อรรถกถาเล่มที่ ๓๑ ภาษาบาลี อักษรไทย
เปต.อ. (ปรมตฺถที.)
หน้าที่ ๑๕๐.

    #[๓๒๗-๓๒๘] ยถาปิ ภทฺทเกติ คาถาทฺวยสฺส วุตฺตวิปริยาเยน อตฺถโยชนา
เวทิตพฺพา. ตตฺถ สมฺมา ธารํ ปเวจฺฉนฺเตติ วุฏฺฐิธารํ สมฺมเทว ปวตฺเตนฺเต,
อนฺวฑฺฒมาสํ อนุทสาหํ อนุปญฺจาหํ เทเว วสฺสนฺเตติ อตฺโถ. คุณวนฺเตสูติ
ฌานาทิคุณยุตฺเตสุ. ตาทิสูติ อิฏฺฐาทีสุ ตาทิลกฺขณปฺปตฺเตสุ. การนฺติ
ลิงฺควิปลฺลาเสน วุตฺตํ, อุปกาโรติ อตฺโถ. กีทิโส อุปกาโรติ อาห "ปุญฺญนฺ"ติ.
         [๓๒๙] "วิเจยฺย ทานํ ทาตพฺพํ        ยตฺถ ทินฺนํ มหปฺผลํ
               วิเจยฺย ทานํ ทตฺวาน         สคฺคํ คจฺฉนฺติ ทายกา.
                 [๓๓๐] วิเจยฺย ทานํ สุคตปฺปสฏฺฐํ
                       เย ทกฺขิเณยฺยา อิธ ชีวโลเก
                       เอเตสุ ทินฺนานิ มหปฺผลานิ
                       พีชานิ วุตฺตานิ ยถา สุเขตฺเต"ติ
อยํ สงฺคีติกาเรหิ ฐปิตา คาถา.
    #[๓๒๙] ตตฺถ วิเจยฺยาติ วิจินิตฺวา, ปุญฺญกฺเขตฺตํ ปญฺญาย อุปปริกฺขิตฺวา.
เสสํ สพฺพตฺถ อุตฺตานเมวาติ.
     ตยิทํ องฺกุรเปตวตฺถุ สตฺถารา ๑- ตาวตึสภวเน ทสสหสฺสจกฺกวาฬเทวตานํ ปุรโต
ทกฺขิเณยฺยสมฺปตฺติวิภาวนตฺถํ "มหาทานํ ตยา ทินฺนนฺ"ติอาทินา อตฺตนา สมุฏฺฐาปิตํ,
ตตฺถ ตโย มาเส อภิธมฺมํ เทเสตฺวา มหาปวารณาย เทวคณปริวุโต เทวเทโว
เทวโลกโต สงฺกสฺสนครํ โอตริตฺวา อนุกฺกเมน สาวตฺถึ ปตฺวา เชตวเน วิหรนฺโต
จตุปริสมชฺเฌ ทกฺขิเณยฺยสมฺปตฺติวิภาวนตฺถเมว "ยสฺส อตฺถาย คจฺฉามา"ติอาทินา
วิตฺถารโต เทเสตฺวา จตุสจฺจกถาย เทสนาย กูฏํ คณฺหิ, เทสนาวสาเน เตสํ
อเนกโกฏิปาณสหสฺสานํ ธมฺมาภิสมโย อโหสีติ.
                      องฺกุรเปตวตฺถุวณฺณนา นิฏฺฐิตา
@เชิงอรรถ: ๑ อิ. สตฺถา


เนื้อความอรรถกถาฉบับภาษาบาลี อักษรไทย เล่มที่ ๓๑ หน้าที่ ๑๕๐.
http://84000.org/tipitaka/read/attha_page.php?book=31&page=150&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=31&A=3322&modeTY=2&pagebreak=1
http://84000.org/tipitaka/atthapali/th_line.php?B=31&A=3322&modeTY=2&pagebreak=1#p150