บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
อรรถกถาเล่มที่ ๔๐ ภาษาบาลี อักษรไทย ชา.อ.๖ เอกาทสก-ปกิณฺณก หน้าที่ ๓๒๔.
ตสฺมา อหุโปสถํ ปาลยามิ มาโน มมํ มา ปุนราคมาสีติ ฯ ตตฺถ ยํ โนติ ยํ อตฺถํ ตฺวํ อมฺเห อปุจฺฉิ ฯ ยถาปชานนฺติ อตฺตโน ปชานนิยาเมน ตํ มยํ พฺยากริมฺห ฯ อนูปลิตฺโตติ สพฺพกิเลเสหิ อนูปลิตฺโต ฯ โส มํ อเวทีติ โส มม อิทานิ คนฺตพฺพฏฺฐานญฺจ คตฏฺฐานญฺจ อนาคเต ตฺวํ เอวนฺนาโม ภวิสฺสสิ เอวงฺโคตฺโต เอวรูปํ เต สีลํ จรณํ ภวิสฺสตีติ เอวํ นามญฺจ โคตฺตญฺจ จรณญฺจ สพฺพํ มํ อเวทิ ชานาเปสิ กเถสิ เมติ อตฺโถ ฯ เอวมหํ นิคฺคหินฺติ เอวํ กเถนฺตสฺสาปิ ตสฺส อหํ อตฺตโน มานํ นิสฺสาย ปาเท น วนฺทินฺติ ฯ เอวํ มหาสตฺโต อตฺตโน อุโปสถกรณํ กเถตฺวา เต โอวทิตฺวา อุยฺโยเชตฺวา ปณฺณสาลํ ปาวิสิ ฯ อิตเรปิ ยถาฏฺฐานานิ อคมํสุ ฯ มหาสตฺโต อปริหีนชฺฌาโน พฺรหฺมโลกปรายโน อโหสิ ฯ อิตเร ตสฺโสวาเท ฐตฺวา สคฺคปรายนา อเหสุํ ฯ สตฺถา อิมํ ธมฺมเทสนํ อาหริตฺวา เอวํ อุปาสกา อุโปสโถ นาเมโส โปราณกปณฺฑิตานํ วํโส อุปวสิตพฺโพ อุโปสโถติ วตฺวา ชาตกํ สโมธาเนสิ ตทา กโปโต อนุรุทฺโธ อโหสิ อจฺโฉ กสฺสโป สิงฺคาโล โมคฺคลฺลาโน สปฺโป สารีปุตฺโต ตาปโส ปน อหเมวาติ ฯ ปญฺจอุโปสถชาตกํ สตฺตมํ ฯ -------------เนื้อความอรรถกถาฉบับภาษาบาลี อักษรไทย เล่มที่ ๔๐ หน้าที่ ๓๒๔. http://84000.org/tipitaka/read/attha_page.php?book=40&page=324&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=40&A=6603&modeTY=2&pagebreak=1 http://84000.org/tipitaka/atthapali/th_line.php?B=40&A=6603&modeTY=2&pagebreak=1#p324
จบการแสดงผล หน้าที่ ๓๒๔.
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]