บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
ATTHAKATHA Book 16 : PALI ROMAN Aṅ.A. (manoratha.3) Page 69.
Uttamacittanissitānaṃ. Diṭṭhadhammasukhavihārānanti paccakkheyeva dhamme pavattikkhaṇe sukhavihārānaṃ. Ariyakantehīti ariyānaṃ kantehi maggaphalasīlehi. Ariyadhammaṃ samādāyāti ettha ariyadhammoti pañcasīlāni kathitāni. Merayaṃ vāruṇinti catuvidhaṃ 1- merayaṃ pañcavidhañca suraṃ. Dhammañcānuvitakkayeti navavidhaṃ lokuttaradhammaṃ anussativasena 2- vitakkeyya. Abyāpajjhaṃ hitaṃ cittanti niddukkhaṃ mettādi- brahmavihāracittaṃ. Devalokāya bhāvayeti brahmalokatthāya bhāveyya. Puññatthassa jigiṃsatoti 3- puññena atthikassa puññaṃ gavesantassa. Santesūti buddhapaccekabuddha- tathāgatasāvakesu. Vipulā hoti dakkhiṇāti evaṃ dinnadānaṃ mahapphalaṃ hoti. Anupubbenāti sīlapūraṇādinā anukkamena. Sesaṃ tikanipāte vuttatthameva. 10. Gavesīsuttavaṇṇanā [180] Dasame sitaṃ pātvākāsīti mahāmaggeneva gacchanto taṃ sālavanaṃ oloketvā "atthi nu kho imasmiṃ ṭhāne kiñci sukāraṇaṃ uppannapubban"ti addasa kassapabuddhakāle gavesinā upāsakena kataṃ sukāraṇaṃ. Athassa etadahosi "idaṃ sukāraṇaṃ bhikkhusaṃghassa apākaṭaṃ paṭicchannaṃ, handa naṃ bhikkhusaṃghassa pākaṭaṃ karomī"ti maggā okkamma aññatarasmiṃ padese ṭhitakova sitapātukammaṃ akāsi, aggaggadante dassetvā mandahasitaṃ hasi. Yathā hi lokiyamanussā udaraṃ paharantā "kahaṃ kahan"ti hasanti, na evaṃ buddhā. Buddhānaṃ pana haṭṭhapahaṭṭhākāra- mattameva hoti. Hasitañca nāmetaṃ terasahi somanassasahagatacittehi hoti. Tattha lokiyamahājano akusalato ca catūhi, kāmāvacarakusalato ca catūhīti aṭṭhahi cittehi hasati, sekhā akusalato diṭṭhigatasampayuttāni apanetvā chahi cittehi hasanti, khīṇāsavā catūhi sahetukakiriyācittehi, ekena ahetukakiriyācittenāti pañcahi cittehi hasanti. @Footnote: 1 cha.Ma. catubbidhaṃ 2 cha.Ma. anussativaseneva 3 cha.Ma. jigīsatotiThe Pali Atthakatha in Roman Character Volume 16 Page 69. http://84000.org/tipitaka/read/attha_page.php?book=16&page=69&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=16&A=1535&pagebreak=1 http://84000.org/tipitaka/atthapali/rm_line.php?B=16&A=1535&pagebreak=1#p69
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถา อักษรโรมัน. หากพบข้อผิดพลาด กรุณาแจ้งได้ที่ [email protected]