ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๓๗ ภาษาบาลี อักษรไทย ชา.อ.๓ ทุกนิปาตวณฺณนา

หน้าที่ ๒๖๑-๒๖๔.

หน้าที่ ๒๖๑.

๘ กาสาววคฺควณฺณนา -------- ๑ กาสาวชาตกํ ฯ อนิกฺกสาโว กาสาวนฺติ อิทํ สตฺถา เชตวเน วิหรนฺโต เทวทตฺตํ อารพฺภ กเถสิ ฯ วตฺถุ ปน ราชคเห สมุฏฺฐิตํ ฯ เอกสฺมึ สมเย ธมฺมเสนาปติ ปญฺจหิ ภิกฺขุสเตหิ สทฺธึ เวฬุวเน วิหรติ ฯ อถ เทวทตฺโตปิ อตฺตโน อนุรูปาย ทุสฺสีลปริสาย ปริวุโต คยาสีเส วิหรติ ฯ ตสฺมึ สมเย ราชคหวาสิโน ฉนฺทกํ สํหริตฺวา ทานํ สชฺชยึสุ ฯ อเถโก โวหารตฺถาย อาคตวาณิโช อิมํ สาฏกํ วิสฺสชฺเชตฺวา มมฺปิ ปตฺติกํ กโรถาติ มหคฺฆํ คนฺธกาสาวํ อทาสิ ฯ นาครา มหาทานํ ปวตฺตยึสุ ฯ สพฺพํ ฉนฺทเกน สงฺกฑฺฒิตํ กหาปเณเหว นิฏฺฐาสิ ฯ โส สาฏโก อติเรโก อโหสิ ฯ มหาชนา สนฺนิปติตฺวา อยํ คนฺธกาสาวสาฏโก อติเรโก, กสฺส นํ ทุสฺสํ ทสฺสาม, กึ มยํ สาริปุตฺตสฺส ทสฺสาม อุทาหุ เทวทตฺตสฺสาติ มนฺตยึสุ ฯ ตตฺเถเก สาริปุตฺตตฺเถรสฺสาติ อาหํสุ ฯ อปเร สาริปุตฺตตฺเถโร กติปาหํ วสิตฺวา ยถารุจึ ปกฺกมิสฺสติ, เทวทตฺตตฺเถโร ปน นิพทฺธํ อมฺหากํ นครเมว อุปนิสฺสาย วิหรติ, มงฺคลาวมงฺคเลสุ อยเมว อมฺหากํ อวสฺสโย, เทวทตฺตสฺส ทสฺสามาติ อาหํสุ ฯ สมฺพหุลิกํ กเถนฺเตสุปิ เทวทตฺตสฺส ทสฺสามาติ วตฺตาโร พหู อเหสุํ ฯ

--------------------------------------------------------------------------------------------- หน้าที่ ๒๖๒.

อถ นํ เทวทตฺตสฺส อทํสุ ฯ เทวทตฺโต ตสฺส ทุสฺสา ฉินฺทาเปตฺวา โอวฏฺฏิกํ สิพฺพาเปตฺวา รชาเปตฺวา สุวณฺณปตฺตวณฺณํ ๑- กตฺวา ปารุปิ ฯ ตสฺมึ กาเล ตึสมตฺตา ภิกฺขู ราชคหา สาวตฺถึ คนฺตฺวา สตฺถารํ วนฺทิตฺวา กตปฏิสนฺถารา ตํ ปวตฺตึ อาโรเจตฺวา เอวํ ภนฺเต เทวทตฺโต อตฺตโน อนนุจฺฉวิกํ อรหตฺตทฺธชํ ๒- ปารุปีติ อาโรเจสุํ ฯ สตฺถา น ภิกฺขเว เทวทตฺโต อิทาเนว อตฺตโน อนนุรูปํ อรหตฺตทฺธชํ ปริทหติ, ปุพฺเพปิ ปริทหติ เยวาติ วตฺวา อตีตํ อาหริ ฯ อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต หิมวนฺตปฺปเทเส หตฺถิกุเล นิพฺพตฺเตตฺวา วยปฺปตฺโต อสีติสหสฺส- มตฺตวารณปริวาโร ยูถปติ หุตฺวา อรญฺญายตเน วสต ฯ อเถโก ทุคฺคตมนุสฺโส พาราณสิยํ วิหรนฺโต ทนฺตการวีถิยํ ทนฺตกาเร ทนฺตวลยาทีนิ กโรนฺเต ทิสฺวา หตฺถิทนฺเต ลภิตฺวา คณฺหิสฺสถาติ ปุจฺฉิ ฯ อาม คณฺหิสฺสามาติ อาหํสุ ฯ โส สาธูติ อาวุธํ อาทาย กาสายวตฺถวสโน ปจฺเจกพุทฺธเวสํ คณฺหิตฺวา ปฏิสีสกํ ปฏิมุญฺจิตฺวา หตฺถิวีถิยํ ฐตฺวา อาวุเธน หตฺถึ มาเรตฺวา ทนฺเต อาทาย พาราณสิยํ วิกฺกิณนฺโต ชีวิตํ กปฺเปสิ ฯ โส อปรภาเค โพธิสตฺตสฺส ปริวารหตฺถีนํ สพฺพปจฺฉิมหตฺถึ มาเรตุํ อารภิ ฯ หตฺถิโน เทวสิกํ หตฺถีสุ ปริหายนฺเตสุ เกน นุ โข การเณน หตฺถิโน ปริหายนฺตีติ โพธิสตฺตสฺส อาโรเจสุํ ฯ โพธิสตฺโต ปริคฺคณฺหนฺโต ปจฺเจกพุทฺธเวสํ @เชิงอรรถ: สุวณฺณปฏวณฺณนฺติปิ ฯ อรหนฺตทฺธชนฺติปิ, อรหทฺธชนฺติปิ ฯเปฯ

--------------------------------------------------------------------------------------------- หน้าที่ ๒๖๓.

คเหตฺวา หตฺถิวีถิปริยนฺเต เอโก ปุริโส ติฏฺฐติ, กจฺจิ นุ โข มาเรติ, คณฺหิสฺสามิ นนฺติ เอกทิวสํ หตฺถี ปุรโต กตฺวา สยํ ปจฺฉโต อโหสิ ฯ โส โพธิสตฺตํ ทิสฺวา อาวุธํ อาทาย ปกฺขนฺทิ ฯ โพธิสตฺโต นิวตฺติตฺวา ฐิโต ภูมิยํ โปเถตฺวา มาเรสฺสามิ นนฺติ โสณฺฑํ ปสาเรตฺวา เตน ปริทหิตานิ กาสายานิ ทิสฺวา อิมํ อรหตฺตทฺธชํ มยา ครุกาตุํ วฏฺฏตีติ โสณฺฑํ ปฏิสํหริตฺวา อมฺโภ ปุริส น นุ เอส อรหตฺตทฺธโช อนนุจฺฉวิโก ตุยฺหํ, กสฺมา เอตํ ปริทหสีติ วตฺวา อิมา คาถา อโวจ อนิกฺกสาโว กาสาวํ โย วตฺถํ ปริทหิสฺสติ อเปโต ทมสจฺเจน น โส กาสาวมรหติ, โย จ วนฺตกสาวสฺส สีเลสุ สุสมาหิโต อุเปโต ทมสจฺเจน ส เว กาสาวมรหตีติ ฯ ตตฺถ อนิกฺกสาโวติ กสาโว วุจฺจติ ราโค โทโส โมโห มกฺโข ปลาโส อิสฺสา มจฺฉริยํ มายา สาเถยฺยํ ถมฺโภ สารมฺโภ มาโน อติมาโน มโท ปมาโท สพฺเพ อกุสลา ธมฺมา สพฺเพ ทุจฺจริตา สพฺพํ ภวคามิกมฺมํ ทิยฑฺฒกิเลสสหสฺสํ, เอโส กสาโว นาม ฯ โส ยสฺส ปุคฺคลสฺส อปฺปหีโน สนฺตานโต นิสฺสิโต ๑- อนิกฺขนฺโต โส อนิกฺกสาโว นาม ฯ กาสาวนฺติ กาสายรสปีตํ อรหตฺตทฺธชภูตํ ฯ โย วตฺถํ ปริทหิสฺสตีติ โย เอวรูโป หุตฺวา เอวรูปํ วตฺถํ ปริทเหสฺสติ นิวาเสติ เจว ปารุปติ จ ฯ อเปโต @เชิงอรรถ: อนิสฺสฏฺโฐติปิ ฯ

--------------------------------------------------------------------------------------------- หน้าที่ ๒๖๔.

ทมสจฺเจนาติ อินฺทฺริยทมสงฺขาเตน ทเมน นิพฺพานสงฺขาเตน จ ปรมตฺถสจฺเจน อเปโต ปริวชฺชิโต ฯ นิสฺสกฺกตฺเถ วา กรณวจนํ ฯ เอตสฺมา ทมสจฺจา อเปโตติ อตฺโถ ฯ สจฺจนฺติ เจตฺถ จตุสจฺจมฺปิ วตฺตติ เยว ฯ น โส กาสาวมรหตีติ โส ปุคฺคโล อนิกฺกสาวตฺตา อรหตฺตทฺธชํ กาสาวํ น อรหติ, อนนุจฺฉวิโก เอตสฺส ฯ โย จ วนฺตกสาวสฺสาติ โย ปน ปุคฺคโล ยถาวุตฺตสฺเสว กาสาวสฺส วนฺตตฺตา วนฺตกสาโว อสฺส ฯ สีเลสุ สุสมาหิโตติ มคฺคสีเลสุ เจว ผลสีเลสุ จ สมฺมา อาหิโต อาเนตฺวา ฐปิโต วิย เตสุ ปติฏฺฐิโต ฯ เตหิ สีเลหิ สมงฺคีภูตสฺเสตํ อธิวจนํ ฯ อุเปโตติ สมฺปนฺโน สมนฺนาคโต ฯ ทมสจฺเจนาติ วุตฺตปฺปกาเรน ทเมน เจว สจฺเจน จ ฯ ส เว กาสาวมรหตีติ เอโส เอวรูโป ปุคฺคโล อิมํ อรหตฺตทฺธชํ กาสาวํ อรหติ ฯ เอวํ โพธิสตฺโต ตสฺส ปุริสสฺส อิมํ การณํ กเถตฺวา อิโต ปฏฺฐาย มา อิธาคจฺฉสิ, อาคจฺฉสิ เจ, ชีวิตนฺเต นตฺถีติ ตชฺเชตฺวา ปลาเปสิ ฯ สตฺถา อิมํ ธมฺมเทสนํ อาหริตฺวา ชาตฺกํ สโมธาเนสิ ฯ ตทา หตฺถิมารกปุริโส เทวทตฺโต อโหสิ, ยูถปติ ปน อหเมวาติ ฯ กาสาวชาตกํ ปฐมํ ฯ ---------


เนื้อความอรรถกถาฉบับภาษาบาลี อักษรไทย เล่มที่ ๓๗ หน้าที่ ๒๖๑-๒๖๔. http://84000.org/tipitaka/read/attha_page.php?book=37&page=261&pages=4&modeTY=2&pagebreak=1&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=37&A=5174&modeTY=2&pagebreak=1 http://84000.org/tipitaka/atthapali/th_line.php?B=37&A=5174&modeTY=2&pagebreak=1#p261


จบการแสดงผล หน้าที่ ๒๖๑-๒๖๔.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]