อรรถกถาเล่มที่ ๔๗ หน้าที่ ๓๐๑.

เสสมคฺคตฺตยํ. ตํ หิ ปฐมมคฺเคน ทิฏฺฐสฺมึเยว ธมฺเม ภาวนาวเสน อุปฺปชฺชติ, น อทิฏฺฐปุพฺพํ กิญฺจิ ปสฺสติ, ตสฺมา "ภาวนา"ติ วุจฺจติ. เหฏฺฐา ปน ภาวนา- มคฺคสฺส อปรินิฏฺฐิตตฺตา "ทฺวินฺนํ ญาณานนฺ"ติ อวตฺวา โสตาปตฺติสกทาคามิ- อนาคามิมคฺคลาภิโน สนฺธาย "ฌานวิโมกฺเข กุสลตา"ติ วุตฺตํ, อรหตฺตมคฺคลาภิโน ปน ภาวนามคฺคสฺส ปรินิฏฺฐิตตฺตา "ทฺวินฺนํ ญาณานํ กุสลา"ติ วุตฺตนฺติ เวทิตพฺพํ. มคฺคญาณนิทฺเทสวณฺณนา นิฏฺฐิตา. ------------- ๑๒. ผลญาณนิทฺเทสวณฺณนา [๖๓] ผลญาณนิทฺเทเส ตํ ปโยคปฺปฏิปฺปสฺสทฺธตฺตาติ ตสฺส อชฺฌตฺตพหิทฺธา วุฏฺฐานปฺปโยคสฺส ปฏิปฺปสฺสทฺธตฺตา. มคฺโค หิ สกกฺขเณ กิเลสปฺปหาเนน อุภโต วุฏฺฐานปฺปโยคํ กโรติ, ผลกฺขเณ กิเลสานํ ปหีนตฺตา มคฺคสฺส อุภโต วุฏฺฐานปฺปโยโค ปฏิปฺปสฺสทฺโธ วูปสนฺโต นาม โหติ. อุปฺปชฺชตีติ มคฺคานนฺตรํ สกึ วา ทฺวิกฺขตฺตุํ วา อุปฺปชฺชติ, ผลสมาปตฺติกาเล ปน พหุกฺขตฺตุํ, นิโรธา วุฏฺฐหนฺตสฺส ทฺวิกฺขตฺตุํ อุปฺปชฺชติ, สพฺพมฺปิ หิ ตํปโยคปฺปฏิปฺปสฺสทฺธตฺตา อุปฺปชฺชติ. มคฺคสฺเสตํ ผลนฺติ ผลํ อเปกฺขิตฺวา นปุํสกวจนํ กตํ. สกทาคามิมคฺคกฺขณาทีสุปิ เอเกกมคฺคงฺควเสเนว วุฏฺฐานโยชนา เวทิตพฺพา. ผลญาณนิทฺเทสวณฺณนา นิฏฺฐิตา. --------------

เนื้อความอรรถกถาฉบับภาษาบาลี อักษรไทย เล่มที่ ๔๗ หน้าที่ ๓๐๑. http://84000.org/tipitaka/read/attha_page.php?book=47&page=301&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=47&A=6726&modeTY=2&pagebreak=1 http://84000.org/tipitaka/atthapali/th_line.php?B=47&A=6726&modeTY=2&pagebreak=1#p301