ATTHAKATHA Book 34 : PALI ROMAN
Therī.A. (paramatthadī.)
Page 43.

       [28]   Saṅghāṭiṃ nikkhipitvāna           pattakañca nikujjiya
              sele khambhesiṃ attānaṃ         tamokkhandhaṃ  padāliyā"ti
imā dve gāthā abhāsi.
      Tattha kiñcāpi khomhi kisikāti yadipi ahaṃ jarā jiṇṇā appamaṃsalohitabhāvena
kisasarīrā amhi. Gilānā bāḷhadubbalāti dhātvādivikārena 1- gilānā, teneva
gelaññena ativiya dubbalā. Daṇḍamolubbha gacchāmīti yattha katthaci gacchantī kattarayaṭṭhiṃ
ālambitvāva 2- gacchāmi. Pabbataṃ abhirūhiyāti evaṃ bhūtāpi vivekakāmatāya gijjhakūṭaṃ
pabbataṃ abhiruhitvā. Saṅghāṭiṃ nikkhipitvānāti santaruttarā eva hutvā yathā
saṃhataṃ aṃse ṭhapitaṃ saṅghāṭiṃ hatthapāse ṭhapetvā. Pattakañca nikujjiyāti mayhaṃ
valañjanamattikāpattaṃ adhomukhaṃ katvā ekamante ṭhapetvā. Sele khambhesiṃ attānaṃ,
tamokkhandhaṃ padāliyāti pabbate nisinnā iminā dīghena addhunā apadālitapubbaṃ
mohakkhandhaṃ padāletvā, teneva ca mohakkhandhapadālanena attānaṃ attabhāvaṃ khambhesiṃ,
mama santānaṃ āyatiṃ anupattidhammatāpādanena vikhambhesinti attho.
                     Cittātherīgāthāvaṇṇanā niṭṭhitā.
                       ------------------
                   425. 6. Mettikātherīgāthāvaṇṇanā
      kiñcāpi khomhi dukkhitātiādikā mettikāya theriyā gāthā.
      Ayampi purimabuddhesu katādhikārā tattha tattha bhave vivaṭṭūpanissayaṃ puññaṃ
upacinantī siddhatthassa bhagavato kāle gahapatikule nibbattitvā viññutaṃ patvā
satthu cetiye ratanapaṭimaṇḍitāya mekhalāya pūjaṃ akāsi. Sā tena puññakammena
@Footnote: 1 Ma.jaratādivikārena  2 Ma. yaṭṭhiṃ avalubbhitvāva


The Pali Atthakatha in Roman Character Volume 34 Page 43.
http://84000.org/tipitaka/read/attha_page.php?book=34&page=43&pages=1&edition=roman
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_rm.php?B=34&A=916&pagebreak=1
http://84000.org/tipitaka/atthapali/rm_line.php?B=34&A=916&pagebreak=1#p43