อรรถกถาเล่มที่ ๓๒ หน้าที่ ๕๑๗.

ตาหํ จิตฺตกลึ พฺรูมีติ ตํ ตสฺมา ปมตฺตภาวโต จิตฺตกลึ จิตฺตกาลกณฺณึ อหํ กถยามิ. ปุนปิ ตํ พฺรูมิ กเถมิ จิตฺตทุพฺภกํ จิตฺตสงฺขาตสฺส อตฺตโน พหุการสฺส ^๑- สนฺตานสฺส อนตฺถาวหนโต จิตฺตทุพฺภึ. "จิตฺตทุพฺภคา"ติปิ ปฐนฺติ. จิตฺตสงฺขาตอลกฺขิก อปฺปปุญฺญาติ อตฺโถ. กินฺติ พฺรูหีติ เจ? อาห "สตฺถา เต ทุลฺลโภ ลทฺโธ, มานตฺเถ มํ นิโยชยี"ติ. กปฺปานํ อสงฺเขยฺยมฺปิ นาม พุทฺธ- สุญฺโญ โลโก โหติ, สตฺถริ อุปฺปนฺเนปิ มนุสฺสตฺตสทฺธาปฏิลาภาทโย ^๒- ทุลฺลภาเอว, ลทฺเธสุ จ เตสุ สตฺถาปิ อลทฺโธเยว ^๓- โหติ. เอวํ ทุลฺลโภ สตฺถา อิทานิ ตยา ลทฺโธ, ตสฺมึ ลทฺเธ สมฺปติปิ อนตฺเถ อหิเต อายตึ จ อนตฺถาวเห ทุกฺขาวเห อกุสเล มํ มา นิโยเชสีติ. เอวํ เถโร อตฺตโน จิตฺตํ โอวทนฺโตเอว วิปสฺสนํ วฑฺเฒตฺวา อรหตฺตํ ปาปุณิ. เตน วุตฺตํ อปทาเน ^๔- :- "ปทุโม นาม สมฺพุทฺโธ จิตฺตกูเฏ วสี ตทา ทิสฺวาน ตํ อหํ พุทฺธํ สยมฺภุํ อปราชิตํ. ^๕- องฺโกลํ ปุปฺผิตํ ทิสฺวา โอจินิตฺวานหํ ตทา อุปคนฺตฺวาน สมฺพุทฺธํ ปูเชสึ ปทุมํ ชินํ. ^๖- เอกตึเส อิโต กปฺเป ^๗- ยํ กมฺมมกรึ ตทา ^๘- ทุคฺคตึ นาภิชานามิ พุทฺธปูชายิทํ ผลํ. กิเลสา ฌาปิตา มยฺหํ ฯเปฯ กตํ พุทฺธสฺส สาสนนฺ"ติ. อนูปมตฺเถรคาถาวณฺณนา นิฏฺฐิตา. --------------- @เชิงอรรถ: ^๑ ฉ.ม. พหูปการสฺส ^๒ สี., อิ. มนุสฺสตฺตลาภปฏิลาภาทโย ^๓ ฉ.ม. ทุลฺลโภเยว @^๔ ขุ.อป. ๓๒/๑๖/๓๙๙ องฺโกลปุปฺผิยตฺเถราปทาน ^๕ ปาลิ. อุปคญฺฉหํ @^๖ สี. ปูชยึ ปทุมนายกํ, ฉ.ม. ปูชยึ ปทุมํ ชินํ ^๗ สี. สตฺตตึสมฺหิ กปฺปมฺหิ @^๘ ฉ.ม. ยํ ปุปฺผมภิปูชยึ

เนื้อความอรรถกถาฉบับภาษาบาลี อักษรไทย เล่มที่ ๓๒ หน้าที่ ๕๑๗. http://84000.org/tipitaka/read/attha_page.php?book=32&page=517&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=32&A=11568&modeTY=2&pagebreak=1 http://84000.org/tipitaka/atthapali/th_line.php?B=32&A=11568&modeTY=2&pagebreak=1#p517