deti. Anāgamanadiṭṭhiko detīti katassa 6- nāma phalaṃ āgamissatīti evaṃ āgamanadiṭṭhiṃ na uppādetvā deti. Sukkapakkhe cittīkatvā detīti deyyadhamme ca dakkhiṇeyyesu ca cittīkāraṃ upaṭṭhapetvā deti. Tattha deyyadhammaṃ paṇītaṃ ojavantaṃ katvā dento deyyadhamme cittīkāraṃ upaṭṭhapeti nāma. Puggalaṃ vicinitvā dento dakkhiṇeyyesu cittīkāraṃ upaṭṭhapeti nāma. Sahatthā detīti āṇattiyā parahatthena adatvā "anamatagge saṃsāre vicarantena me hatthapādānaṃ aladdhakālassa pamāṇaṃ nāma natthi, vaṭṭamokkhaṃ bhavanissaraṇaṃ karissāmī"ti sahattheneva deti. Āgamanadiṭṭhikoti "anāgatabhāvassa paccayo bhavissatī"ti kammañca vipākañca saddahitvā detīti. @Footnote: 1 Sī. kiñcanāti, cha.Ma. kiñcananti 2 cha.Ma. ayaṃ pāṭho na dissati @3 Sī. anavatthacārikanti avavatthānacārikaṃ, cha.Ma. anavatthacārikanti anavatthānacārikaṃ @4 cha.Ma. ayaṃ pāṭho na dissati 5 cha.Ma. apaviddhaṃ 6 Sī. kudāssuThe Pali Atthakatha in Roman Character Volume 16 Page 57. http://84000.org/tipitaka/read/attha_page.php?book=16&page=57&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=16&A=1272&pagebreak=1 http://84000.org/tipitaka/atthapali/rm_line.php?B=16&A=1272&pagebreak=1#p57
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถา อักษรโรมัน. หากพบข้อผิดพลาด กรุณาแจ้งได้ที่ [email protected]