อรรถกถาเล่มที่ ๓๔ ภาษาบาลี อักษรไทย
เถรี.อ. (ปรมตฺถที.)
หน้าที่ ๙.

                    ๔๐๓. ๒. มุตฺตาเถรีคาถาวณฺณนา
         [๒] "มุตฺเต มุจฺจสฺสุ โยเคหิ      จนฺโท ราหุคฺคหา อิว
              วิปฺปมุตฺเตน จิตฺเตน        อนณา ภุญฺช ปิณฺฑกนฺ"ติ
อยํ มุตฺตานามาย สิกฺขมานาย คาถา.
      อยมฺปิ ปุริมพุทฺเธสุ กตาธิการา ตตฺถ ตตฺถ ภเว วิวฏฺฏูปนิสฺสยํ กุสลํ
อุปจินนฺตี วิปสฺสิสฺส ภควโต กาเล กุลเคเห นิพฺพตฺติตฺวา วิญฺญุตํ ปตฺวา เอกทิวสํ
สตฺถารํ วีถิยํ คจฺฉนฺตํ ทิสฺวา ปสนฺนมานสา ปญฺจปติฏฺฐิเตน วนฺทิตฺวา ปิติเวเคน
สตฺถุ ปาทมูเล อวกุชฺชา นิปชฺชิ. สา เตน ปุญฺญกมฺเมน เทวโลเก นิพฺพตฺติตฺวา
อปราปรํ สุคตีสุเยว สํสรนฺตี อิมสฺมึ พุทฺธุปฺปาเท สาวตฺถิยํ พฺราหฺมณมหาสาลกุเล
นิพฺพตฺติ, มุตฺตาติสฺสา นามํ อโหสิ. สา อุปนิสฺสยสมฺปนฺนตาย วีสติวสฺสกาเล
มหาปชาปติโคตมิยา สนฺติเก ปพฺพชิตฺวา สิกฺขมานาว หุตฺวา กมฺมฏฺฐานํ กถาเปตฺวา
วิปสฺสนาย กมฺมํ กโรติ. สา เอกทิวสํ ภตฺตกิจฺจํ กตฺวา ปิณฺฑปาตปฏิกฺกนฺตา
เถรีนํ ภิกฺขุนีนํ วตฺตํ ทสฺเสตฺวา ทิวาฏฺฐานํ คนฺตฺวา รโห นิสินฺนา  วิปสฺสนา-
กมฺมฏฺฐาเน ๑- มนสิการํ อารภิ. สตฺถา สุรภิคนฺธกุฏิยา นิสินฺโนว โอภาสํ
วิสฺสชฺเชตฺวา ตสฺสา ปุรโต นิสินฺโน วิย อตฺตานํ ทสฺเสตฺวา
             "มุตฺเต มุจฺจสฺสุ โยเคหิ     จนฺโท ราหุคฺคหา อิว
              วิปฺปมุตฺเตน จิตฺเตน       อนณา ภุญฺช ปิณฺฑกนฺ"ติ
อิมํ คาถมาห.
      ตตฺถ มุตฺเตติ ตสฺสา อาลปนํ. มุจฺจสฺสุ โยเคหีติ มคฺคปฏิปาฏิยา ๒- กาม-
โยคาทีหิ จตูหิ โยเคหิ มุจฺจ, เตหิ วิมุตฺตจิตฺตา โหหิ. ยถา กึ? จนฺโท ราหุคฺคหา
อิวาติ ราหุสงฺขาโต ๓- คหโต จนฺโท วิย อุปกฺกิเลสโต วิมุจฺจสฺสุ. วิปฺปมุตฺเตน
@เชิงอรรถ: ๑ ฉ.ม. วิปสฺสนาย  ๒ ก. มคฺคปฏิปตฺติยา  ๓ สี.,อิ. ราหุสงฺขาตโต


เนื้อความอรรถกถาฉบับภาษาบาลี อักษรไทย เล่มที่ ๓๔ หน้าที่ ๙.
http://84000.org/tipitaka/read/attha_page.php?book=34&page=9&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=34&A=191&modeTY=2&pagebreak=1
http://84000.org/tipitaka/atthapali/th_line.php?B=34&A=191&modeTY=2&pagebreak=1#p9