อรรถกถาเล่มที่ ๒๙ หน้าที่ ๔๔๔.

[๑๐๘๓] อถสฺส ภควา ตถา อวตฺตพฺพตํ ทสฺเสนฺโต "อตฺถงฺคตสฺสา"ติ คาถมาห. ตตฺถ อตฺถงฺคตสฺสาติ อนุปาทาปรินิพฺพุตสฺส. น ปมาณมตฺถีติ รูปาทิปฺปมาณํ นตฺถิ. เยน นํ วชฺชุนฺติ เยน ราคาทินา นํ วเทยฺยุํ. สพฺเพสุ ธมฺเมสูติ สพฺเพสุ ขนฺธาทิธมฺเมสุ. เสสํ สพฺพตฺถ ปากฏเมว. เอวํ ภควา อิทมฺปิ สุตฺตํ อรหตฺตนิกูเฏเนว เทเสสิ, เทสนาปริโยสาเน จ วุตฺตสทิโส เอว ธมฺมาภิสมโย อโหสีติ. ปรมตฺถโชติกาย ขุทฺทกฏฺฐกถาย สุตฺตนิปาตฏฺฐกถาย อุปสีวสุตฺตวณฺณนา นิฏฺฐิตา. --------------- ๗. นนฺทสุตฺตวณฺณนา [๑๐๘๔-๕] สนฺติ โลเกติ นนฺทสุตฺตํ. ตตฺถ ปฐมคาถายตฺโถ:- โลเก ขตฺติยาทโย ชนา อาชีวกนิคณฺฐาทิเก สนฺธาย "สนฺติ มุนโย"ติ วทนฺติ, ตยิทํ ^๑- กถํสูติ กินฺนุ โข เต สมาปตฺติญาณาทินา ญาเณน อุปฺปนฺนตฺตา ญาณูปปนฺนํ มุนึ โน วทนฺติ, ^๒- เอวํวิธํ นุ วทนฺติ, อุทาหุ เว นานปฺปกาเรน ^๓- ลูขชีวิตสงฺขาเตน ชีวิเตนูปปนฺนนฺติ. อถสฺส ภควา ตทุภยมฺปิ ปฏิกฺขิปิตฺวา มุนึ ทสฺเสนฺโต "น ทิฏฺฐิยา"ติ คาถมาห. [๑๐๘๖-๗] อิทานิ "ทิฏฺฐาทีหิ สุทฺธี"ติ วทนฺตานํ วาเท กงฺขาปหานตฺถํ "เย เกจิเม"ติ ปุจฺฉติ. ตตฺถ อเนกรูเปนาติ โกตูหลมงฺคลาทินา. ตตฺถ ยตา ^๔- จรนฺตาติ ตตฺถ สกฺกายทิฏฺฐิยา คุตฺตา วิหรนฺตา. อถสฺส ตถา สุทฺธิอภาวํ ทีเปนฺโต ภควา ทุติยํ คาถมาห. @เชิงอรรถ: ^๑ ก. ตทิทํ ^๒ ฉ.ม. โน มุนึ วทนฺติ @^๓ ฉ.ม.,อิ. นานปฺปการเกน ^๔ ก. ยถา

เนื้อความอรรถกถาฉบับภาษาบาลี อักษรไทย เล่มที่ ๒๙ หน้าที่ ๔๔๔. http://84000.org/tipitaka/read/attha_page.php?book=29&page=444&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=29&A=9985&modeTY=2&pagebreak=1 http://84000.org/tipitaka/atthapali/th_line.php?B=29&A=9985&modeTY=2&pagebreak=1#p444