บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
ATTHAKATHA Book 2 : PALI ROMAN Vinaya.A. (samanta.2) Page 458.
Pāṇoti veditabbo. Taṃ khuddakaṃpi mahantaṃpi mārentassa āpatti. Nānākaraṇaṃ natthi. Mahante pana upakkamamahantattā akusalamahattaṃ hoti. Pāṇe pāṇasaññīti antamaso mañcapīṭhaṃ sodhento maṅkuṇabījakepi pāṇakasaññī nikkāruṇikatāya taṃ bhindanto apaneti pācittiyaṃ. Tasmā evarūpesu ṭhānesu kāruññaṃ upaṭṭhapetvā appamattena vattaṃ kātabbaṃ. Sesaṃ manussaviggahe vuttanayeneva veditabbaṃ saddhiṃ samuṭṭhānādīhi. Sañciccapāṇasikkhāpadaṃ paṭhamaṃ. {387} Dutiyasikkhāpade. Sappāṇakanti ye pāṇakā paribhogena maranti tehi pāṇakehi sappāṇakaṃ. Tādisaṃ hi jānaṃ paribhuñjato payoge payoge pācittiyaṃ. Pattapūraṃpi avicchinditvā ekappayogena pivato ekā āpatti. Tādisena udakena sāmisaṃ pattaṃ āvijjhitvā dhovatopi tādise udake uṇhayāgupattaṃ nibbāpayatopi taṃ udakaṃ hatthena vā uḷuṅkena vā gahetvā nahāyatopi payoge payoge pācittiyaṃ. Udakasoṇḍiṃ vā pokkharaṇiṃ vā pavisitvā bahi nikkhamanatthāya vīciṃ uṭṭhāpayatopi. Soṇḍiṃ vā pokkharaṇiṃ vā sodhentehi tato gahitaudakaṃ udakeyeva āsiñcitabbaṃ. Samīpamhi udake asati kappiyaudakassa aṭṭha vā dasa vā ghaṭe udakasaṇṭhānakappadese āsiñcitvā tattha āsiñcitabbaṃ. Pavaṭṭitvā udake patissatīti uṇhapāsāṇe udakaṃ nāsiñcitabbaṃ. Kappiyaudakena pana pāsāṇaṃ nibbāpetvā āsiñcituṃ vaṭṭati.The Pali Atthakatha in Roman Character Volume 2 Page 458. http://84000.org/tipitaka/read/attha_page.php?book=2&page=458&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=2&A=9657&pagebreak=1 http://84000.org/tipitaka/atthapali/rm_line.php?B=2&A=9657&pagebreak=1#p458
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถา อักษรโรมัน. หากพบข้อผิดพลาด กรุณาแจ้งได้ที่ [email protected]