อรรถกถาเล่มที่ ๔๕ ภาษาบาลี อักษรไทย
นิทฺ.อ.๑ (สทฺธมฺมปชฺ.)
หน้าที่ ๒๙๗.

โสปิ อนฺโตพุทฺธญาเณ ปริวตฺตตี"ติ. เตสํ วิมตึ วิธเมนฺโต "สพฺรหฺมโก"ติ อาห.
ตโต เยสํ สิยา "ปุถุสมณพฺราหฺมณา สาสนปจฺจตฺถิกา, กึ เตปิ อนฺโตพุทฺธญาเณ
ปริวตฺตนฺตี"ติ. เตสํ วิมตึ วิธเมนฺโต "สสฺสมณพฺราหฺมณี ปชา"ติ อาห.
    เอวํ อุกฺกฏฺฐานํ อนฺโตพุทฺธญาเณ ปริวตฺตนภาวํ ปกาเสตฺวา อถ สมฺมุติเทเว จ
อวเสสมนุสฺเส จ อุปาทาย อุกฺกฏฺฐปริจฺเฉทวเสน เสสสตฺตโลกสฺส อนฺโตพุทฺธญาเณ
ปริวตฺตนภาวํ ปกาเสนฺโต "สเทวมนุสฺสา"ติ อาห. อยเมตฺถ อนุสนฺธิกฺกโม.
โปราณา ปนาหุ "สเทวโกติ เทวตาหิ สทฺธึ อวเสสโลโก. สมารโกติ มาเรน
สทฺธึ อวเสสโลโก. สพฺรหฺมโกติ พฺรหฺเมหิ สทฺธึ อวเสสโลโก. เอวํ สพฺเพปิ ติภวูปเค
สตฺเต ตีหากาเรหิ ตีสุ ปเทสุ ปกฺขิปิตฺวา ปุน ทฺวีหากาเรหิ ปริยาทาตุํ
`สสฺสมณพฺราหฺมณี ปชา สเทวมนุสฺสา'ติ วุตฺตํ. เอวํ ปญฺจหิ ปเทหิ เตน เตน อากาเรน
เตธาตุกเมว ปริยาทินฺนํ โหตี"ติ.
    อนฺตมโสติ อุปริมนฺเตน. ติมิติมิงฺคลนฺติ เอตฺถ ติมิ นาม เอกา มจฺฉชาติ,
ติมึ คิลิตุํ สมตฺถา ตโต มหนฺตสรีรา ติมิงฺคลา นาม เอกา มจฺฉชาติ, ติมิงฺคลมฺปิ
คิลิตุํ สมตฺถา ปญฺจโยชนสติกสรีรา ติมิติมิงฺคลา นาม เอกา มจฺฉชาติ. อิธ
ชาติคฺคหเณน เอกวจนํ กตนฺติ เวทิตพฺพํ. ครุฬํ เวนเตยฺยนฺติ เอตฺถ ครุโฬติ
ชาติวเสน นามํ. เวนเตยฺโยติ โคตฺตวเสน. ปเทเสติ เอกเทเส. สาริปุตฺตสมาติ
สพฺพพุทฺธานํ ธมฺมเสนาปติตฺเถเร คเหตฺวา วุตฺตนฺติ เวทิตพฺพํ. เสสสาวกา หิ
ปญฺญาย ธมฺมเสนาปติตฺเถเรน สมา นาม นตฺถิ. ยถาห "เอตทคฺคํ ภิกฺขเว มม
สาวกานํ ภิกฺขูนํ มหาปญฺญานํ ยทิทํ สาริปุตฺโต"ติ. ๑- อฏฺฐกถายญฺจ ๒- วุตฺตํ:-
             "โลกนาถํ ฐเปตฺวาน   เย จญฺเญ สนฺติ ปาณิโน
             ปญฺญาย สาริปุตฺตสฺส    กลํ นาคฺฆนฺติ โสฬสินฺ"ติ.
@เชิงอรรถ: ๑ องฺ.เอกก. ๒๐/๑๘๘/๒๓  ๒ วิสุทฺธิ. ๒/๗, ปฏิสํ.อ. ๒/๓๐๐


เนื้อความอรรถกถาฉบับภาษาบาลี อักษรไทย เล่มที่ ๔๕ หน้าที่ ๒๙๗.
http://84000.org/tipitaka/read/attha_page.php?book=45&page=297&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=45&A=6884&modeTY=2&pagebreak=1
http://84000.org/tipitaka/atthapali/th_line.php?B=45&A=6884&modeTY=2&pagebreak=1#p297