บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
ATTHAKATHA Book 46 : PALI ROMAN Nid.A.2 (saddhammapaj.) Page 32.
[44] Idāni "atthaṃ paletī"ti sutvā tassa yoniso atthamasallakkhento "atthaṅgato so"ti gāthamāha. Tassattho:- so atthaṅgato udāhu natthi, udāhu ve sassatiyā sassatabhāvena arogo avipariṇāmadhammo soti evaṃ tamme munī sādhu byākarohi kiṃkāraṇā? tathā hi te vidito esa dhammoti. Niddese niruddhoti nirodhaṃ patto. Ucchinnoti ucchinnasantāno. Vinaṭṭhoti vināsaṃ patto. [45] Athassa bhagavā tathā avattabbataṃ dassento "atthaṅgatassā"ti gāthamāha. Tattha atthaṅgatassāti anupādāya parinibbutassa. Na pamāṇamatthīti rūpādippamāṇaṃ natthi. Yena naṃ vajjunti yena rāgādinā taṃ vadeyyuṃ. Sabbesu dhammesūti sabbesu khandhādidhammesu. Niddese adhivacanā 1- cāti sirivaḍḍhako dhanavaḍḍhakotiādayo hi vacanamattaṃyeva 2- adhikāraṃ katvā pavattā adhivacanā nāma. Adhivacanānaṃ pathā adhivacanapathā nāma. "abhisaṅkharontīti kho bhikkhave tasmā saṅkhārā"ti 3- evaṃ niddhāretvā 4- sahetukaṃ katvā vuccamānā abhilāpā nirutti nāma. Niruttīnaṃ pathā niruttipathā nāma. "takko vitakko saṅkappo"ti 5- evaṃ tena tena pakārena paññāpanato paññatti nāma. Paññattīnaṃ pathā paññattipathā 6- nāma. Sesaṃ sabbattha pākaṭameva. Evaṃ bhagavā idampi suttaṃ arahattanikūṭeneva desesi, desanāpariyosāne ca vuttasadisova dhammābhisamayo ahosīti. Saddhammappajjotikāya cūḷaniddesaṭṭhakathāya upasīvamāṇavasuttaniddesavaṇṇanā niṭṭhitā. Chaṭṭhaṃ. ------------- @Footnote: 1 cha.Ma. adhivacanāni 2 ka....matateyeva 3 saṃ.kha. 17/79/71 @4 cha.Ma. niddhāritvā 5 abhi.saṅa. 34/7/22 6 abhi.A. 1/99The Pali Atthakatha in Roman Character Volume 46 Page 32. http://84000.org/tipitaka/read/attha_page.php?book=46&page=32&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=46&A=785&pagebreak=1 http://84000.org/tipitaka/atthapali/rm_line.php?B=46&A=785&pagebreak=1#p32
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถา อักษรโรมัน. หากพบข้อผิดพลาด กรุณาแจ้งได้ที่ [email protected]