romanATTHA book 36 Page 113.

Satthā na bhikkhave sārīputto ekavāraṃ jahitakaṃ jīvitaṃ pariccajantopi puna gaṇhatīti imaṃ dhammadesanaṃ āharitvā anusandhiṃ ghaṭetvā jātakaṃ samodhānesi tadā sappo sārīputto ahosi vejjo pana ahamevāti. Visavantajātakaṃ navamaṃ. --------- 10. Kuddālajātakaṃ na taṃ jitaṃ sādhu jitanti imaṃ satthā jetavane viharanto cittahatthasārīputtaṃ ārabbha kathesi. So kira sāvatthiyaṃ eko kuladārako athekadivasaṃ kasitvā āgacchanto vihāraṃ pavisitvā ekassa therassa pattato siniddhaṃ madhurappaṇītabhojanaṃ labhitvā cintesi mayaṃ rattindivaṃ sahatthena nānākammāni kurumānāpi evarūpaṃ madhurāhāraṃ na labhāma mayāpi samaṇena bhavitabbanti. So pabbajitvā māsaḍḍhamāsaccayena ayoniso manasikaronto kilesavasiko hutvā vibbhamitvā puna bhattena kilamanto āgantvā pabbajitvā abhidhammaṃ uggaṇhi iminā upāyena cha vāre vibbhamitvā pabbajito sattame bhikkhubhāve sattappakaraṇiko hutvā bahunnaṃ bhikkhūnaṃ dhammaṃ vācento vipassanaṃ vaḍḍhetvā arahattaṃ pāpuṇi. Athassa sahāyakā bhikkhū kiṃ nu kho āvuso cittahattha pubbe viya te etarahi kilesā na vaḍḍhantīti parihāsaṃ kariṃsu.

The Pali Atthakatha in Roman Character Volume 36 Page 113. http://84000.org/tipitaka/read/attha_page.php?book=36&page=113&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=36&A=2248&pagebreak=1 http://84000.org/tipitaka/atthapali/rm_line.php?B=36&A=2248&pagebreak=1#p113