อรรถกถาเล่มที่ ๓๔ ภาษาบาลี อักษรไทย
เถรี.อ. (ปรมตฺถที.)
หน้าที่ ๒๗.

                   ๔๑๖. ๑๕. อุตฺตราเถรีคาถาวณฺณนา
      กาเยน สํวุตา อาสินฺติอาทิกา อุตฺตราย เถริยา คาถา.
      ตสฺสาปิ วตฺถุ ติสฺสาเถริยา วตฺถุสทิสํ. สาปิ หิ สกฺยกุลปฺปสุตา โพธิสตฺตสฺส
โอโรธภูตา มหาปชาปติโคตมิยา สทฺธึ นิกฺขนฺตา โอภาสคาถาย อรหตฺตํ ปตฺวา
ปน:-
       [๑๕] "กาเยน สํวุตา อาสึ         วาจาย อุท เจตสา
             สมูลํ ตณฺหมพฺพุยฺห           สีติภูตามฺหิ นิพฺพุตา"ติ
อุทานวเสน สยเมว อิมํ คาถํ ๑- อภาสิ.
      ตตฺถ กาเยน สํวุตา อาสินฺติ กายิเกน สํวเรน สํวุตา อโหสึ. วาจายาติ
วาจสิเกน สํวเรน สํวุตา อาสินฺติ โยชนา, ปททฺวเยนาปิ สีลสํวรมาห. อุทาติ
อถ. เจตสาติ สมาธิจิตฺเตน, ๒- เอเตน วิปสฺสนาภาวนมาห. สมูลํ ตณฺหมพฺพุยฺหาติ
สมูลํ, ๓- สห วา อวิชฺชาย ตณฺหํ อุทฺธริตฺวา. อวิชฺชาย หิ ปฏิจฺฉาทิตาทีนเว
ภวตฺตเย ตณฺหา อุปฺปชฺชติ.
      อปโร นโย:- กาเยน สํวุตาติ สมฺมากมฺมนฺเตน สพฺพโส มิจฺฉากมฺมนฺตสฺส
ปหานา มคฺคสํวเรเนว กาเยน สํวุตา อาสึ. วาจายาติ สมฺมาวาจาย สพฺพโส
มิจฺฉาวาจาย ปหานา มคฺคสํวเรเนว วาจาย สํวุตา อาสินฺติ อตฺโถ. เจตสาติ
สมาธินา. เจโตสีเสน เหตฺถ สมฺมาสมาธิ วุตฺโต, สมฺมาสมาธิคฺคหเณเนว มคฺค-
ลกฺขเณน เอกลกฺขณา สมฺมาทิฏฺฐิอาทโย มคฺคธมฺมา คหิตาว โหนฺตีติ, มคฺคสํวเรน
อภิชฺฌาทิกสฺส อสํวรสฺส อนวเสสโต ปหานํ ทสฺสิตํ โหติ. เตเนวาห "สมูลํ
ตณฺหมพฺพุยฺหา"ติ. สีติภูตามฺหิ นิพฺพุตาติ สพฺพโส กิเลสปริฬาหาภาเวน สีติ-
ภาวปฺปตฺตา อนุปาทิเสสาย นิพฺพานธาตุยา นิพฺพุตา อมฺหีติ.
                    อุตฺตราเถรีคาถาวณฺณนา นิฏฺฐิตา.
@เชิงอรรถ: ๑ ฉ.ม. ตเมว คาถํ  ๒ สี. อธิจิตฺเตน  ๓ ฉ.ม. สานุสยํ


เนื้อความอรรถกถาฉบับภาษาบาลี อักษรไทย เล่มที่ ๓๔ หน้าที่ ๒๗.
http://84000.org/tipitaka/read/attha_page.php?book=34&page=27&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=34&A=575&modeTY=2&pagebreak=1
http://84000.org/tipitaka/atthapali/th_line.php?B=34&A=575&modeTY=2&pagebreak=1#p27